Ana Anene Toromon 2 - Te B'aib'ara

E Katamaroai B'aai Nako Te Tangira E taku Neierei:

¹ Bon te rooti ngai man te aba are Tiaron, kiebun te m'arua.

E taku Teuarei:

² Raou ae e tangiriko, ngkana ko kabootauaki ma ataeinaine ake tekorakina, ao bon te kiebu ngkoe i buakon kaai aika a kateketeke.

E taku Neierei:

³ Ao ngkoe, au tangira, bon te kai ae te aaboro i buakon kain te buakonikai. E anganai te kukurei nuum; ao a karewerewe uaam.

⁴ Ko kairai nakon am ru i bukin am baka n am'arake ao ko kab'aroa am tangira.

⁵ Karina angiu ao kakorakoraai n taian kam'au ni kureebe ao taian aboro. I b'arua te tangira!

⁶ Kawenea baim te maing i aan atuu ao rab'atai ni baim are te atai.

⁷ Ataeinainen Ierutarem, kam na berita nako iu ni m'aakan te ria ma te anterobe b'a e na aki kautaki te tangira i m'aain tauraoina.

E taku Neierei:

⁸ I ongo b'anaan te aomata ae I tangiria, ngke e tabe n eweewe i aoni maunga ma tabuki

⁹ kaanga te ria ke te anterobe. Ao ngkai e a tei i tinanikun ara oo, ni kaninganinga man te winto

¹⁰ man taetae nako iu. Raou ae e tangiraki, I tangiriko! Ti a airi n nako.

E taku Teuarei:

¹¹ E a toki tain te kam'aitoro, e a tia n toki te karau;

¹² a rabuna aon te aba taiani uee, bon tain te anene. E ongo te aba b'anaaia taian taobe i abara.

¹³ A uaa taian biiku, ngkai a uee taiani kureebe ae a kianako boia i nanon te ang. Raou ae e tangiraki, I tangiriko! Ti a airi nako.

¹⁴ Bon au taobe ngkoe ae raba i buakon taiani b'a i rarikin katatin te aba. Kariaia b'a N na noora kanikanim! Kariaia b'a N na ongo b'anaam ae e tangiraoi.

¹⁵ A uee ara kureebe; ti na riai n rawei taiani kameanti aika a uarereke aika a aki toki n tiring arokara kureebe.

E taku Neierei:

¹⁶ Raou ae e tangiraki, Am b'ai ngai, ao au b'ai ngkoe, ngkai ko kaam'arakeia am tiibu i buakon taiani kiebu.

¹⁷ Kaanga aongkoa te ria te teei ngkoe ae e m'am'aie i aon raabeen nako te maunga ni karokoa rokon te ngaina ma ni mauna nako te roo.