2.Uea 16 - Te B'aib'ara

Aati are Uean Iuta

¹ E a manga riki b'a uean Iuta teuare Aati are natin Iotam te m'aane n ana ka 17 n ririki ni uea Bika i aon Iteraera.

² Ai bon tib'a 20 ana ririki ni maiu n te tai anne, ao e tautaeka ma Ierutarem i nanon 16 te ririki. E bon aki katotoonga ana bakatibu are Tawita teuare Aati. E aki ongotaeka iroun te UEA,

³ ao e buakaka riki arona nakoia uean Iteraera. E anga ae bon oin natina b'a te karea, are bon te m'akuri ae moan te kam'araa are a kakaraoia ngkoa botannaomata ake e kakionakoia nako te UEA mai Iteraera.

⁴ E angaanga karea Aati n taiani baangota, ao ai uana naba ma taian tabuki, ao i aan nuuni kaai aika a buubura.

⁵ Ngke e tautaeka i Iuta te uea are Aati, ao e m'ananga uean Etom ni manga taua te kaawa are Erata mai Iuta, ao e kakioia nako kaain Iuta.

⁶ Ao a nako kaain Etom ni mena i Erata, ao a bon tiku naba ngkai ni maeka ikekei. Ni bon te tai naba anne, ao e a m'ananga uean Turia are Retin ma uean Iteraera are Bika ni buakana Ierutarem ma a aki konaa ni kataenikaiia.

⁷ E kanakoa ana rongorongo Aati nakon uean Aturia are Tikerata Biretia ae e kaangai, “Te uea ae ko karineaki. I a buakanaki ngai ae am toro ae e kakaonimaki iroun te uea are Retin ao te uea are Bika. Taiaoka. Nakomai kamaiuai.”

⁸ Ao a kanakoi naba taian tirewa ma koora man ana Tembora te UEA, ao mani kaub'ai ake n te bareti b'a a na b'aintangira nakon uean Aturia.

⁹ Ni bon te tai naba are e reke iai te rongorongo iroun Tikerata Biretia, ao e a m'ananga naba ma ana taanga ni buaka nako Turia. E taua te kaawa n tua are e buubura are Tamateko, ao i mwiina, e anaiia aomata ake a maeka n te kaawa arei nako Kira b'a taian taenikai, ao e tiringa te uea are Retin.

¹⁰ Rimwi riki, e m'ananga Aati nako Tamateko ni kawara Tikerata Biretia. Ao ngke e mena Aati ikekei, ao e noora te baonikarea, ao e kaoka katotoona nakon Uria are te ibonga ma kaetieti i bukin katean teuana.

¹¹ E irii baairean aroni katean te baonikarea Uria ni katea iai te baonikarea ae bon aekakin raoi are i Tamateko, ma ni katiaa raoi i m'aain okin Aati.

¹² Ao ngke e a oki Aati mai Tamateko, ao e nooria b'a e a tia te baonikarea.

¹³ Ma ngaia are, e a angakarea i aona aika te karea ni kabuokaki, te karea are uaanikai aika a uangingi, te karea are te mooi te wain, ao te karea are raraan te karea n raoi.

¹⁴ I mwiina, ao e a kam'awa te baonikarea are te buraati, b'a e aonga n roko raoi te baonikarea are e boou i matan ana Tembora te UEA.

¹⁵ Ao e taku nakon Uria are te ibonga: Ni moa man te tai aei, ao e nang kakaraoaki taian angakarea ake n te ingabong ma te tairiki, ao ai arona naba ma b'aintangira ake taiani uita ao taiani wain, i aon te baonikarea aei. E na karaoaki naba ikai taian angakarea i bukiia aomata ao te uea. Katimtim'a raraan taiani karea ni kabane i aon te baonikarea aei, ao katuka te baonikarea are te buraati nako iu b'a N na kamanenaa i bukin kakaaean nanon te UEA b'a tera ae e tangiria b'a N na karaoia.

¹⁶ E karaoi b'aai ni kabane ake e tuangaki Uria iroun Aati.

¹⁷ E kanakoa mai nanon ana Tembora te UEA b'aai ake a raababa ake i rarikin kaintei ake a buubuti, ao taiani boora naba ake a uarereke. E kanakoa naba te boora are e buubura are e toka i akuiia katotoongan kaao, ao e a manga katokaa i aon kaintei aika taian atiibu.

¹⁸ E karaoa te autinrianna ae e kaokoro, are e kamanenaaki i bukin te taromauri n te Taabati, ao e kaina te mataroa are e kakamanenaa n ririn iai uean Iuta nakon te Tembora. E karaoi b'aai aikai ni kabane i bukin kakukureian te uea are Tikerata Biretia.

¹⁹ A tauaki rongorongon b'aai ni kabane ake e karaoi Aati i nanon ana tai ni uea n te boki are Rongorongoia Uean Iuta.

²⁰ E mate Aati ao e taunaki i rarikiia ana bakatibu i Ierutarem, ao e a manga uea natina te m'aane are Etekia.