2.Rongorongo 7 - Te B'aib'ara

Katabuan te Tembora Iroun Toromon

¹ Ao n te tai are e bane naba iai ana tataro Toromon, ao e b'aka te ai mai karawa ni kabuoka te karea. Ao e rina ni kaona te Tembora raneanean mimitongin te UEA,

² ao a aki konaa n rin nako taiani ibonga.

³ Ao ngke a noora te ai ma mimitongin te UEA te koraki n aomata arei, ao a katorobubua ao n taromauriia te UEA. A tataro ni kaangai: “E raoiroi te UEA, ao akea tokin ana tangira.”

⁴ Ao e katabua te Tembora Toromon ma aomata nakon te UEA n anga aia karea

⁵ aika 22,000 taiani kao ao 120,000 taian tiibu.

⁶ Ao a bane n teirake aomata i nanon tain te botaki. Ao a bane ni mena taian ibonga n aia tabo ake a tia n anganaki, ni katangi taian buu. A kaaitaraaki irouia kanoan Rewi, ni katangi taian b'ai ni katangitang ake e a tia ni karaoi Tawita b'a a na kamanenaaki i bukin neboakin te UEA i bukin ana tangira ae akea tokina.

⁷ Ao ni bon te bong naba arei, ao e katabua te katawanang Toromon are i matan te Tembora ao e katauraoia i bukin kabonganakina i bukin te taromauri. E bon rangi ni uarereke te baonikarea are te buraati are e a tia ni karaoia, ma ngaia are, e kabonganaa katawanangin te Tembora i bukin te anga karea are kakukureian te UEA ao te karea are te uita, n reitaki naba ma bubun nenean te man ni karea ake tabeua.

⁸ A bukamarua te Toa ae M'anganikaai Toromon ma aomata i nanon itiua te bong, ao a roko aomata man taabo aika a raroa man Karaangan Aikubita aika a m'auteretere i maiaki ao Rebo-Amata i meang.

⁹ Ao n te bong are i mwiina, ao a bane ni ikotaki aomata n taromauri. A tia ni bukamarua aia bootaki arei i nanon te maan ae tebwi ma aua te bong, ao itiua te bong i bukin katabuan te baonikarea ao itiua riki te bong i bukin te Toa.

¹⁰ Ao e a kaokiia aomata Toromon n te katebwi ma tenuan bongin te kaitiua n nam'akaina, A okirikaaki ma te kukurei i bukin b'aai ni kabane ake e a tia ni karaoi te UEA i bukin Tawita ao Toromon, ao i bukiia ana aomata aika Iteraera.

Manga Kaotin Riki Te UEA nakon Toromon

¹¹ Ao a bane raoi karaoan ana Tembora te UEA ao ana bareti Toromon. Are nanona b'a a bane raoi b'aai ni kabane ake e baairei ngkoa Toromon b'a e na karaoi.

¹² Tabeua te tai i mwiina, ao e a manga kaoti te UEA nakon Toromon n te mii ao e taku: I ongo am tataro, ao I a tia n rinea te Tembora aei b'a te tabo ike a na kabuokaki iai taian karea nako iu.

¹³ Ngkana tao arona b'a I taua te karau ke ni kanakoia taian rookati b'a a na kang arokami ke ni karawawataia au aomata n te aoraki ae moan te kamaamate.

¹⁴ Ngkana a tataro ma te nanorinano au aomata man tanrikaaki nako iu mani katoka aia m'akuri aika a bure, ao N na kaekai aia tataro mai karawa. N na kab'arai aia bure mani manga kamaiureireia abaia.

¹⁵ N na ongo taian tataro ni kabane akana i nanon te Tembora aei,

¹⁶ i bukina b'a bon au b'ai, ao bon aei naba te tabo ae n na taromauriaki iai n aki toki. N na bon aki konaa n tannako ma iai.

¹⁷ E ongotaeka tamam are Tawita irou, ao ngkai, ngkoe Toromon, ko na katotoongnga naba. Ko na iri nanon au tua ma au reirei nako,

¹⁸ ao n na kaawakina au berita ae e matoa nako ina b'a e na uea n taai nako temanna man am utu i aon Iteraera.

¹⁹ Ma ngkana ko aki ongotaeka ngkoe ke temanna mai rouia Iteraera ke ni manga waakina taromauriakiia anti ianena,

²⁰ ao n na kanakoi ngkami man te aba ae I anganingkami aei. N na kiitana te Tembora are I a tia n taekinna b'a n taromauriaki iai, b'a a aonga n taku aomata n taabo nako b'a bon ti te manikangare ao a na b'ainingareia.

²¹ E rangi n tamaroa ngkai te Tembora, ma ngkana iai te b'ai ae e riki, ao aomata akana a nakonako i rarikin te Tembora, a na mimi, ao a na titiraki ni kaangai, “E aera ngkai E a karaoa te b'ai ae moan te kakamaaku aei nakoia ana aomata ao te Tembora aei?”

²² Ao ane a na kaeka ni kaangai, “I bukina b'a a aki kubara te UEA ae Atuaia Iteraera, are e a tia ni kamaiuia aia bakatibu mai Aikubita, ao a manga moana taromauriakiia anti tem'angina.”