2.Tamuera 15 - Te B'aib'ara

E kaira Te Kamangao Abetarom ni kaitaraa Tawita

¹ Tabeua te tai i mwiina, e karekea ana kanibuaka Abetarom ao te aoti are e na katikitikia, ao e karekeia nimangaun te m'aane aika a biribiri i moana.

² E ututi n te ingabong koraki ao e tataninga i rarikin te kawai are e nako nakon mataroan te kaawa. A bane n tootoua te kawai anne aomata ake iai tangitangiia iroun te uea, ao e butim'aia Abetarom n tatabemaniia nako ao e titirakiniia ni kaangai, “Ko nako mai ia?” Ma ngkana a kaangai aomata, “I nako man barongan meaang,”

³ Ao e kaangai Abetarom, “Nooria, a rangi n raoiroi tangitangim ma ngurengurem, ma akea ae e tauraoi n ongoraeakinna.

⁴ I tangiria ngai b'a N na rineaki b'a te tia moti ikai! N na bon karaoa ae e eti nakoia aomata nako.”

⁵ Ma ngaia are, a bane ni bobaraaki aomata ni kabane ake a roko ni kawara Abetarom, ao ngaia, e kanakoa baina n rab'atiia ao ni kiiti ma ngaiia.

⁶ Ao ai anne arona nakoia Iteraera ni kabane ake a na nikiri tangiia ma ngurengureia iroun te uea. Ni karokoa a bane aomata i aon Iteraera n tangira riki Abetarom nakon Tawita.

⁷ Aua te ririki i mwiina, e a taku Abetarom nakon Tawita, “I butiiko b'a ko na kanakoai nako Eberon. N na kakoroa bukin au berita nakon te UEA,

⁸ ngke I maeka ngkoa ma kaain Aram i Keturi. I berita b'a N na taromauria te UEA i Eberon ngkana E kaokai nako Ierutarem.”

⁹ Ao e kariaia Tawita, ao e a nako Abetarom nako Eberon.

¹⁰ E kairiia uabubua m'aane mai Ierutarem b'a a na raonna, ma a aki ataa te b'ai ae e nang karaoia.

¹¹ E anga karea Abetarom i Eberon, ao e kanakoa ana tia iango Tawita are Aitobera b'a e na roko.

¹² Ao a roko riki aomata aika a m'aiti ni kaakawara Abetarom ma ni uataboa ana iango ni kam'arua. I nanon taai akanne, e a tia ni karaba ni kanakoa te tia uarongorongo b'a e na tuangiia aomata ni kabane ni kaangai, “Ngkana kam ongo tangin te buu ao kam na bane n takaarua ni kaangai, ‘E a uea ngkai Abetarom i aon Eberon!’ ”

Kiitanakin Ierutarem Iroun Tawita

¹³ Ao e roko te tia uarongorongo ao e tuanga Tawita ni kaangai, “A bane Iteraera ni mena n ana itera Abetarom!”

¹⁴ A bane ana mataniwi Tawita i Ierutarem ma Tawita, ao e tuangiia ni kaangai, “Ti a oti nako mai ikai! Ti na kawaekoa ni kiitana ikai, b'a e kaawa n aki reke birinakora mairoun Abetarom. Kawaekoa! Ane e na kawiaira ikai ngkana e kawaekoa. Ao e na tiringiira ma kaain ara kaawa ni kabane.”

¹⁵ Ao a taku ana mataniwi, “Ti na karaoi b'aai ni kabane akana ko taekin.”

¹⁶ Ao e katikuia buuna Tawita ake tengaun b'a a na tararua te bareti,

¹⁷ ma e kairiia nako kaain ana utu ni kabane ma ana mataniwi ao ana tautia. Ao a tei n te auti teuana ae te kabanea mai tabon te kaawa.

¹⁸ E tei Tawita ikekei n taraia ana taanga ni buaka ma ana taan tararuaia ake a tabe ni m'ananga rimwiia. Taiani kabane ni kurubu bon tautia ake onobubua ake a iria mai Kata. Aia kam'anta bon Itai.

¹⁹ Ao e taku Tawita nakon Itai, “Bon te iruwa ngkoe man te kaawa are Kata. Ko riai n aki kiitana am tabo kaanga ngaira. Naako oki n raona am uea!

²⁰ Ko na kangaa n irai, ao ko tuai rangi ni maan ma ngai, ngkai I tuai ataia b'a N na nakea ngai? Kairiia am tautia ao ooki. Au tataro b'a E na akoiko te UEA ma ni kakaonimaki nakoim.”

²¹ Ao e kaeka Itai ni kaangai, “Te Uea ae ko karineaki, I tuea n aran te UEA ae e maiu, b'a N iriko n taabo nako ike ko nako iai, e ngae ngkana tao tera ae e na riki nako iu iai.

²² Ao e taku Tawita, “Ao nako mai!” Ma ngaia are, a ira Tawita Itai ma ana m'aane ni kabane ma aia utu.

Kaokakin Te Atiniberita Iroun Tawita Nako Ierutarem

²³ Ao a bane n tang kaain Ierutarem ngke a m'ananga Tawita ma aomata ake iria rirarikiia i aoni kawaia n nako. E kairiia Tawita ri nanon te M'arua are Kiteron ao n te kawai nakon te rereua.

²⁴ Ao a iri naba te ibonga are Tatoka ao Abiata n reitaki ma m'aane tabeman ma n te baronga are Rewi ake a uouota te Atiniberita. A katuka te Atiniberita, ao a katikua ikekei ni karokoa otinakoia ni kabaneia Tawita ma taan iria man te kaawa arei.

²⁵ Ao e taku Tawita: Tatoka, kaoka te Atiniberita nako Ierutarem. Ngkana arona b'a e kukurei te UEA irou, ao e na manga kaokai b'a N na manga konaa n nooria riki ma Ana autinrianna.

²⁶ Ma ngkana arona b'a E taku b'a E a aki kukurei irou, ao ke E karaoa ane E taku b'a te kabanea n tamaroa.

²⁷ Tatoka, bon te tia moti ngkoe ae ko tamaroa i aon b'aai nako, ma ngaia are, ko na oki nakon te kaawa ao ko na aki karekea te kangaanga. Kaira natim te m'aane are Aimaati ma ngkoe. E na oki naba Abiata ma natina te m'aane are Ionatan.

²⁸ N na kakantaningaiko n te karaanga are i akuun te rereua ni karokoa I ongora mairoum.

²⁹ Ao e anaa te Atiniberita Tatoka ma Abiata ni kaokia nako Ierutarem ao a tiku ikekei.

³⁰ Ao e waaki nako Tawita nako karaabeen te Maunga are Oriweta. E bon aki kaunna ao e tang, ao e karabaa atuuna ni kaota rawawatana. Ao a bane n tang ake iria, ao a rabuni naba atuuia.

³¹ Ao e tuanga Tawita temanna ni kaangai, “E buoka Abetarom Aitobera ni baairea aron tiringakim!” E taku Tawita, “Taiaoka te UEA tai kam'akura ana babaire Aitobera!”

E kaokarikaaki Tutiai Tawita b'a te tib'aai

³² Ao ngke e roko Tawita i taubukin te maunga are Oriweta, ao e kaaitibo ma Tutiai are kaain Areka n te tabo n taromauri, E raeuaaki niiniiran Tutiai, ao e toka te baareka i aon atuuna.

³³ Ao e tuangnga Tawita ni kaangai: Ngkana ko irai, ao ko na kawaeremweira.

³⁴ Naako okira te kaawa ao tuanga Abetarom ni kaangai, “Te Uea ae ko karineaki, am tia m'akuri Ngai. N na m'akuri i bukim ngkai, n arou ngkoa naba ngke I m'akuri naba iroun tamam.” Ngkana ko kona ni karaoa anne, ao ko na kona naba ni kamangaoa ana iango nako Aitobera.

³⁵ A na mena ikekei Tatoka ma Aitobera ake taian ibonga, ao ko konaa n tuangiia b'aai ni kabane ake ko ongo man te bareti.

³⁶ Ao i mwiina, a na konaa ni kanakoa natiia te m'aane are Aimaati ao Ionatan n tuangai te b'ai are ko a tia n ongo.

³⁷ Ao e okirikaaki ana tia i buobuoki Tawita are Tutiai nako Ierutarem, n te tai naba are e roko iai Abetarom.