2.Tamuera 11 - Te B'aib'ara

Tawita Ma Nei B'atateb'a

¹ E a kaan banen bongin te aumeaang, bon taai are a naanako iai taian uea ni buaka. E kanakoa ana taanga ni buaka Iteraera ae e b'anin i aan ana kairiiri te kam'anta are Ioaba ma ana aobitia. A kamaunaa ana taanga ni buaka Ammon ao a otab'aninia atuun kaawan te tautaeka are Rab'a, ma e tiku Tawita i Ierutarem.

² N te tanimaeao n taai teuana, E teirake Tawita ma ni matuuna ae e uarereke ao e nanakonako i aon taubukin ana bareti.

³ Ao iai te aine ae e tebotebo inano n ana katawanang, b'a e kaitiaki ni kaineti ma tuan taromaurian te Atua.

⁴ E nooria Tawita, ao e kanakoa temanna b'a e na nooria b'a antai. E oki rikaaki te tia m'akuri arei, ao e tuangnga ni kaangai, “Teuae ko karineaki, bon Nei B'atateb'a. Bon natin Eriam te aine are buun Uria are kaain Eta.” Ao e kanakoa ana rongorongo Tawita nakoina b'a e na nakon te bareti. Ao e roko neirei nakoina, ao e matu ma ngaia. Ao i mwiina, e a okira mwengana.

⁵ Tabeua te tai i mwiina, e a ataia neirei b'a e a bikoukou, ao e kanakoa temanna nakon Tawita ma te rongorongo ae e kaangai, “I a bikoukou!”

⁶ Ao e a kanakoa te rongorongo Tawita nakon Ioaba ae e kaangai, “Kanakomaia Uria are kaain Eta nako iu.” Ao Ioaba, e kanakoa Uria

⁷ nakon ana bareti Tawita, ao e titirakinna Tawita ni kaangai, “E uara Ioaba, e marurung? A uara kaain te taanga ni buaka? Ao e uara te buaka?”

⁸ Ao i mwiina, e taku Tawita nakon Uria, “Nakon mwengam ni kaitiakiko.” Ao e kiitana ana bareti te uea Uria, ao e kanakoa te am'arake Tawita nakon ana auti Uria.

⁹ Ma e aki nakon mwengana Uria, ma e matu i tinanikun ana bareti te uea ike a mamatu iai ana taan tei te uea.

¹⁰ Ao iai ae e tuanga Tawita, ae e aki nakon mwengana Tawita. Ma ngaia are, n te ingabong are i mwiina, e titirakinna te UEA ni kaangai, “E aera ngkai ko aki nakon mwengam, ao ko tuai man okiokira mwengam n te tai ae e maan?”

¹¹ Ao e kaeka Uria ni kaangai, “E mena te Atiniberita ma ana taanga ni buaka Iteraera ma Iuta i nanon taian tawaana, n reitaki ma ara kam'anta are Ioaba ma ana aobitia ao ana taanga ni buaka. Ko bon iangoia b'a I riai ni kawara mwengau n am'arake ke ni mooi ao ni matu ma buu? I tuea i bon irou b'a N na aki karaoa anne!”

¹² E taku Tawita, “Tiiku i Ierutarem n te bong aei, b'a I a kaokiko nakon te ingabong.” Ao e tiku Uria i Ierutarem n te bong anne. Ao n te bong are i mwiina,

¹³ ao e kaoa Tawita nakon ana katairiki. Ao e am'arake Uria ma Tawita ao e mooi ni kakoroa, ma e bon aki nako naba nakon mwengana. E bon nako naba ni matu i aon te kie i rarikiia ana taan tei te uea.

¹⁴ Ni karangainan te ingabong are i mwiina, e korea ana reta Tawita ao e tuanga Uria b'a e na anga nakon Ioaba.

¹⁵ E kaangai kanoan te reta arei, “Kaaki Uria i moan te taanga ni buaka are e korakora te buaka iai. Ao i mwiina, ko na kaokiia taani buaka mai rarikina, b'a e aonga n ikoaki ma ni mate.”

¹⁶ E a tia Ioaba ni karaua n taraa te kaawa are Rab'a, ao e kaaki n te tabo are e ataia b'a a mena iai aia tautia kairiribai aika a bane aroia.

¹⁷ Ao ngke a otinako m'anen te kaawa arei, a buaka ma n tiringiia tabeman ana tautia Tawita-Uria are kaain Eta bon temanna naba mai buakoia.

¹⁸ Ao e kanakoa te tia uarongorongo Ioaba n tuanga Tawita b'aai ni kabane ake riki i nanon te buaka.

¹⁹ E angan te tia uarongorongo taeka aikai: Ngkana ko tia n tuangnga rongorongon b'aai nako te uea ake a riki i nanon tain te buaka,

²⁰ ao ane e na un ao ane e na kaangai, “E aera ngkai kam buaka ao kam rangi ni kaaningkami ma te kaawa? Kam ataia ae a na katebe man te oo?

²¹ Kam ongongo ngkoa rongorongon maten Abimereka are natin Kiteon i Tebeti? Kam aki ataia b'a e mate ngkoa iroun te aine are e kab'aka te atiibu ae e buubura mai aon taubukin oon te kaawa? Ao i mwiina, ko na tuangnga b'a temanna mai buakoia ana tautia ake a mate bon Uria are kaain Eta.”

²² Ao e nako te tia uarongorongo arei ni kawara Tawita ao e taekin b'aai ni kabane ake e tuangnga Ioaba.

²³ Ao e taku, “A kakioira ara kairiribai man oon te kaawa nako tinaniku nakon taian tawaana, Ma ti a manga kamumuniia ni kaokiia ni karokoa mataroan te kaawa.

²⁴ Ao a manga katebeira n aia kanoa ni katebe i aon oon aia kaawa. Iai tabeman am tautia aika a mate ao temanna mai buakoia bon Uria are kaain Eta.”

²⁵ Ao e kaeka Tawita ni kaangai, “Tuanga Ioaba ao e na aki kab'araa nanona n te b'ai ae e riki. Bon akea ae e konaa n ataia b'a antai ae e na mate n te buaka. Tuanga b'a e na kakorakoraa ana buaka n eekaanako te kaawa ma ni kab'akai oona nako.

²⁶ Ao ngke e ongo Nei B'atateb'a ae e a tia ni mate buuna, ao e a tanginiwenei i bukina.

²⁷ Ao tabeua te tai i mwiin tokin tangina, e a kanakoa temanna Tawita b'a e na kairiia nakon te bareti. Ao e riki b'a buun Tawita, ao e riki natina te m'aane. Ao E un te UEA n te b'ai are e a tia ni karaoia Tawita,