2.Tamuera 21 - Te B'aib'ara

Kabaean Roroaia Ana Kariki Tauro Irouia Kaain Kibeon

¹ Bon tenua taian ririki aike akea iai kanaia te botannaomata ae Iteraera n ana tai n uea Tawita. Ma ngaia are, e buubutiia te UEA teuare Tawita buokaia, ao E kaeka te UEA ni kaangai, “E bure Tauro ma ana utu i bukin te tiriaomata, i bukina ngke e tiringiia kaain Kibeon.”

² Bon tiaki Iteraera kaain Kibeon; b'a bon ana kariki Amora. A tia Iteraera ni berita b'a a na aki tiringiia, ma e a tia Tauro ni kataia n tiringiia i bukina ngke e tangira Iteraera ma Iuta n taua aron te aba ni kabane. Ao e weteia kaain Kibeon Tawita ni maroroo ma ngaia.

³ Ao e taku, “Tera ngkai te b'ai ae N na karaoia ni karaoa mwiin ana m'akuri Tauro, b'a kam aonga ni butiia te UEA b'a E na akoia riki ana aomata?”

⁴ Ao a kaeka kaain Kibeon ni kaangai, “E bati n tau naba taian tirewa ma taiani koora mairoun Tauro ma ana utu i bukin anne. Ao n iterana riki teuana ti bon aki katauaki n tiringiia riki Iteraera.” Ao e taku Tawita, “N na karaoa te b'ai ane kam buubuti iai.

⁵ Ao a kaeka ni kaangai, “E kataia Tauro n tiringiia ara aomata ni kabane, b'a e aonga n akea temanna ae e na tiku n te aba ae Iteraera.

⁶ Anganiira itiman mairouia ana kariki. Ti na kabaei roroaia m'aane aikai i rarikin te tabo are E taromauriaki iai te UEA i Kibea, are ana kaawa Tauro, are e rineia te UEA b'a e na uea.” Ao e taku Tawita, “N na anganingkami.”

⁷ E a tia ni karaoa ana berita Tawita nakon Ionatan ao te UEA te tia kakoaua, ma ngaia are, e nanoangaa natin Ionatan are Mebiboteta, tibun Tauro te m'aane.

⁸ Ma iai natin Tauro ma Nei Ritiba are natin Aia te aine, aika uoman m'aane aika araia Aremoni ao Mebiboteta. Bon iai natin Tauro te aine are Nei Meraba aika niiman m'aane aika tamaia bon teuare Ateriera are natin Baretirai mai Meora. E anaiia natin Nei Ritiba ake uoman ao natin Meraba ake niiman

⁹ ao e anga ngaiia nakoia kaain Kibeon, ake a anaiia ni kabaei roroaia i aon te maunga ni kaan ma te tabo are taromauriaki iai te Atua. E riki aei ni moan taian te b'aare.

Kaawakinan Rab'ataia Iroun Nei Ritiba

¹⁰ E taakin taian kunnikai aika a mangaingai i aon te b'aa ake i rarikina. E aki tangiria mannikiba b'a a na tikubara i aoia ma i nanon te ngaina, ao e kakionakoia maan aika a aki manana n te tairiki. E tiku ikekei mani moan rokon tain te tai ni karokoa e a tabe ni kakarau.

Taunakin Rab'atan Tauro Ma Ana Kariki

¹¹ A tiringa Tauro kaain Biritia ngkoa ma natina are Ionatan n te Maunga are Kireboa ao a kabaei roroaia i nuukan te kaawa are Beta Tian.

¹² A tia kaain te kaawa are Iabeti i Kireata ni karabaa ni uota nako rab'ataia, ma e ongo Tawita te b'ai are e tia ni karaoia buun Tauro, ao e nako ni kawariia taan kairiiri i Iabeti b'a a na anaa riin Tauro ma natina are Ionatan.

¹³ E anai riia Tawita nakon aban Beniamin ao e taun n ruun rarikin ruanimateia ana utu Tauro.

¹⁴ Ao i mwiina, e anga ana taeka i bukin riia m'aane ake a tia ni kabaeaki roroaia b'a a na taunaki naba ikekei. Ao e karaoaki nanon arei, ao E kaekai taian tataro te Atua ni kakab'aia te aba.

Ana Kariki Rebaim

¹⁵ Ao e a rangi ni kua Tawita n te tai teuana ngke e tabe ma ana tautia ni buakaniia kaain Biritia.

¹⁶ Iai temanna tautian Biritia ae arana Itibibenoba, ae kanoan Rebaim, ae e kataia n tiringa Tawita. Bon iai ana kabaang Itibibenoba ae e boou, ae bon ti ngaia ae e kaaniia tenua ma te iterana te kirokuraem rawawatana.

¹⁷ Ma e roko Abitiai are ai natin Tawita, are tarin Ioaba ni buokia n tiringa kaain Biritia arei. Ma a tua ana tautia Tawita ni kangai, “Ti a aki kariaia b'a ko na manga ira te buaka! Ko na anga te oota nakon ara botannaomata, ao ti tangira te oota anne b'a e na teimatoa n ura.”

¹⁸ Bon iai riki te buaka ma kaain Biritia i Koba, ike e tiringaki iai ana kariki Rebaim ae arana Taba iroun Tibekai mai Utia.

¹⁹ Ao iai riki te buaka ma kaain Biritia i Koba. Te tautia temanna ae arana Ereanan, e tiringa Koria mai Kata, are ti te bo buuburan ana kainiwai ma bitin te b'ain raranga kunnikai. Aran taman Ereanan bon Iari ae kaain Betereem.

²⁰ Ao iai riki naba te buaka teuana ma kaain Biritia i Kata. Iai temanna te tautia ae kanoan Rebaim. E bon rangi ni korakora kaanga te aintoa ao boni kakaonoua tabon baina i aoni baina ni kauaai ao kakaonoua naba taboni waena i aon waena ni kauaai.

²¹ Ma ngke e b'ainingareia Iteraera, e a tiringaki naba iroun ai natin Tawita te m'aane ae Ionatan. Ionatan bon natin tarin Tawita are Timei.

²² A tiringaki m'aane aikai ake ana kariki Rebaim mai Kata irouia ana tautia Tawita.