2.Tamuera 1 - Te B'aib'ara

E kunea Tawita bukini Maten Tauro

¹ Ao e mate Tauro. Ao i nanon taai akanne, e a tia Tawita ni kataenikaia kaain Amareka ao e okirikaaki nako Tikeraka.

² Tenua te bong i mwiina, ao e roko te tautia man ana taanga ni buaka Tauro. A mangaingai kunnikaina, ao iai taian tano i aon taubukin atuuna. E nakon Tawita ao e katorobubua i matana.

³ Ao e titirakinna Tawita ni kaangai, “Ko nako mai ia?” Ao e kaangai te m'aane arei, “I nako man ana taanga ni buaka Iteraera. I kataia ni karekea birinakou n rawea maiu.”

⁴ Ao e titiraki Tawita ni kaangai, “Antai ae e tokanikai n te buaka?” Ao e kaeka te m'aane arei ni kaangai, “A rairaki ara taanga ni buaka ni biri nako, ma a bon m'aiti ake a ikoaki ao a mate. Ao a bon mate naba Tauro ma natina are Ionatan.”

⁵ Ao e titiraki Tawita ni kaangai, “Ko kangaa n ataia b'a e mate Tauro ma natina are Ionatan?”

⁶ Ao e taku te rorobuaka arei: I mena i aon te tabuki are Kireboa, ao I noora te uea are Tauro b'a e b'aka nako aon ana kainiwai. E kakioaki irouia ana kairiribai aika a aki rangi n raroa mai akuuna i aon aia kaanibuaka ao taan toka i aoia aoti.

⁷ Ngke e rairaki ao e noorai, ao e weteai b'a N na kawaria. I nako ni kawaria ao I titirakinna b'a tera ae e tangiria.

⁸ Ao e titirakinai ni kaangai, “Antai ngkoe?” Ao I kaekaa ni kaangai, “Kaain Amareka ngai.”

⁹ Ao i mwiina, e kaangai, “Tiringai! N na boni mate, ao I rangi ni maraki.”

¹⁰ Ma ngaia are, I a tiringnga. I ataia b'a e a bon rangi n ikoaki n te aro are e na bon aki reke maiuna. Ao I anaa ana baunuea ma ana burenibai, ao I a uoti nakoim, Teuae ko karineaki. Aikai baikai.

¹¹ Ao a raeuai aia kunnikai Tawita ma ana tautia i bukin rawawataia.

¹² Ao a tang ni kabongnga ao akea te b'ai teuana ae a kanna. Ao a bane n nanokawaki aomata i bukin natin Tauro are Ionatan, ao i bukiia naba ana aomata te UEA ake a mate n te buaka.

¹³ Ao e titirakina te rorobuaka arei Tawita ni kaangai, “Ko maeka ia?” Ao e kaeka te rorobuaka arei ni kaangai, “Bon kaain Amareka Tamau, ma ti maeka Iteraera.”

¹⁴ Ao e taku Tawita nakoina, “Ko kangaa n aki maaku n tiringa te uea ae e rineaki iroun te UEA?

¹⁵ Ao ko a manga taekina te b'ai are ko a tia ni karaoia.

¹⁶ Ngkai boon am bure, b'a ko na manga tiringaki!” Ao e taku Tawita nakon temanna ana tautia, “Nakomai tiringa te m'aane aei!”

Kunan Tawita Are Kanuringan Tauro

¹⁷ Ao e anenea te anene aei Tawita b'a kanuringan Tauro ao Ionatan,

¹⁸ ao e tuangiia b'a e na reireiniia kain Iuta ni kabane te anene aei. E arana te kuna aei b'a, “Tangin Te Kainikatebe”, Ao aei te kuna aei:

¹⁹ “N te tabuki are Iteraera, ao a wene ni mate am taani buaka, ao a b'aka am taani buaka aika a korakora!

²⁰ Kam na aki taekinna i Kata ke ni kabutanakoa rongorongona i nanon kawain te kaawa are Atikeron. Ane e na kukurei antin Biritia te aine ao e na kibakibarake ni kim'areirei.

²¹ Ko na aki kab'aka te aoi ke te karau i aon tabukin nako Kireboa. Ko na aki karikirakei taian uita n te tawaana i bukin karikirakean taian uita i bukin taian karea nakon te Atua. A takanana aia otanga taani buaka n taiani bokaboka, ao e a tiku oin ana otanga Tauro n aki karaneaneaaki.

²² E teke konan ana kanoanikatebe Ionatan ao a mate taani buaka. E korokoro ana kabaang Tauro ao e m'akoroua te kairiribai.

²³ E nang beebete karekean tangiraia Tauro ao Ionatan. A kaai ni maiu, a kaai ni mate, a biri m'aaka riki nakoia ikare ao a korakora riki nakoia taian raian.

²⁴ Ainen Iteraera, taang i bukin Tauro. E anganingkami te kunnikai ae e tamaroa ae e uraura ao te b'ai ni katamaroa ae e karaoaki n te koora.

²⁵ A tia ni b'aka ara taani buaka n te bobuaka ae e kabuebue, ao e wene ni mate Ionatan i aon tabukin nako Kireboa.

²⁶ Ionatan, I a aki manga nooriko! I tangiriko b'a kaanga tariu. Ko kaakaraoa raoi ae e raoiroi nako iu, ko kakaonimaki riki nakon te ainenum'a nakon buuna te m'aane.

²⁷ “A tia ni b'aka ara taani buaka, ao a uruaki aia b'ai ni buaka.”