2.Tamuera 6 - Te B'aib'ara

Uotakin Te Atiniberita Iroun Tawita Ni Kaokaki Nako Ierutarem

¹ E bootia tenibwi te ngaa tautian Iteraera aika a bane aroia Tawita ao

² e kairiia nako B'aara i Iuta, are e aranaki naba b'a Kiriata-Iearim. A na nako ikekei b'a a na ana te Atiniberita ma ni kaokia nako Ierutarem. E mena ana kaintokanuea te UEA i aon te Atiniberita aei, ao e taromauriaki ikekei.

³ Ao a katokaa te Atiniberita i aon te kaa ae e boou ae e katikitikaki iroun te kaom'aane ao e waaki nako n ruo rikaaki mai aon te tabuki man ana auti Abinataba. Taani kaira te kaom'aane arei bon natin Abinataba m'aane aika Uta ao Aaio,

⁴ e ririmoa Aaio.

⁵ Ao iai tabeman Iteraera aika a katangitang n taian aabi aika uarereke ao b'aai ni katangitang ake tabeua ake iai karaiia, ao te raea, te timbere, katineti, ao te timbara. Ao a kukurei Tawita ma te koraki ake tekorakina, ao a taua ma nanoia n ruoia nakon te UEA.

⁶ Ma a roko n ana tabo ni kaaki kunni uita Naakon, ao e turanako waen te kaom'aane, ma ngaia are, e kanakoa baina Utia ao e taua te Atiniberita.

⁷ Ao e rangi ni un te UEA iroun Utia ngke e karaoa arei, ao e tiringnga Utia ngkekei naba i rarikin te Atiniberita.

⁸ Ao e maraki nanon Tawita iroun te Atua ngke e tiringa Uta. Ao e arana te tabo anne b'a “B'akaran Uta”, ao anne arana ae teimatoa.

⁹ Ao e maaku Tawita iroun te UEA ao e taku, “N na bon anaa te Atiniberita nakon au kaawa ke N na aki?”

¹⁰ Ao e iangoia b'a e na aki uotia nako ikekei. Ma ngaia are, e a manga rairaki nako man te kawai ao e uotia nakon mwengan Obeta Etom, are kaain Kata.

¹¹ Ao e tiku te Atiniberita ikekei i nanon tenua te nam'akaina, ao E a rangi ni kakab'aia Obeta Etom, ana utu, ao b'aai ni kabane ake e b'ain.

¹² Ao iai ae e tuanga te uea are Tawita ni kaangai, “E karaoa aei te UEA i bukina ngkai e mena te Atiniberita ni mwengan Obeta Etom.” Ngaia are, e kawaekoaa Tawita ni kawara mwengan Obeta Etom n anaa te Atiniberita ni kaokia nakon ana kaawa Tawita. Ao a bane ni kukurei aomata ni kabane.

¹³ Ao a nakonako aomata onoua eutan waeia, ao i mwiina, Tawita e kareana te kaom'aane ao te kao ae e rineaki.

¹⁴ E m'am'aie i bukin te UEA ma nanona ni kabane, ma akea ana kunnikai b'a ti te riinen.

¹⁵ A bane aomata nako n takaarua ma ni katang taian buu ngke e tabe ni uotaki te Atiniberita.

¹⁶ Ao e taratara Nei Mikara are natin Tauro te aine man te winto ao e matakuakina te Atiniberita ngke e uotaki nako nanon ana Kaawa Tawita. Ao e rangi ni b'ainrang ngke e noora Tawita ngke e kibakiba rake ni m'am'aie nakon te UEA.

¹⁷ A katuka te Atiniberita i nanon ana autinrianna Tawita are e a tia ni kateia i bukina. Ao e taromauria te UEA teuare Tawita ni karean taiani man ma ni kabuoki i aon te baonikarea,

¹⁸ ao i mwiina, e kakab'aiaia aomata n aran te UEA ae Moan te M'aaka.

¹⁹ Ao e anganiia m'aane ma aine ni kabane ake n te koraki arei teutana te kariki, ao teutana te iriko ni man, ao te abutana te kureebe ae e m'au, ao a bane n okiri mwengaia aomata nako.

E Taetae Mikara nakon Tawita

²⁰ Ao e okira mwengana Tawita b'a e aonga ni konaa ni buubutiia te UEA b'a e na kakab'aiaia ana utu. Ma e otinako Nei Mikara are natin Tauro te aine ao e a tatakarua nakoina ni kaangai, “Ko rangi ni kakannato n te bong aei! Ko karaoa aron te unim'aane ae e baareka, ni m'am'aie ni bebeekan i mataia am taan ni m'akuri aika ataeinaine.”

²¹ E taetae Tawita ni kaangai, “E aki rinea tamam te UEA ke temanna riki man ami utu b'a e na riki b'a te tia kairiiri irouia ana aomata. E rineai te UEA, ao I bukamaruia ni karinea.

²² N na kaotia nakoim te karineaki ae e na reke irou! N na bon kab'ainrangai i bon irou. Ma taan m'akuri aika ko taekiniia aikai a na bon karineai naba!

²³ E aki roko n te kariki Nei Mikara.