2.Rongorongo 36 - Te B'aib'ara

Uean Iuta are Ieoaati

¹ I mwiin maten Iotia, ao a manga kauea natina te m'aane are Ieoaati b'a aia uea ae e boou.

² Ai uabwi ma tenua ana ririki ni maiu n te tai anne, ao e tautaeka i nanon tenua te nam'akaina mai Ierutarem.

³ E kataenikaiia Ieoaati uean Aikubita are Neko ao e kairoroa Iuta b'a e na kakab'aka e kaaniia aua te tan te tirewa ao uabwi ma nimaua te b'aaun te koora b'a kaanga te ronrab'ata.

⁴ Ao i mwiina, e rinea tarin Ieoaati are Eriakim te uea are Neko b'a e na uea i aon Iuta ao e kab'aka arana nakon Ieoiakim. Ao e kaira nako Ieoaati nako Aikubita b'a te taenikai.

Uean Iuta are Ieoiakim

⁵ Ai uabwi ma nimaua ana ririki ni maiu Ieoiakim ngke e rineaki b'a te uea, ao e tautaeka i nanon tebwi ma teuana te ririki mai Ierutarem. E aki ongotaeka Ieoiakim iroun te UEA ae Atuana ngke e karaoi m'akuri aika a buakaka.

⁶ I nanon ana tai n tautaeka Ieoiakim, ao e buakana Iuta uean B'aburon are Nebukaneta. E katika Ieoiakim ao e kabaea n taian tiein, ao e uotia nakon ana kaawa n tautaeka are ae e buubura are B'aburon.

⁷ E uoti nako naba taian b'ai aika a kakaawaki Nebukaneta man ana Tembora te UEA, ao e kaaki n ana bareti i B'aburon.

⁸ Ao koreaki mwiin b'aai ni kabane ake e karaoi Ieoiakim i nanon ana tai ni uea n reitaki ma ana m'akuri aika a rangi n ribaaki aika a buakaka i nanon Rongorongoia Uean Iteraera ma Iuta. E a manga uea natina te m'aane are Ieoiakin i mwiina.

Uean Iuta ae Ieoiakin

⁹ Ai tib'a tebwi ma wanua ana ririki ni maiu Ieoiakin ngke e a riki b'a te uea i aon Iuta, ao e tautaeka i nanon ti tenua te nam'akaina ao tebwina te bong mai Ierutarem. E aki ongotaeka Ieoiakin iroun te UEA ngke e karaoi m'akuri aika a buakaka.

¹⁰ Ni bongin te aumeaang n te ririki, ao e katika Ieoiakin uean Aikubita are Nebukaneta ao e uotia nako B'aburon, ni ikotaki ma b'aai riki tabeua aika a kakaawaki aika b'ain te Tembora. Ao e a manga rinea Tetekia Nebukaneta b'a e na uea i aon Iuta.

Uean Iuta are Tetekia

¹¹ Ai uabwi ma teuana ana ririki ni maiu Tetekia ngke e rineaki b'a te uea i aon Iuta, ao e tautaeka mai Ierutarem i nanon tebwi ma teuana te ririki.

¹² E aki ongotaeka iroun te UEA ae Atuana ao e rawa ni biti arona, e ngae ngke e a tia ni kauringnga Ieremia, are ana burabeti te UEA.

¹³ E a tia uean B'aburon are Nebukaneta ni kairoroa Tetekia b'a e na berita n aron te Atua b'a e na kakaonimaki. E taningabono Tetekia ao e rawa n rairaki nako te UEA ae Atuan Iteraera, ma ngaia are, e kaaitaraa Nebukaneta.

¹⁴ Ao a rikirake n aki rangi ni kakaonimaki riki kaain Iuta ao bon taian ibonga naba ake taan kairiiri. A katotoongaia botannaomata ake i rarikiia ni karaoi m'akuri aika a rangi n ribaaki ao a karika ana Tembora te UEA b'a e na aki raoiroi i bukin te taromauri.

¹⁵ Ma e nanoangaiia ana aomata te UEA ae te Atua, ao e aki uruaka te Tembora, ma e a kanakoia taiani burabeti are e aki toki ni kauringiia aomata i bukin aia bure.

¹⁶ Ma a ti ngare aomata ao a kakanikoia burabeti akekei. A aki kubara te b'ai are e kataia n taekinna te UEA nakoia, ni karokoa e a rangi n un n te aro are bon akea ae e konaa ni katokia man katuaeakiia kaain Iuta ao Ierutarem.

Kamaunaan Ierutarem

¹⁷ Ao e kanakoa uean B'aburon are Nebukaneta te UEA b'a e na buakana Ierutarem. Ao Nebukaneta, e tiringiia rorobuaka n ataei ake n te Tembora, ao bon akea nanoangaan temanna i rouna, e ngae ngke te m'aane ke aine, te ataei ke te kara. E karaoia te Atua b'a e na tiringiia aomata ni kabane n te kaawa are e buubura arei.

¹⁸ E uoti nako b'aai ni kabane Nebukaneta ake a tiku i nanon te Tembora; e iraea te kaub'ai ao kanoan ana ruunib'ai te uea ma ana mataniwi. E uoti b'aai ni kabane nako B'aburon.

¹⁹ A kabuoka te Tembora ana taanga ni buaka Nebukaneta ao a urui b'aai ni kabane kateitei aika a kakaawaki ake i nanon oon te kaawa are e buubura arei.

²⁰ A uotiia nako koraki ake taian nikira ni maiu nako B'aburon b'a aia taenikai, ike a riki b'a ana toro te uea ma natina m'aane, ni karokoa te tai are e rikirake iai Botia b'a te botannaomata ae e korakora.

²¹ E a riki Iuta b'a te rereua ae akea kaaina, ao e tiku n arona anne ni karokoa itibwi te ririki, ni kakororaoi ririki ni kabane ake e aki kariaiakaki b'a e na motirawa iai. A riki baikai n aron are e tia n taekinna

Kaokaia taian Iutaia Nakon Mwengaia

²² N ana moan ririki Tairati ni uea i aon Botia, ao te UEA e karaoa Tairati b'a e na kanakoa ana rongorongo nakon m'akoron abanueana ni kabane. E riki aei n aron are e a tia ni berita iai Ieremia are ana burabeti te UEA.

²³ E kaangai te rongorongo arei: Boni Ngai Tairati ae uean Botia. E a tia te UEA ae Atuani karawa ni karikai b'a n na tautaeka i aoia botannaomata ni kabane n te aonnaba. E a tia n rineai b'a n na karaoa te Tembora i bukina i Ierutarem, i Iuta. E na tarataraia ana aomata ni kabane te UEA ae te Atua akana a tangiria n oki nako Iuta.