2.Tamuera 19 - Te B'aib'ara

¹ Ao iai ae e tuanga Ioaba ni kaangai, “E tang te uea i bukin maten Abetarom.”

² Ao a ongo ana taanga ni buaka Tawita ae e tang i bukin maten natina te m'aane, ao e ti bitaki naba aia bong n tokanikai nakon te bong n nanokawaki.

³ Ao a karaba n roko te taanga ni buaka arei i Maanaim, kaanga aron ae a biri nako ma n te buaka b'a a mamaa.

⁴ E taua baina Tawita i aon matana ao e tang n takaarua ni kaangai, “Natiu, ae Abetarom! Abetarom, natiu, natiu!”

⁵ Ao e nako Ioaba nakon te auti are e mena iai Tawita ao e taku nakoina: Ko a tia ni kamamaaia am tautia! A aki ti kamaiuko ma a bon kamaiuia naba natim m'aane ma natim aine ao ai uana naba ma buum nako.

⁶ Ko karaoa riki ae e raoiroi nakoia am kairiribai nakoia aika raoraom nako. Ko kaotia nakoia am aobitia nako ma am tautia b'a akea manenan te b'ai ae tia ni karaoia nakoim. Ko kukurei riki ngkana e maiu Abetarom, nakon ae ti na bane ni mate ma raora nako.

⁷ Teirake ngkai! Otinako ao kaaitauia i bukin te b'ai ae a tia ni karaoia. I tuea n aran te UEA b'a bon akea te m'aane temanna ae e na tiku n am itera ni ingaabongin te ingabong. Tao iai ngkoa am kangaanga n taai aika a b'aka nako, ma e na rangi ni buakaka riki aei nakon ae a tia n riki nakoim!

⁸ Ao e teirake Tawita ao e nako nakon mataroan te kaawa ao e tekateka. Ao ngke a ongo aomata ae e a tekateka ikekei, a bane n roko n nooria. Ao ngke a bane n okira mwengaia tautian Iteraera,

Kaokan Tawita Irouia Kaain Iteraera ma Kaain Iuta

⁹ ao a bane ni ngurengure aomata nako i Iteraera. A taetae i marenaia ni kaangai, “E kamaiura Tawita mairouia kaain Biritia ao mairouia ara kairiribai nako.

¹⁰ Ma ti a manga rinea Abetarom b'a ara tia kairiiri, ao ti kanakoa Tawita man te aba. E a mate Abetarom n te buaka, ao e aera ngkanne ngkai ti a aki kaoka Tawita?”

¹¹ Ao ngke e ataa te b'ai are a tataekinna Tawita, e a kanakoa te rongorongo nakon Tatoka ao Abiata ake taiani ibonga. E taku: Taetae nakoia taani kairiiri i Iuta ni kaangai, “E aera ngkai ai ti ngkami te nikira ni baronga ae e tuai kaoka Tawita nakon mwengana?

¹² Bon tarimi, bon ami koraki! E aera ngkai kam tuai karaoa te b'ai teuana ae e na oki iai nakoimi?”

¹³ Ao tuanga Amatia ni kaangai, “Bon ai natiu ngkoe, ao E na riki te Atua b'a te tia kakoaua b'a I tuea b'a N na karikiko b'a au kam'aanta n onea mwiin Ioaba.”

¹⁴ Ao n te tai ae e aki maan, ao a bane te baronga are Iuta n raona Tawita, ao a kanakoa te rongorongo aei nakoina, “Nako mai ooki, ao kairiia am tautia.”

Okin Tawita Nako Ierutarem

¹⁵ Ao e oki Tawita, ao ngke e a roko n te Karaanga are te Ioretan e a kaitibo ma kaain Iuta. A bootaki i Kirekara ao a roko b'a a na buokia n ri nanon te karaanga.

¹⁶ Ao raoia naba teuare Timei are natin Kera ikekei. E a tia ni kawaekoaa mai Baurim b'a e na kaaitibo ma Tawita. Timei bon kaain te baronga are Beniamin, ao

¹⁷ a iria tengaa kaain te baronga are Beniamin ake tekorakina. E roko naba n te Karaanga are te Ioretan Tiba are mataniwiia ana taani m'akuri ana utu Tauro. E ri nanon te karaanga ma natina m'aane ake tengaun ma niiman ao uangaun ana taani m'akuri ni kawara Tawita.

¹⁸ Ao i mwiina, e kairiia ana utu Tawita ri aon te karaanga, ao a karaoi b'aai ni kabane ake e tangiria b'a a na karaoia. E ri nanon te Karaanga are te Ioretan Timei ao e boobaraaki i matan Tawita.

Kaaitiboon Timei ma Tawita

¹⁹ Ao e taku, “Te uea ae ko karineaki, I butiiko b'a ko na aki katuaeai! I butiiko b'a ko na m'aninga b'aai nako ake I karaoi ngke ko kiitana Ierutarem. Ko na bon aki ururing.

²⁰ I ataia b'a I bon bure. Ao bon anne bukina ngkai I tangiria b'a N na riki b'a te moan aomata ngai mairouia kaain barongan meaang ni kaaitibo ma ngkoe.”

²¹ Ma e takaarua Abitiai are natin Teruia ni kaangai, “Ko na bon riai n tiringaki b'a ko kamaraiaa te uea ae E rineaki iroun te UEA!”

²² Ao e taku Tawita, “Abitiai, tera ae n na riai ni karaoia ma tarim ane Ioaba? Ngkami taan tuangai b'a antai ae e kaairua? I a tia n rineaki b'a aia uea Iteraera ni kabane n te bong aei, ao bon akea temanna ae e na tiringaki!”

²³ Ao i mwiina, e tuanga Timei b'a e na aki tiringaki.

Kaaitiboon Tawita Ma Mebiboteta

²⁴ Ao e kaaitibo naba ma Tawita Mebiboteta are tibun Tauro te m'aane. E a tia n aki kakaitibo ma Tawita n te tai ae e maan n te aro are e tuai man tebotebo ke ni koreaki buaina ke ni uaati kunnikaina man te tai are e nako iai Tawita.

²⁵ E roko Mebiboteta n noora Tawita i mwiin okiia nako Ierutarem, ao e titirakinna Tawita ni kaangai, “E aera ngkai ko aki irai?”

²⁶ Ao e kaeka ni kaangai, “Te uea ae ko karineaki, ko ataia ae I aki konaa n nakonako. I tuanga au tia m'akuri b'a e na katokaai i aon te aati b'a I aonga n iriko. Ma e kiitanai au tia m'akuri, ao e

²⁷ e karaoa taekau nakoim n te aro ni kewe, ma ko bon wanawana kaanga aneran te Atua, ma ngaia ae ko na karaoa te b'ai ane ko bon taku b'a e raoiroi.

²⁸ Ma e ngae n anne, ao ko riai n tia n tiringiia au utu ni kabane ma ngai, ma ko aki b'a ko a manga kam'arakeai n am taibora. Te uea ae ko karineaki, tera riki ae N na buubuti iai?”

²⁹ Ao e kaeka Tawita ni kaangai, “E a bati n tau am taetae ni kawai! I a tia n iangoia b'a N na tib'aa te aba imarenam ma Tiba.”

³⁰ Ma e kaeka Mebiboteta ni kaangai, “E konaa n anai ni kabane! I nang kukurei ngkai ko a okira mwengam ma te maiu.”

Okin Baretirai Nakon Mwengana

³¹ Ao e roko Baretirai mai Rokerim i Kireata b'a e na kaaitibo ma Tawita n te Karaanga are te Ioretan ma n ri nanon te karaanga ma ngaia.

³² Ai wanibwi ana ririki ni maiu Baretirai. E rangi ni kaub'ai ao e a tia ni kanakoa te am'arake nakon Tawita i Maanaim.

³³ E taku Tawita nakoina, “Ko na ri nanon te karaanga ma ngai nako Ierutarem. N na kaawakiniko.”

³⁴ Ao e kaeka Baretirai ni kaangai,: Te uea ae ko karineaki, e aera ngkai N na nako Ierutarem? E aki rangi ni maan maiu b'a I a kara.

³⁵ Ai wanibwi au ririki ni maiu, ao e a rikirake rab'atau n aki namakinaaba. I a aki ataa kangkangin te am'arake ke n ongo karongoaan te anene, ai bon akea bonganau b'a N nang riki b'a te b'ai ni katabetabe.

³⁶ N na ri nanon te karaanga ma ngkoe, ma N na aki konaa ni kararoa te kawai n te itera are teuana. Ko riai n aki rangi ni kabanea am tai n akoai.

³⁷ Ti te b'ai ae ko na karaoia nako iu, ko na ti kaokai nakon oin au kaawa, are N na manga taunaki iai i rarikin tamau ma tinau. E na konaa n iriko au tia m'akuri ae Kimam, ao ko konaa ni karaoa nakoina ae kaanga oin am tia m'akuri.

³⁸ Ao e taku Tawita, “N na kaira Kimam, ao N na karaoi b'aai nako akana ko tangiria b'a N na karaoia nakoina. Ao ngkana iai riki te b'ai ae N na karaoia, N na karaoia naba.”

³⁹ Ao a ri nanon te karaanga ana tautia Tawita, ngke e tiku Tawita b'a e na kaboo ma Baretirai ma ni katekeraoia. Ao e oki Baretirai nakon mwengana,

⁴⁰ ma e waaki nako Kimam n ri nanon te karaanga ma Tawita. A bane ni mena ikekei ana taanga ni buaka Iuta ao iteraia ana taanga Iteraera b'a a na buoka Tawita n ri nanon te karaanga.

Kauntaekan Iteraera Ma Iuta

⁴¹ A roko tautian Iteraera i rouna ao a taku, “E aera ngkai a karaba n anaiko ma am utu ma am tautia i aon te Ioretan am koraki ni I-Iuta?”

⁴² Ao a kaeka kaain Iuta ni kaangai, “E aera ngkai kam rangi n un? Bon ana koraki te uea ngaira. E aki anganiira te am'arake, ao akea naba te b'ai ae e anaia mairoura!”

⁴³ Ao a taku ake mai Iteraera, “Bon ara b'ai te uea ae Tawita tebwiina okiokin b'ainakina iroumi. E aera ngke kam aki kainanoa buokami mairoura? Ao bon ngaira ae ti moan iangoa kaokan Tawita!” A buakaka riki aia taeka kaain Iuta nakoia Iteraera.