2.Rongorongo 33 - Te B'aib'ara

Uean Iuta are Manate

¹ Ai tib'a tebwi ma uoua ana ririki ni maiu Manate ngke e a riki b'a te uea i aon Iuta, ao e tautaeka i nanon nimabwi ma nimaua te ririki mai Ierutarem.

² E aki ongotaeka Manate iroun te UEA ngke e katotoongi kateia botannaomata ake e kakioia nako te UEA mai aon Iteraera.

³ E katei baangotan te aba ake e a tia n urua tamana are Etekia. E karaoa te bouannanti i bukin te anti are Baara ao e katea te boua are e tabu i bukin taromaurian te anti te aine are Nei Atera ao e kakaonimaki n taromauri taian itoi i karawa.

⁴ E katea naba te baonikarea Manate i bukin antiia beekan ao taian itoi i nanon te Tembora ike e kaantaningaaki b'a e na ti

⁵ tataromauriaki iai te UEA. E katikui taian baonikarea aikai ni katawanangin te Tembora ake uoua

⁶ ao e katea naba te atiibu are taamnein antiia ianena. E kaakaraoa naba taiani m'akuri n tabunea ao ni b'ainikawai,

⁷ e kakawaria taan kaiwa i bukin buokana ao e anga natina te m'aane b'a a na karea n te M'arua are Innom. E bon karaoi naba taiani bure aika a rangi ni buakaka ake tabeua ao e rangi ni kauna te UEA. N ririki aika a nako, e a tia n tuanga Tawita ma Toromon te UEA: Ierutarem bon te tabo are I tangiria nakon taabo ni kabane i aon Iteraera. Bon au b'ai, ao n na taromauriaki i nanon te Tembora n aki toki.

⁸ Ngkana a kakaonimaki n iri nanon tuua ni kabane ao taian reirei ake I angan au toro are Moote, ao n na bon aki manga kakioia nako man te aba are I a tia n anganiia aia bakatibu.

⁹ Ma a ongo kaain Iuta ma Ierutarem iroun Manate ao a karaoi riki taian bure aika a rangi ni buakaka nakon are a karaoia taiani botannaomata ake e kakioia nako ngkoa te UEA.

¹⁰ E kataia te UEA ni kauringa Manate ao aomata i bukin aia bure, ma aki tabeakina ana kauring.

¹¹ Ma ngaia are, e kanakoa ana taanga ni buaka Aturia ni buakana Iuta ma n taua Manate. A kanim'a te matau i b'airina, ao a kabaea n taian taurekereke, ao a uotia nako B'aburon.

¹² Ngke e taua Manate b'a te taenikai ikekei, e bubutiia te UEA ae te Atua kab'araan ana bure ao buokana.

¹³ E kakauongo te UEA nakon ana tataro Manate ao e noora raraoman nanona, ai ngaia are, e a karaoia b'a e na okira Ierutarem ma n tautaeka kaanga te uea. Ao e ataia man te tai anne Manate ae bon te UEA te Atua.

¹⁴ Rimwi, e a manga katea oon tinanikun m'akoron Ierutarem are i mainiku Manate ao e a manga karietaa riki. E waaki te oo aei man te M'arua are Kion i meang nakon te Mataroa are Ika ao ni katobibia m'akoron te kaawa are e buubura arei are e aranaki b'a te Maunga are Obera. Ao e anganiia naba taian aobitia n te taanga ni buaka tib'angaia n tatabemaniia nako b'a tararuakin taian kaawa aika a buubura ake a nonoaki i Iuta n tatabeua nako.

¹⁵ E bon kanakoi naba taian bouannanti Manate ao taian atiibu ake bannan antiia ianena mai nanon te Tembora, ao e booti taian baonikarea ake e katei ngkoa i rarikin te Tembora ao ake ni m'akoron Ierutarem ake tabeua. E karenakoi baikai ni kabane i tinanikun te kaawa are e buubura.

¹⁶ Ao i mwiina, e onob'aia ana baonikarea te UEA ao e anga karea ni kaaitaua ao te karea naba i bukin bubutiana ana kakab'aia. E anga ana taeka nakoia aomata ni kabane i Iuta b'a a na riai n taromauriia te UEA ae Atuan Iteraera.

¹⁷ A ongotaeka aomata iroun Manate, ma a taromauriia te UEA ni bon oin aia baangota nako.

¹⁸ A koreaki mwiin b'aai n kabane ake e karaoi Manate i nanon ana tai ni uea, n reitaki ma ana tataro nakon te UEA ae te Atua ao taiani kauring mairouia burabeti, i nanon Rongorongoia Uean Iteraera.

¹⁹ A m'aiti rongorongon Manate are e koroia Otai, n reitaki ma ana tataro ao kaekaana iroun te Atua. Ma e koroi naba ana m'akuri Manate aika a buakaka Otai i m'aain are e okira te Atua, ai uana naba ma aran taabo ake e katei iai taian bouannanti Manate, ao taabo naba ake e katei iai baangotan te aba ao taabo n taromauri i bukin Nei Atera.

²⁰ E mate Manate ao e taunaki i rarikin te bareti, ao e a manga uea natina te m'aane are Amon i mwiina.

Amon are Uean Iuta

²¹ Ai uabwi ma uoua ana ririki ni maiu Amon ngke e uea i aon Iuta, ao e tautaeka mai Ierutarem i nanon uoua te ririki.

²² E aki ongotaeka Amon iroun te UEA, n aron are e karaoia naba tamana are Manate, ao e taromauriia man angaanga karea nakon taian bouannanti ake e karaoi ngkoa tamana.

²³ E a manga rairaki nakon te UEA Manate, ma Amon, e rangi n rawa, ao e boni bure riki nakon tamana.

²⁴ E kam'aneaki Amon bon irouia ana mataniwi ao a tiringnga i nanon ana bareti.

²⁵ Ma a tiringiia taan tiringa Amon kaain Iuta ao a manga kauea natina te m'aane are Iotia.