2.Uea 4 - Te B'aib'ara

Buokakin Te Aine Ae E a Tia ni Mate Buuna Iroun Eritai

¹ Ao te bong teuana, ao e taku neiere buun ana burabeti te UEA temanna ae e a tia ni mate nakon Eritai, Bon am tia m'akuri naba temanna teuare buu ngke e maiu, ao bon te tia taromauria naba te UEA. Ma e taarau iroun te aomata temanna, ao ngkai e nang anaiia natiu m'aane aika uoman aikai te m'aane anne b'a ana toro.

² Ao e taku Eritai, “N na kataia ni karekea buokam. Tera am b'ai akana iai iroum n am auti?” Ao e taku neierei, “Teuae ko karineaki! bon akea au b'ai ma ti teaina te b'atoro b'aan te oriwa.”

³ Ao e taku Eritai nako ina, Ko na bubutiia kaain rarikim b'a ko na tangoi aia tiaeki aika akea kanoaia. Ao ngkana a reke iroum aika a m'aiti,

⁴ ao ko a nako n rin n am auti ma natim m'aane, ao kam kaina te mataroa. Ao i mwiina, kam kanoai taian tiaeki akanne n te b'a, ao ngkana e on teaina i mwiin teaina ngkana kam kanoaia, ao kaokoroa

⁵ Ma ngaia are, e a nako neierei. Ngke e a oki ma natina te m'aane nako nanon te auti, ao a uoti taian tiaeki nako ina ao e a waaki ni kanoai.

⁶ Ao n tokina, ao e a taku nakoia natina m'aane, Uota mai riki nako iu te tiaeki teuana. Ao e taku natina, Ai bon akea riki te tiaeki. Ao e a toki naba tiin te b'a man te b'atoro are e uarereke arei.

⁷ Ao ngke e a tia n tuanga Eritai te b'ai are e riki, ao e taku Eritai nako ina, kabonakoa te b'a anne, ao kamanena am m'ane tabeua mai iai ni kab'ara te b'ai are ko tangoia mairoun teuarei. Ko konaa ni maiu ma natim m'aane n nikirana.

Kamaiuan Natin te aine ae te Kaub'ai iroun Eritai.

⁸ N te bong teuana ngke e mena Eritai n te kaawa ae Tunem, ao e kaitibo ma te aine ae e kaub'ai are e kaooa b'a e na am'arake ma ngaia n ana auti. Ao i mwiin anne, ao n taai are e a manga roko iai i Tunem ao e am'am'arake ma neierei ao buuna.

⁹ Ao i mwiin te tai ae e maan, ao e a taku neierei nakoni buuna, I kakoauaa b'a bon Ana burabeti te Atua te m'aane are e aki toki n roroko ikai.

¹⁰ E aera ngkai tiaki karaoa te ru ae e uarereke i aon taubukin ara auti? Ao tia karina kainiwenena, taiborana, kaintekatekana, ao te taura. B'a ngkana e roko, ao e a konaa n tiku iroura.

¹¹ Ao e a manga roko Eritai i Tunem n te tai are i mwiina, ao e a moana aia auti ao e a tam'arake nakon ana ru ni motirawa.

¹² Ao e taku nakon ana toro ae Keati, E rangi ni buobuoki te aine aei. Katam'arakea n nakomai nako taubukin te auti i nanon tabeua te tai.

¹³ Ao e roko neierei ao e tuanga Keati Eritai b'a e na taetae nakon neierei ni kaangai, A rangi ni m'aiti am kakumekume i bukira, ao ti tangiria n anganiko naba ara buoka. Iai te b'ai ae ko tangiria, ae ti konaa ni bubutiia te uea ke te mataniwi n tautia b'a e na karaoia i bukim? Ao e taku neierei, Bon akea te b'ai ae I tangiria b'a a m'aiti au utu i rarikiu.

¹⁴ Ao e taku Eritai nakon Keati, Ao tera ngkanne ae ti na kona ni karaoia i bukina? Ao e taku Keati, I ti ataia ae akea natin neierei te m'aane b'a e a rangi ni kara buuna.

¹⁵ Ao e taku Eritai nako ina, Tuangnga b'a e na nakomai riki. Ao e kawaekoa neierei ao e roko n tei i mataroan ana ru Eritai.

¹⁶ Ao e taku Eritai nako ina, N te tai naba ae ai aron aei n te ririki ae e na roko ao ko na b'ab'akoa ae bon oin natim te m'aane i m'anokani baim. Ao e taku neierei, I butiiko b'a ko na aki keweai b'a ana Aomata te Atua ngkoe.

¹⁷ Ao e bikoukou neierei, ao n te ririki are i mwiina ao e bungiia natina te m'aane n ai aron te tai are e taetae iai Eritai nako ina.

¹⁸ Ao n te bong teuana ngke e uarereke te ataei ni maanee arei, ao e a ira tamana nakon te tawaana, n te tabo ike a taia iai uan te uita taani m'akuri.

¹⁹ Ao e a karina naba n takaarua te ataei ni m'aane arei ni kaangai, E maraki atu. E rangi ni maraki atu. Ao e taku tamana nakon ana tia m'akuri, Uotia rikaaki nakon tinana.

²⁰ Ao a anaa te ataei ni maanee te tia m'akuri ni uotia rikaaki nakon tinana. E wene te ataei ni maanee arei i aon rangan tinana n te ingabong arei, ao e mate ngke e a tawanou.

²¹ Ao e a uotiarake neierei nakon ana ru Eritai, ao e kawenea i aon te kainiwene. Ao i mwiina, e otinako ao e kaina te mataroa.

²² Ao e wetea buuna neierei ao e taku, I tangiria ni kawara te burabeti. Kariaia b'a N na kamanena temanna te aati, karekea raou temanna te tia m'akuri ae e na irai ao kariaia b'a N na nako naba n te tai aei, b'a I aonga ni manga waekoa n oki.

²³ Ao e taku teuare buuna, E aera ngkai ko na kawaria n te bong aei, ao kai tiaki ngkai te Taabati ke te Toa ae Moan Otin Nam'akaina.

²⁴ Ao e taku neierei, “E bon aoria.” E tokara ana aati, ao e taku nakon te tia m'akuri, “Ti a nako. Ao tai kakaraurau, ma ti ngkana I tuangko.”

²⁵ Ao e kawaekoa ni m'ananga nakon te Maunga are Karemera b'a e na maroroo ma Eritai. Ao ngke e nooria Eritai b'a e a roko ao e taku, “Keati! nooria, kai ainen Tunem!

²⁶ Biiri butim'aia. Titirakinna b'a e uara ma ana utu.” Ao e taku neierei nakon Keati, “Ko rab'a, ti bane ni marurung.”

²⁷ Ma ngke e a tib'a roko i taubukin te maunga, ao e kawara Eritai ao e taua waena. Ao e kawaria Keati b'a e na kanakoa ma e kaangai Eritai, “Tai kuaia. Ko aki noora rawawatan nanora? Ma e aki roko n te tuangai te UEA bukin te b'ai ae e na riki aei.”

²⁸ Ao e taku neierei, “Teuae ko karineaki! I boni butiiko ngkoa b'a akea te b'ai ae ko na karekea nako iu. Ao I bon aki butiiko naba natiu te m'aane.”

²⁹ Ao e taku Eritai, “Keati, katauraoiko ao nakon ana auti neiei. Uota okou, ao ngkana ko roko ikekei, ao ko na kawenea okou i matan te ataei ni maanee. Ko na aki tikutiku n taetae ma aomata i aon kawaim, e aoria naba ngkana a kataia n taetae nakoim.”

³⁰ Ma e taku neierei nakon Eritai, “I tuea i matan te UEA ae e maiu ao i matam b'a N na bon aki okirikaaki ngkana ko aki irai.” Ma ngaia are, e teirake Eritai ao e iriia nako.

³¹ E kawaekoa Keati ni biri rimoana ao e kawenea okon Eritai i aoni matan te ataei ni maanee arei, ma e bon aki roko n te kakam'akuri ke ni karongoa te ataei ni m'aane arei. Ao e biri rikaaki Keati ao e taku nakon Eritai, “E aki uti te ataei ni maanee.”

³² Ao ngke e roko Eritai n ana auti neierei, ao e a boni kaineta naba ana ru ike e a noora iai rab'atan te ataei ni maanee i aon ana kainiwene.

³³ E rin nako, e kaina te mataroa ao e tataro nakon te UEA.

³⁴ Ao i mwiina, e toka i aon te kainiwene, ao e einako aon rab'atan te ataei ni m'aane arei, ma ni kabooa wiina ma wiin te ataei ni m'aane arei, ao matana ma matana, ao baina ma baina. Ao ngke e wene n arona arei ao e tabe n aabue rab'atan te ataei ni maane arei.

³⁵ E teirake Eritai, ao e ririaki i nanon te ru arei, ao i mwiina e a manga oki ni manga ei nako aon te ataei ni m'aane arei. E m'atie itiua te tai te ataei ni m'aane arei, ao e kaurea matana.

³⁶ E wetea Keati Eritai ao e taku nako ina, Kanakomaia tinan te ataei ni m'aane. Ao e karaoa arei Keati, ao ngke e a roko neierei i matan te mataroa ao e taku Eritai nako ina, “Ko a konaa n anaa natim.”

³⁷ E rin neierei, ao e bobaraaki i waen Eritai, ao i mwiina, e anaa natina ao e otinako.

Karaoiroan te Am'arake ae E Buakaka Iroun Eritai

³⁸ Rimwi riki, ao e nako Kirekara Eritai, ao e a roko te rongo n te aba arei. N te bong teuana ngke a boowi burabeti ake a maeka ikekei ma Eritai, ao e taku Eritai nakon ana tia m'akuri, “Kukana te am'arake n te b'aata ae e buubura, i bukiia burabeti aikai.”

³⁹ Ao e nako temanna mai buakoia nako buakonikai ni kakaei taiani baanikaai b'a renganan aia kuuka. E noora te kureebe ni buakonikai, ao e anai uaana ni m'aitin ae e konaa n uotia, ma e aki ataia b'a moan te maai uaan te aroka arei. Ngke e a oki, ao e korokoroi uaa akekei, ao e nnei i nanon te b'aata i buakon te am'arake.

⁴⁰ E a kabutaki nakoia burabeti akekei, ao a tanaki n am'arake, ao a takaarua ni kaangai, “Eritai, e rangi ni maai te am'arake aei. Ti a bon aki konaa ni kanna.”

⁴¹ Ao e taku Eritai, “Uotaamai te buraawa nako iu.” Ao e kab'akab'aka te buraawa i aon te am'arake, ao e a manga taku, “Kabutia nakoia.” Ao e a manga raoiroi kanakin te am'arake arei.

Kaam'arakeaia Tebubua Aomata Iroun Eritai

⁴² Temanna te m'aane man te kaawa are B'aaratiaritia are e uoti tabeua taiani uita aika a tib'a koreaki, ao 20 taiani kariki aika a karaoaki man moani uaan te b'aare ake a taiaki. Ao e taku Eritai, “Anganiia aomata b'a a aonga n am'arake.”

⁴³ Ao e taku ana tia m'akuri, “E bon aki tau m'aitin aikai i bukiia tebubua aomata.” Ao e taku Eritai, “Bon anganiia. E a tia ni berita te Atua b'a e na raka nako i aon ae e tangiraki.”

⁴⁴ Ma ngaia are, e anga te kariki ma te uita arei te tia m'akuri arei nakoia aomata. A am'arake ao e bon rawata naba nikiran kanaia n aron are E a tia ni berita iai te UEA.