Amota 6 - Te B'aib'ara

B'akani Iteraera.

¹ Bon te bong ae e kakamaaku nakoimi ngkami Iteraera ake i Tion, ake kam m'aninga nako n nakoami aika a ririeta, ao ngkami naba ake i Taamaria ake akea raraoman nanomi n unin te UEA. E kanga n riki anne iroumi ao bon ngkami taan kawaraki irouia aomata i bukin buokaia.

² Noora te kaawa are Karene. Noora naba te kaawa ae ab'ab'aki are Amata, ao ruorikaaki n noora naba aia kaawa I-Biritia are Kate: a bon aki roota tamaroan aaba n uea aika Iuta ma Iteraera, a aki roota naba rababan tiaia.

³ Ma ngkai kam aki kan muuti n te bong n urub'ai ae nang roko, ao e na bon roko uruami mai rouia aika a buakaka i bukin ami m'akuri aika a buakaka.

⁴ Bon te bong ae rangi ni kakamaaku nakoimi ngkami aika kam ni wenewene i aon kiemi aika a katamaroaaki, ma n am'am'arake n irikoia kaao ma tiibu aika ataei!

⁵ Kam otoi kuuna ma n anenei ma te aabi n ai aron teuare Tawita.

⁶ Kam momooi wain n taian boora ao kam kabiri ngkami ni kabira aika a rangi ni boiarara, ma kam aki nanokawaki i bukin uruan Iteraera,

⁷ ma ngaia ae kam na riki b'a moan aomata ngkami ni kairaki nako b'a taenikai. A na mauna ami bootaki ma ami baka.

⁸ E a tia n anga te kauring te UEA ae rietaata ae moan te m'aaka ni kaangai, “I bati n ribaai aia kamoamoa Iteraera: I bati n ribaai naba mwengaia aika a raraoi, ao N na anga aia kaawa ae atuun aia tautaeka nakoia aia kairiribai.”

⁹ E ngae ngkana tengaun te m'aane aika a tiku n te auti ao a na bon bane naba ni mate.

¹⁰ E na kaotinakoaki rab'atan te mate man te auti iroun teuare a na buu te mate arei, are bon ngaia naba ae mataniwiia te bootaki ni mate arei. E na wewete te buu arei nakoia ake a tiku n te auti ni kaangai, “iai riki raom temanna ikanne?” Ao e na kaekaaki ni kaangai, “akea” Ao e na kaangai ana buu teuare e mate, “Tai karongoaa, ti riai ni kaawakiniira man atoatongan aran te UEA.

¹¹ A na bane ni maerikiriki auti aika a korakora ma auti naba aika a karako ngkana E kanakoa Ana taeka te UEA.

¹² A konaa ni biri aoti i aon taian b'aa? A kona aomata ni kairiia kaao b'a a na katika te b'araua i aon taari ni kamaraua taari? Ma ko a tia n onika te eti nakon te b'ai ae kamamate, ao te raoiroi nakon te kairua.

¹³ Ko kamoamoako ngke ko taua te kaawa are Roteb'ara. Ko taetae ni kamoamoa iai ni kaangai, “Ti korakora n niniaanako te kaawa are Kaanaim.”

¹⁴ E taku te UEA ae te Atua ae m'aaka, ngkami aika Iteraera, N nang kanakomaia taanga ni buaka aika ianena b'a a na maekana abami. A na taua taekami ma ni karawawatai ngkami ni moa mai Amata are i meang n toki ni karaangan te Arab'a are i maiaki.