2.Tamuera 17 - Te B'aib'ara

¹ Ao e taku Aitobera nakon Abetarom: Ko na kariaia b'a N na rineia tebwi ma uoua te ngaa te m'aane b'a a na buakana Tawita n tairiki,

² ngkana e a kua ma ni b'ara nanona. Ane e na aki reke ana tai, ao a na bane ni biri nako raona. Akea temanna ae N na tiringnga b'a ti Tawita,

³ ngkai bon ti anne te aomata ae ko iangoa aron matena. Ao N na manga kaokiia botannaomata ni kabane nakoim kaanga te kabae te aine ae e a okira raona. E na aki teirake te kamangao imarenaia aomata ma te tautaeka n te aro aei.

Kababaan Abetarom Iroun Utiai

⁴ Ao e kukurei Abetarom ma taani kairiiri ni kabane man barongan nako Iteraera n ana iango Aitobera ma ana kawai.

⁵ Ao e taku Abetarom, “Kairamai Utiai are kaain Arekaite. Ti na ongo b'a tera ae e na taekinna.”

⁶ Ao e rin Utiai, ao e tuanga Abetarom ana iango Aitobera. Ao e taku Abetarom, “Ti na karaoa ae e taku ke ti na aki? Ao ngkana arona b'a ti na aki karaoa are e taku, ko konaa ni kakaaea riki am iango ae e raoiroi riki?”

⁷ Ao e taku Utiai: E rangi n tamaroa ana iango Aitobera n te tai aei.

⁸ I ataia b'a bon taani buaka raoi am koraki ni m'aane. Ti te bo ngkai ngaiia ma te tina ni bea ae e a tia n tiringaki natina. I rarikin anne, e bon rangi ni m'aiti taiani buaka aika e a tia n irii, ao ane e na bon aki konaa ni katairaa ma tabem'aang.

⁹ E na bae n tia ni karabaa n te nangananga ni b'aa ke n taabo tabeua. N te tai are a ongo iai b'a a tia n tiringaki am tautia, ao ane a taku aomata nako b'a e mate te taanga ni buaka ae b'anin.

¹⁰ Ma ngaia are, ngkana ko ninikoria kaanga te raian ma e na bon bua naba ninikoriam. A bane n ataia aomata b'a bon te tia buaka ae e korakora tamam ao te tautia ae e ninikoria.

¹¹ Aio au iango, ko na bootia m'anen Iteraera man te kaawa are Taan i meaang rikaaki nakon te kaawa are Beerateb'a i maiaki. Ko na kam'aitiia riki am tautia nakon tanon mataniwiin te bike. Abetarom, ko na kairiia boni ngkoe,

¹² ao ti na bane ni buakana Tawita n te tabo are e mena iai. Ti na b'akaria kaanga te aoi ae rabuna aon te tano. Ao e na mate ma ana tautia ni kabane!

¹³ Ngkana arona b'a a nako n rin n taiani kaawa aika a oonaki, ti na manga kabaea oon te kaawa anne ma ni uaakinna nako nanon te karaanga.

¹⁴ Ao a kukurei riki Abetarom ma aomata nako n ana iango Utiai nakon ana iango Aitobera. E riki aei b'a E karaoa ana iango Aitobera te UEA b'a e na aki b'ai b'a e aonga n reke te kangaanga nakon Abetarom.

Tuangan Tawita Te Rongorongo Irouia Ionatan Ao Aimaati

¹⁵ Ao e m'ananga Utiai ni kawara Tatoka ma Abiata. E kaongoa ana iango Aitobera are e a tia n angan Abetarom ma taani kairiiri i Iteraera. E bon tuangiia naba ana iango are e anganna.

¹⁶ Ao i mwiina, e taku, “Kawaekoako! Kanakoa temanna b'a e na kauringa Tawita b'a e na aki tiku ni kangainaa n iteran te karaanga, b'a a kaawa ni kabuanib'ai ma raona!”

¹⁷ Ao a nako n tataninga Ionatan ma Aimaati i rarikin te koburake n ran i Rokera b'a a ribaa norakiia i Ierutarem. Ao e nakon te koburake n ran te aine ae te tia m'akuri ao e anganiia te rongorongo are a na kaongoa Tawita.

¹⁸ Ma a nooraki iroun te ataeinaine ae e uarereke ao e nako n tuanga Abetarom. Ma ngaia are, a kawaekoaia n nako Ionatan ma Aimaati nakon ana auti te m'aane temanna ae e maeka i Baurim. Ao a ruorikaaki nako nanon te m'anib'a ae e mena n te tabo teuana ae e uki.

¹⁹ E rabuna te m'anib'a arei buun te aomata arei ao e kab'aroa te uita i aona, b'a e aonga n aki nooraki te m'anib'a arei.

²⁰ Ao a roko ana tautia Abetarom nakon te aine arei ao a titiraki ma te b'anaa ae e matoa ni kaangai, “A ngaa Aimaati ao Ionatan?” Ao e taku neierei, “A ri nanon te karaanga are e uarereke arei.” Ao a nako tautia akekei ni kakaaia m'aane ake uoman akekei. Ma a bon aki roko irouia, ao a okira Ierutarem.

²¹ Ao ngke a nako tautia akekei, ao a tam'arake n otinako man te m'anib'a. Ao a nako ni kawara Tawita ao a taku, “Kawaekoako! Katauraoiko n ri nanon te karaanga!” Ao a tuangnga ana iango Aitobera.

²² Ao e katauraoia Tawita ma raona ao a ri nanon te karaanga are te Ioretan. Ao ngke e a oti taai, a bane ni mena n iteran te karaanga are te iterana.

Tiringakin Aitobera i bon Irouna

²³ Ao ngke e nooria Aitobera b'a a aki ira ana iango Abetarom ma taani kairiiri i aon Iteraera, ao e tokara ana aati ao e okirikaaki nakon mwengana i Kiro. E tuangiia ana utu ma ana taani m'akuri te b'ai ae e nang karaoia. Ao i mwiina, e kabaea roroana i bon i rouna, ao a tauna rab'atana n te ruanimate are ana b'ai ana utu.

²⁴ E nako Tawita nakon te kaawa are Maanaim, ao e ri aon te Karaanga are te Ioretan Abetarom ma ana taanga ni buaka Iteraera.

²⁵ E katokaa Amata Abetarom b'a onean mwiin Ioaba are te kam'anta n te taanga ni buaka. Taman Amata bon Itera are man ana utu Itimaera, ao tinana bon Nei Abikaira, are natin Naati te aine, are tarin tinan Ioaba are Nei Teruia.

²⁶ A katea aia kaemb'a Iteraera ake a na koraki Abetarom n aonon Kireata.

Uotakin B'aai Nakon Tawita Mairouia Raoraona

²⁷ I mwiin rokon Tawita n te kaawa are Maanaim, ao a roko Tiobi are natin Naati te m'aane mai Rab'a i Ammon, Makira are natin Ammiera te m'aane mai Roteb'a, ao Baretirai are kaain Kireata mai Rokerim.

²⁸ Ao aikai m'aitin b'aai ake a uoti:

²⁹ Taiani kie ni matu, burangketi, boora, tiaeki n tano, taiani uita, taiani b'aare, te buraawa, te uita ae e tinimaki, taiani biin, taian rentire, ana karewe te manibeeru, te b'ata, te tiibu, ao te tiiti. A uota te am'arake i bukin Tawita ma raona i bukina ngke a ataia b'a a bane ni baki, ma ni kua, ao a taka i mwiin te mena n te rereua.