2.Uea 11 - Te B'aib'ara

Uean ainen Iuta are Nei Ataria

¹ Ni bon te tai are e ongo naba iai Nei Ataria b'a e a mate natina te m'aane are Aatia, ao e a iangoia b'a e na tiringiia ana koraki te uea ni kabaneia ake a na konaa ni manga riki b'a uea. E boni karaoa aei,

² ma e kamaiua teuare Ioati are natin Aatia Nei Ieotieb'a ngke e nang kamateaki. Ao Nei Ieotieb'a are natin Ieoram are ai m'anen Aatia, e karabaa ai natina te m'aane are Ioati, ao ana tia m'akuri i nanon te runimatu i nanon ana Tembora te UEA ike a mano iai mairoun Nei Ataria.

³ E karabaaki Ioati i nanon te Tembora ma Nei Ieotieb'a i nanon onoua te ririki ngke e riki b'a te ueanaine Nei Ataria i aon Iuta.

Kaueakin Ioati I aon Iuta Iroun Ieoata

⁴ E a tia ni karabaaki Ioati are natin Aatia te m'aane i nanon ana Tembora te UEA i nanon onoua te ririki. Ao i nanon te kaitiua n ririki, ao e a kanakoa weteaia mataniwiia taan teiakina te uea, te ibonga are Ieoiata, ao n reitaki naba ma mataniwiia taan tei n te bareti. A kaaitibo ma ngaia n te Tembora, ao e buubutiia b'a a na berita nako ina n aran te UEA. Ao i mwiina, e kaotinakoa Ioati,

⁵ ao e taku nakoia, Aio te b'ai ae I tangiria b'a kam na karaoia. A na tei tenikoraki taan tei mai buakomi nakon te Taabati. I tangira te korakina b'a a na teiakina te bareti.

⁶ Are te korakina a na teiakina te mataroa are Tua, ao te katenikoraki a na teiakina mataroan te bareti, ao ana kamotirawaia taan teiakina te bareti.

⁷ Taan tei ake uakoraki a kaantaningaaki b'a a na motirawa n te Taabati. Ma I tangiriia b'a a na tiku ikai n te Tembora n teiakina te uea ae Ioati.

⁸ Kam na kakoaua raoi b'a kam iririia nako n taabo ike e nako iai, ao n tatauraoi n anai ami kabaang ma n tiringa ane e na kataia ni kaaniia.

⁹ A ongotaeka taani kairiiri irouia taan tei akekei iroun Ieoiata. A weteia ni botiia aia taan tei n tatabemaniia nako, ake a m'akuri ma ake a motirawa.

¹⁰ Ao Ieoiata, e kaotinakoa man te Tembora te kabaang ma ana otanga Tawita, ao e anga nako ia mataniwi.

¹¹ I mwiina, a anga b'aai ni buaka nakoia taan tei ake a onea mwiia ni katobibia te Tembora, ao te baonikarea ma ni kaawakina Ioati ma ni itera ni kabane.

¹² E kairaki Ioati iroun Ieoiata nako tinaniku, ike e a katokaa te baunuea i aon atuuna, ao e anganna katotongan te kaetieti i bukin kairan te botannaomata. E kab'aroaki b'aan te oriwa i aon atuuna ni kaotia b'a ngaia ngkai te uea, ao a uboubo aomata ma n takaarua ni kaangai, “E na teimatoa maiun te uea.”

¹³ E ongo karongoaaia aomata Nei Ataria, ao e nakon te Tembora.

¹⁴ E noora Ioati n tei i rarikin te boua teaina, are boni nnen te uea. A tei taan anene, ao taani katangibu i rarikina, ao a kukurei aomata ma ni katangi taiani bu. E raei kunnikaina Nei Ataria i bukini marakin nanona, ao e takaarua ni kaangai, “Kam kam'aneai ngkami aika taani kam'aam'ane.”

¹⁵ Ao e taetae Ieoiata n te tai naba arei nakoia mataniwin te taanga ni buaka ni kaangai, “Tiringnga, ma kam na aki tiringnga n uakaani ma ana Tembora te UEA. Uotia nako tinanikun i mataia te taanga ni buaka, ao tiringiia akana raona.”

¹⁶ Ma ngaia are, a katikitikia nako mataniwiin te taanga ni buaka nakon te mataroa are a kaakairaki iai taian aoti nako nanon te bareti, ao a tiringnga ikekei.

¹⁷ Ao Ieoiata are te ibonga, e bubutiia Ioati, ao aomata b'a a na berita b'a a na kakaonimaki bon nakoia n tatabemaniia, ao nakon te UEA.

¹⁸ Ao i mwiin arei, ao a nako aomata n rin n te tembora are e karaoaki i bukin neboakin B'aara, ao a kab'aka. A urui taiani baonikarea ao taiani bouananti ao a tiringa Matan are ana ibonga B'aara, i matan te baonikarea. I mwiina ngke e a tia Ieoiata ni katikuia taan tei ni katobibia te Tembora,

¹⁹ ao e a weteia ni kabane mataniwiin te taanga ni buaka, ao taan teiakina te uea aika a bane aroia, ao tan teiakina te bareti, ao aomata. A kaira Ioati man te Tembora, ri nanon aia mataroa taan tei nako nanon te bareti. E tekateka i aon te kaintokanuea, ao e riki b'a uean Iuta.

²⁰ A bane ni bootaki ni kukurei aomata i bukina ngke e a tia n tiringaki Nei Ataria, ao e a manga reke te rau i aon Ierutarem.

²¹ Ai tib'a itiua ana ririki Ioati ngke a riki baikai.