2.Uea 24 - Te B'aib'ara

¹ I nanon ana tai n tautaeka Ieoiakim, ao e buakana Iuta uean B'aburon are Nebukaneta man taua taekana. E ongotaeka Ieoiakim nakon Nebukaneta i nanon tenua te ririki, ma i mwiina riki e a manga kakaitaraa.

² N te tai anne, ao E a kanakoia tautia te UEA b'a a na iraea ma ni kamaunaa kaawan nako Iuta. Tabeman mai buakon te taanga ni buaka aei bon mai B'aburon, ao tabeman mai Turia, ma Moaaba, ao Ammon. E a tia te UEA ni kanakoa ana toro are te burabeti ni kauringa Iuta i bukin aei,

³ ao ngkai E a kakoroa bukina. E nang kamaunaaki te aba ae Iuta, i bukina ngke e a tia ni bure Manate,

⁴ ma ni karika mateia aomata aika a m'aiti aika akea aia bure. E na bon aki kab'ara te bure aei te UEA.

⁵ A tauaki rongorongon b'aai ni kabane ake e karaoi Ieoiakim i nanon ana tai ni uea i nanon te boki are Rongorongoia Uean Iuta.

⁶ E mate Ieoiakim, ao e a manga uea natina te m'aane are Ieoiakin.

⁷ E kataenikaiaki uean Aikubita are Neko iroun uean B'aburon are Nebukaneta, ao e taua taekan abana ni moa man Karaangan Aikubita are e uarereke ni karokoa te Karaanga are te Iuberetiti. Ma ngaia are, e aki manga oki Neko ni buakana Iuta.

Uotakinakoan Te Uea are Ieoiakin Nako B'aburon (2 Rongorongo 36.9-10)

⁸ Ai tib'a 18 ana ririki ni maiu Ieoiakin ngke e riki b'a te uea i Iuta, ao e tautaeka ti i nanon tenua te nam'akaina mai Ierutarem. Tinana bon Nei Neutita are natin Erenatan are kaain Ierutarem.

⁹ E aki ongotaeka Ieoiakin iroun te UEA, n aron are e a tia ni karaoia naba tamana are Ieoiakim.

¹⁰ E kanakoa te taanga ni buaka mai B'aburon te uea are Nebukaneta ni buakana Ierutarem n te tai ae e aki maan i mwiin reken Ieoiakin b'a te uea.

¹¹ I nanon tain te buaka, ao e bon roko Nebukaneta n te kaawa are e buubura arei.

¹² E waekoa Ieoiakin n taenikai, ni ikotaki ma tinana ao ana taani m'akuri, ao ai uana naba ma ana aobitia n te taanga ni buaka, ao a na mataniwi. Ao e katika Ieoiakin te uea are Nebukaneta. A riki baikai n ana kawanua n ririki Nebukaneta n tautaekana B'aburon.

¹³ E a tia te UEA ni kauringnga b'a n te tai teuana, ao e na roko anaakin taiani kaub'ai man ana bareti te uea ao man te Tembora, ni ikotaki ma taiani koora ake e karaoi Toromon i bukin te Tembora. Ao anne te b'ai are e tuangiia ana tautia Nebukaneta b'a a na karaoia.

¹⁴ E kairiia nako taian aobitia ma mataniwi, taani kairiiri n te taanga ni buaka, ao taani m'akuri aika a rabakau. Bon 10,000 bootaia. Bon ti aomata ake a rangi ni maiu ni kainano ake a tiku i Iuta.

¹⁵ E uotaanako Ieoiakin te uea are Nebukaneta nako B'aburon, ni ikotaki ma tinana, buuna, ana mataniwi, ao ai taani kairiiri aika a kakannato mai Iuta.

¹⁶ E boni kairiia nako naba 7,000 tautia, 1,000 taani m'akuri aika a rabakau, ao aomata nako aika a na rangi ni boongana n te buaka.

¹⁷ Ao i mwiina, e rinea tarin taman Ieoiakin are Matania b'a e na uea i Iuta ao e bita arana nakon Tetekia.

Uean Iuta are Tetekia

¹⁸ Ai tib'a 21 ana ririki ni maiu Tetekia ngke e rineaki b'a te uea i Iuta, ao e tautaeka mai Ierutarem i nanon tebwi ma teuana te ririki. Tinana bon Nei Amutara are natin Ieremia are kaain Ribena.

¹⁹ E aki ongotaeka Tetekia iroun te UEA, n aron are e a tia ni karaoia Ieoiakim.

²⁰ Bon Tetekia are e a manga kakaitaraa Nebukaneta. A tia kaain Iuta ao Ierutarem ni kauna te UEA. Ma ngaia are, n tokina ao E a tannako mairouia. Ao bon anne bukin rikin baikai ni kabane.