2.Rongorongo 31 - Te B'aib'ara

Uruakan Baangotan te Aba Irouia Aomata

¹ I mwiin te Toa are te Riao, ao a okiri kaawan nako i Iuta aomata ao a uruaki bannan nako antiia ianena aika taian atiibu ao a koroi ni kab'akai taiani boua aika a tabu ake b'ain taromaurian te anti are Nei Atera. A urui ni kabane baangotan te aba ao aia baonikarea ianena ake i Iuta, ao ai uana naba ma ake n aaba ake Beniamin, Eberaim, ao Manate Maeao. Ao e mwiina, a bane n okirikaaki nakoni mwengaia aomata.

Taian Angab'ai I bukiia Ibonga ma Kanoan Rewi

² Ao Etekia e bwenauaia ibonga ma kanoan Rewi nakon taiani m'akoro, ni kaineti ma aia m'akuri. Ao i mwiina, e anganiia tib'angaia te anga taiani karea ake kakukureian te UEA ao taiani karea i bukin te UEA ake buubutian te UEA ana kakab'aia. E rineia naba aomata ake a na m'akuri n te Tembora ao a na anene n nebo ni mataroan nako te rin nakon te Tembora.

³ E katauraoi taiani man Etekia man ake bon oin ana nanai n tiibu ao ana nanai ni kao b'a a na kabonganaaki i bukin karean te moaningabong ao te tairiki, ao ai uana naba ma taiani karea i bukin taiani bootaki ake a na karaoaki n te Taabati, ake te Toa ae Moan Otin Nam'akaina, ao taiani bootaki n am'arake ake tabeua ake a tangiraki karaoaia i aan ana tua te UEA.

⁴ E tuangiia kaain Ierutarem b'a a na uoti aia angab'ai ake a na anganaki taian ibonga ao kanoan Rewi, b'a a aonga n reke aia tai ni m'akuri i bukin te UEA n aia m'akuri.

⁵ Ao n te tai are a bon tib'a ongo iai aomata te b'ai are e tangiria te uea, ao a uoti naba kabwian aia b'ai ni kabane, n reitaki ma aia kabanea n raoiroi n uita, wain, b'aan te oriwa, ana karewe te manibeeru, ao uaan aia tawaana riki tabeua.

⁶ A uoti naba teuana te kabwianib'ai man aia nanai ni kao ao aia nanai n tiibu aomata man kaawan Iuta ake tabeua ao ai uana naba ma aia kabwianib'ai mani b'aai ni kabane ake a tia ni katabui b'a ana b'ai te UEA.

⁷ A moana uotakin aia angab'ai aomata nako Ierutarem n te katenua n nam'akaina, ao a roko ake taiani kabanea, aua te nam'akaina rimwiia.

⁸ Ao ngke a noori taian angab'ai aikai Etekia ma ana mataniwi, ao a kaaitaua te UEA ao aomata.

⁹ Ao e titirakiniia ibonga ao kanoan Rewi Etekia i bukin te angab'ai ae e rangi ni buubura.

¹⁰ Ao e kaeka Ataria are te ibonga ae e rietaata n te tai anne, are ana kariki Tatoka, ao e taku, “A tia ni uoti mai nakoira aia angab'ai aomata man te tai arei ni karokoa ngkai, ao e a bon rangi ni m'aiti te am'arake ma b'aai. E a tia te UEA ni kakab'aiaia ana aomata. Ani bon tarai nikiraia!”

¹¹ Ma ngaia are, e anga ana taeka te uea b'a a na karaoaki taian ruunib'ai n te Tembora, ao ngke a tia

¹² ao a na uotaki nako iai nikiran taian angab'ai. Ao i mwiina, a rinea Konania are kanoan Rewi Etekia ma Ataria b'a e na tararuai taian ruunib'ai akekei.

¹³ Ao te tia buobuoki tarina are Timei, ao e m'akuri ma kanoan Rewi aikai: Ieiera, Atatia, Naata, Ataera, Ierimota, Iotabata, Eriera, Itimakia, Maata, ao Benaia.

¹⁴ E anganaki Kore are natin Imna tib'angana kaawakinan te Mataroa are Mainiku, ao e mwiokoaki naba i bukin butim'aean taian angab'ai n anganano nakon te Atua ao tib'akiia naba nakoia taian ibonga ao kanoan Rewi.

¹⁵ Bon iai ana taan buobuoki aika onoman aika a na taraaia raoi b'a a reke naba tib'aia ibonga ni kabane ake ni kaawan nako Iuta ake tabeua n taian angab'ai aikai.

¹⁶ Araia bon Eten, Miniamin, Ietua, Temaia, Amaria, ao Tekania. A bane n reke tib'aia man te angab'ai aei ni kaineti ma tabeia nako, ibonga ma kanoan Rewi ake raka aia ririki ni maiu i aon tenibwi ake a m'akuri ni katoa bong n te Tembora.

¹⁷ A tauaki araia ibonga n rongorongo aika a eti ni kaineti ma aia kaainga, ao kanoan Rewi ake uabwi ni waerake aia ririki ni maiu, a tauaki araia ni kaineti ma tabeia.

¹⁸ A tauaki araia buuia ma natiia i nanon taian rongorongo aika a eti, i bukina ngke a tia ni kakaonimaki ni kaawakina kaitiakaia ao ni karikiia b'a a na tau i bukin te m'akuri i bukin te UEA.

¹⁹ E rineia naba m'aane ake tekorakina Etekia b'a a na uoti taian am'arake ao b'aai nakoia ibonga ao kanoan Rewi ake a mena mwengaia n taabo ni uteute ake i rarikin kaawan nako Iuta. Ma ana riai ibonga ni kakoauaaki b'a ana kariki Aaron, ao a na riai kanoan Rewi ni iai araia n te rongorongo ae e eti.

²⁰ Ao b'aai ni kabane ake e karaoi Etekia ngke e uea i aon Iuta, n reitaki ma b'aai ake e karaoi i bukin te Tembora i Ierutarem, aika a eti ao a raoiroi.

²¹ Bon te uea ae e tetekeraoi, i bukina b'a e ongotaeka iroun te UEA ae te Atua ma nanona ni kabane.