2.Tamuera 22 - Te B'aib'ara

Ana Anene Tawita Nakon Te UEA

¹ Ao e anene Tawita nakon te UEA i mwiin kamaiuana mairouia ana kairiribai, ai moara ra riki Tauro. Aikai taekan ana anene:

² Ara UEA ao Atuara, bon te b'a Ngkoe ae Ko korakora, au nono, ao te tia kaawakinai.

³ Bon te b'a Ngkoe ae kamaiuau. Bon otangau Ngkoe, au b'ai ni buaka ae e korakora, au tabo ni katantan. Ko kamaiuai ao Ko kaawakinai b'a N na aki ikoaki.

⁴ I neboiko, au UEA! I tataro nakoim, ao Ko kamaiuai mairouia au kairiribai nako.

⁵ E otab'aniniai kaanga marawa te mate, ao I kurimaraa ni kab'autaki n te ieka.

⁶ E niroaai te roobu man abaia maate, ao e kawenea te b'ainikam'ane i m'aain kawaiu te mate.

⁷ I a reke n te kangaanga ae e kakamaaku ngke I weewete nakoim, ma Ko ongo b'anaau man am tembora ao Ko kaekaa au tataro.

⁸ E m'aiei te aonnaba ao I ruru! A ioioaki n aki akaaka bouani karawa. Ko un ngkoa

⁹ ao Ko katinakoa te bubu mai nanom. E oti nako mai wiim te kabuebue ae e korakora ao te ai ae e urarake.

¹⁰ Ko kauki taiani karawa kaanga taian roki, ao Ko ruorikaaki ma taian nang ni buakani karawa i aani waem.

¹¹ Ko toka i aon boraueaia maan aika a maiu. Ko kaoti ma baim ni kiba aika taian ang.

¹² Am autinrianna bon te rootongitong! E kaonaki karawa n nangin tabuariki, are e karabako b'a Ko na aki nooraki.

¹³ E kaura karawa te kooro ae e uraurake i matam.

¹⁴ Te UEA ae Moan te M'aaka, e rurunga b'anaam man taian karawa.

¹⁵ Ko kamaenakoia am kairiribai n te kanoanikatebe are iti ni karawa.

¹⁶ Ko rurunga i marawa, ao a nooraki karawarawan nanoni marawa aika a rangi n nano. Ko ringongo, ao e ioioaki te aonnaba ma aana nako.

¹⁷ Ko kaaenakoa baim mai ieta ao Ko tabekai rake mai kabin marawa.

¹⁸ Ko kamaiuai mairouia au kairiribai nako ake a rangi n riribaai ao a I aki konai moaia.

¹⁹ A roko ni buaka, i nanon tain rokon te kabuanib'ai ma Ko kamanoai

²⁰ Ngke I a niniaki nako, Ko kainaomataai ao Ko kamaiuai i bukina ngke Ko tangirai.

²¹ Ko karaoa ae e raoiroi nako iu, te UEA i bukina ngke I karaoa ae raoiroi, Ko anganai kaniwangau i bukina ngke bon akea au bure.

²² I karaoa te b'ai are Ko tangiria ao I aki roko n te rairaki nakon karaoan te buakaka.

²³ I kaawakin Am tua inanou ao I aki roko n te rairaki nako man Am taeka n reirei nako.

²⁴ I ongo taeka raoi Iroum ao I kaawakinai man te bure.

²⁵ Ko a tia ni karaoa ae e raoiroi nako iu i bukina ngke I karaoa te raoiroi; Ko anganai kaniwangau i bukina ngke akea au bure ni kaineti ma Am kainibaaire nako.

²⁶ Ko aki toki ni kakaonimaki nakoia Am aomata aika a kakaonimaki, ao Ko onimakinaki irouia aika a onimakinaki.

²⁷ Ko taua ma nanom nakoia ni kabane aika a taua naba ma nanoia, ma nakoia aika a aki kakaonimaki Ko karaoa are e bon riai n reke nakoia ni mwiin aia m'akuri.

²⁸ Ko kamaiuia aika a nimaamannei, ma Ko iaiangoa kab'akaan te aomata ae e kainikatonga.

²⁹ Te UEA ae te Atua, bon au taura Ngkoe. Ko onika te rootongitong nakon te oota.

³⁰ Ko buaka ni kataenikaiia au kairiribai ma n taui aia kaawa nako.

³¹ A tamaroa kawaim, te UEA ao a eti raoi am taeka. Bon te otanga Ngkoe nakoia aika a biri nakoim ni kakaaea buokaia.

³² Bon ti Ngkoe te Atua! Bon ti ngkoe te b'a ae e korakora.

³³ Bon au nono Ngkoe ae e korakora, ao ko kainaomataai.

³⁴ Ko kabirim'akai waeu kaanga waen te ria, ao Ko buokai ni kateirakeai i aon taiani maunga.

³⁵ Ko reireia baiu aron te buaka ao a taneiai anganibaiu ni kamanenaa te kainikatebe te buraati.

³⁶ Bon ti Ngkoe otangau, ao e riki n tanoata taekau, man rokom ni buokai.

³⁷ Ko kaitiaka te kawai ibuku, ao ngkai e a aki baebae waeu.

³⁸ I teimatoa ni kakiokioia au kairiribai ni karokoa a reke irou ao I uruan aroia.

³⁹ I uruan aroia! I kanim'a au kabaang inanoia au kairiribai, ao a manatua i aan waeu.

⁴⁰ Ko buokai ni katokanikaiai ao ni kairoroia taani buakaniira b'a a na riki b'a konau.

⁴¹ Ko kabiri nakoia au kairiribai, ao I tiringiia.

⁴² A tangira buokaia ma bon akea temanna ae kamaiuia; a weeweteiko, ma bon akea te kaeka.

⁴³ I taobekaiia i buakon te tano, ao I kamanatuaia kaanga te bokaboka i nanon kawain nako nuukan te kaawa.

⁴⁴ Ko kamaiuai mairouia au aomata aika a taningamatoa ao Ko karaoai b'a te tia kairiiri irouia botannaomata ianena, aika a riki ngkai b'a au tia m'akuri.

⁴⁵ A ongotaeka ao a kawakawa n roko nako iu.

⁴⁶ E a tia ni mauna nako korakoran nanoia ao a roko ma te ruru man aia nono nako.

⁴⁷ Ko boni maiu te UEA! N na neboiko! Bon au b'a Ngkoe ae e korakora. N na neboiko i bukin am m'akuri ni kamaiuai.

⁴⁸ Ko ira taangau, ao ko kaaki botannaomata nako i aani m'aakau.

⁴⁹ Ko kaawakinai man aia tiritiri au kairiribai, ao Ko karaoai b'a N na korakora riki nakoia ni kabane.

⁵⁰ N na neboiko, te UEA, ao N na neboiko i buakoia botannaomata nako.

⁵¹ Ko anga taian tokanikai aika a mimitong nakon am uea ae e rineaki. Bon akea tokin am kakaonimaki nakon Tawita ao i bukiia ana kariki n aki toki.