3.Ioane 1 - Te B'aib'ara

¹ Mairoun te unimm'aane nakoni Kaio ae tangiraki, ae I tangiria ni koaua.

² Ngkoe ae ko tangiraki, bon au kaantaninga b'a ko na kab'aia ni b'aai ni kabane, ao ko na marurung raoi, n ai aron aomatam ni koaua ngkae e a kab'aia.

³ B'a I bati ni kim'areirei ngke a aki toki n roroko taari akekei n taekina am koaua, n ai arom ngkai ko b'ab'aina te koaua ni maium.

⁴ Akea au kim'areirei ae bati riki nakon aei, ae te ongo b'a te koraki ake kanga natiu a b'ab'aina te koaua.

Te I-Karekeb'ai ao te Untaba

⁵ Ngkoe ae ko tangiraki, ko boni kakaonimaki ni karaoa ae ko karaoia i bukiia taari, ai moara riki nakoia taari ake ko aki tataneiai ma ngaiia;

⁶ ake a taekina ni kakoaua aron am tangira i matan te ekaretia. Ko karaoa ae e raoiroi ngkana ko bakaborauia n te aro ae riai i matan te Atua.

⁷ B'a a m'ananga nako i bukin arani Kristo, n akea te b'ai teuana ae a anaia mairouia aomata aika tiaki Kristian.

⁸ Ma ngaia ae ngaira, ti bon riai ni buokiia aomata aika ai aroia aikai, b'a ti aonga n riki b'a raao ni m'akuri i bukin te koaua.

⁹ I a tia ni koroboki teutana nakon te ekaretia; ma Rioterebe are kani kakannato i buakoia, bon akea butim'aeara ae e raoiroi i rouna.

¹⁰ Ma ngaia aei, ngkana tao I roko iroumi, ao N na kauring b'aai ake e karaoi ngke e wibuakaira n taeka aika bubuaka. Ao e aki toki ikanne. E rawa ni butim'aia taari akekei, ao e tukiia ake a kani butim'aia ma ni kab'akaia man te ekaretia.

¹¹ Ngkoe ae ko tangiraki, ko na tai kakairi n te m'akuri ae buakaka, ma ko na kakairi n te m'akuri ae e raoiroi. Ane karaoa ae e raoiroi ao boni mairoun te Atua; ane karaoa ae buakaka ao e tuai n nora te Atua.

¹² E tataekinaki ni kamoamoaki Temeterio irouia aomata ni kabaneia, ao ni maiuna ni b'ab'aina te koaua; ao e tataekinaki naba ni kamoamoaki iroura; ao ko ata ara kaotioti b'a e boni koaua.

Kabanea n Taeka ni Kamauri

¹³ A bati baika i rou aika I kani koroi taekaia nako im, ma I aki kani koroi n te anto ma te kainikoroboki.

¹⁴ Ma I kaantaninga b'a N na waetata n noriko, ao ti na taetae ni kaaitara.

¹⁵ E na mena te raoi i roum. A kamauriko raora aikai. Ko na anga ara kamauri nakoia raora akanne n tatabemaniia nako.