Ana Anene Toromon 1 - Te B'aib'ara

E Raoiroi Riki Te Tangira Nakon Te Wain

¹ Bon aei ana anene Toromon ae e rangi n tamaroa.

E taku Neierei:

² Karaua raoi ni kiiti ma ngai! E tamaroa riki am tangira nakon te wain,

³ ao ko rangi ni boiarara. A bane ataeinaine n tataaniko; kaanga ai aron kianakon te boiarara tataekinan aram.

⁴ Kawaekoako, au uea! Ti a kawaekoaira. Kairai nakoni mwengam. Ti rangi ni kukurei iroum! Ao ti neboa am tangira nakon riki te wain. Ataeinainen Ierutarem, e tamaroa b'a kam na ti neboia.

E taku Neierei: Ao e taku te ataeinaine:

⁵ I b'atab'ata ao I botonaine, kaanga te autinrianna n te rereua ke kaanga ana roki nako Toromon.

⁶ Ko na tai karekea taarau i bukina ngkai e b'atab'ata kuniu b'a mwiin aan te riringa. A un irou tariu; ao a kam'akurai n te nnenaroka ni kureebe, ai ngaia are I a aki tabe ma ribau.

⁷ Raou, I tangiriko! Ko kakaam'arakeia ia am tiibu ao ko kamotirawaia ia n te tawanou? Tai kataia n tuangiia tiibu b'a ana taraai b'a I buakaka Bon tiaki ngai temanna mai buakoia aine aika a aki mamaamaa n iririia taani kaawakintiibu.

E taku Teuarei:

⁸ Neie ko rangi n tangiraki, ngkana ko aki ataia, ao ko na ira kawaia tiibu. Ao kaam'arakeia am kooti ataei i rarikin aia autinrianna taani kaawakintiibu.

⁹ Ko rangi ni kantara kaanga te aoti are e kaira ana kaanibuaka te uea.

¹⁰ E karakaa tamaroam te taabia, ao e m'aeniko n te m'aenroroa ae e karaoaki man atiibu aika a kakaawaki.

¹¹ Ti na karaoa katamaroaam man te koora, aika a rarangaaki ma te tirewa.

E taku Neierei:

¹² Au uea, ngke ko toka i aon am kaintekateka, ao bon te b'a n tabunea ae e m'aaka au tangira.

¹³ Raou, bon te boiarara ngkoe i marenan mammau;

¹⁴ Boni ueeni kaai ngkoe man te nnenaroka are En Keri.

E taku Teuarei:

¹⁵ Au tangira, ko rangi kantangiraki, i aon te taatangiraki matam kaanga matan te taobe.

E taku Neierei:

¹⁶ Raou, ko rangi ni botonim'aane, ko botonim'aane n te koaua E na riki te uteute ae e mawaawa b'a ara kainiwene ngkana ti mareaki

¹⁷ ae e mena i aan nuun te tiira ao kaai aika m'aiango.