Amota 7 - Te B'aib'ara

Miiakinan Taian Rokati.

¹ Ao e roko i rou te mii mai roun te UEA ae rietaata. Ao I noria b'a E karika te taanga n rokati imwin korean ana uteute te uea ngke a tiba manga bwebwerake uteute aika boou.

² Ao i nanon miiu, ao I noori rookati b'a a kang baika a mawaawa ni kabane i aonteaba. Ao I taku, “Kab'arai aia bure aomata te UEA ae rietaata! A na kangaa ni maiu, b'a bon aomata ngaiia aika a uarereke ma ni mamara!”

³ Ao E bita nanona te UEA ao E taku, “Tera ae ko a tia n nooria Amota, N na bon aki kakoroa bukina.”

Miiakinan te Ai

⁴ E a manga roko naba i rou te mii mai iroun te UEA ae rietaata. Ao I nooria b'a E tabe ni katauraoi nakon kataereaia Ana aomata n te ai. E kauraa te nama ae korakora are i aan te aonnaba, are e a manga ura iai te aonnaba ni korakoran kabuebuena.

⁵ Ao I taku, “E a tau te UEA ae te Atua! A na kangaa ni maiu Am aomata, b'a bon aomata aika a karako ma ni mamara!”

⁶ Ao E a manga bita naba nanona te UEA ao E kaangai, “E na aki koro naba bukin aei.”

Miiakinan te Kora ni Kaeti.

⁷ E a manga roko naba i rou te mii mairoun te UEA. Ao I nooria b'a E tei i rarikin te o ae e a tia ni kateaki ma ni kaetaki raoi n te kora ni kaeti, Ao E taua te kora ni kaeti i baina.

⁸ Ao E kataetaeai, “Tera ae ko nooria?” Ao I kaangai, “te kora ni kaeti.” Ao E taku, “I kamanena te baei ni katereterea b'a ti te bo Au aomata ma aron te o ae e aki tei n eti raoi. Ma ngaia ae N na bon aki manga bita nanou i bukin oreaia.

⁹ E na uruaki aia tabo n taromauri kanoan Itaaka. A na tiku n uruaki taabo ake a tabu i aon Iteraera. N na kamaunanakoa te utu ni uea are Ieroboam.”

Amota ao Amatia.

¹⁰ Ao e kanakoa te rongorongo Amatia are ibongan Betaera nakon uean Iteraera are Ieroboam ae e kaangai, “E kabuakakako Amota nakoia aomata. A rawawata a na taeka n te aro are a kiriwe nanoia aomata iai.

¹¹ A kaangai ana taeka, ‘E na mate Ieroboam n te bo ni buaka, ao a na uotaki nako aomatan Iteraera mai abaia b'a taenikai.’ ”

¹² E taku Am'atia nakon Amota, “E a bati n tau anne te burabeti! Naako okira abam are Iuta ao taetae ni burabeti iai, ao anaa boom irouia.

¹³ Tai manga taetae ni burabeti i Betaera, b'a aio a na kaawa n taromauri te uea, are e mena iai te tembora.”

¹⁴ E kaeka Amota, “Tiaki ngai te aekaki ni burabeti ae m'am'akuri i bukin kabooana. Bon tiaki ngai te burabeti, ma bon te tia kaawakin man ngai, ao I kaawakin naba aroka aika taian biiku,

¹⁵ ma E anaai te UEA ma n au m'akuri ni kaawakin man, ao E kanakoai b'a n na taekina Ana taeka nakoia Ana aomata aika Iteraera.

¹⁶ Ma ngaia ae kam na ongora n Ana taeka te UEA, kam tuangai b'a n na aki taetae ni burabeti ao n na aki eekinakoi ngkami.

¹⁷ Ma ngaia ae ngkoe ae Amatia, E kaangai Ana taeka te UEA nakoim, ‘E na riki buum b'a te aine ae ainen mataawa i nanon te kaawa, ao a na bane ni mate natim n te buaka, ao e na tib'atib'aaki abam nakoia tem'angina. Ao ngkoe, ko na mate i nanon abaia beekan, ao a na uotaki nako aomatan Iteraera mai abaia b'a taenikai.’