2.Rongorongo 18 - Te B'aib'ara

Kauringan Aaba are Uean Iteraera Iroun Mikaia

¹ E a rangi ni kaub'ai ngkai Ieotiab'ata ma n tanoata taekana. E tiaaina te boraraoi i bukin te raoi ma uean Iteraera are Aaba ngke e baairea mareakin natina te m'aane ma natin Aaba te aine.

² N te bong teuana, ao e m'ananga Ieotiab'ata ni kawara Aaba n ana kaawa n tautaeka are Tamaria. E tiringiia taian tiibu ma kaao Aaba ao e katauraoa te baka ae korakora b'a karinean Ieotiab'ata ma mataniwi ake raona. Ao Aaba e maroroakina taekan buakanakin te kaawa ae e buubura are Ramota i Kireata,

³ ao i mwiina e a bubuti ni kaangai, “Ieotiab'ata, ko aki irai ni buakana Ramota?” Ao e taku Ieotiab'ata, “Eng, a mena taekaia au taanga ni buaka i nanoni baim.

⁴ Ma ti na riai moa n titirakina te UEA b'a tera ae ti na karaoia.”

⁵ Ao e kawaekoaia abubua taiani burabeti te uea are Aaba ao e titirakiniia ni kaangai, “E riai b'a n na buakana te kaawa are e buubura are Ramota?” Ao e taku te burabeti, “Eng! E na buokiko te UEA n taua te kaawa anne.”

⁶ Ma e taku Ieotiab'ata, “Ti na bon kakoauaa raoi, e a boni bane ngkai ana burabeti te UEA ae ti na konaa n titirakinna?”

⁷ Ao e taku Aaba, “Ti konaa naba n titirakina te burabeti are Mikaia are natin Imra te m'aane, ma I ririiba Mikaia i bukin ana rongorongo aika buakaka n taai nako nako iu.” Ao e kaeka Ieotiab'ata, “Ko riai n aki taekina anne!”

⁸ Ngaia are, e a kanakoa temanna Aaba ni kawaekoa Mikaia n te tai ae e waekoa.

⁹ N te tai aei, a kunnikaiia Aaba ma Ieotiab'ata n te niiniira ni uea ao a tekateka i aon aia kaintokanuea n te tabo ni kaaki kunnuita i rarikin mataroan te kaawa are Tamaria, ao a tabe n ongora irouia burabeti ngke a taekin b'aai ake e taekin te UEA.

¹⁰ Temanna mai buakoia burabeti akekei bon Kenaana are natin Tetekia te m'aane. E a tia ni karaoi taiani koro ni man te biti ao e takaarua ni kaangai, “Aaba, E taku te UEA b'a ko na buakana Turia n ai aron te kao ae iai korona aika taiani biti ma n tiringiia ni kabane!”

¹¹ Ao a bane ni boraoi n iango burabeti ma te koaua are e na buakaniia kaain Turia i Ramota te uea are Aaba ao a berita b'a e na buokiia te UEA ni kataenikaiia.

¹² I nanon te tai anne, ao e wirikiriki te aomata are e kawaekoaa Mikaia nakon Mikaia ni kaangai, “Mikaia, a bane n taekina te rongorongo ae e raoiroi burabeti nakon Aaba. Ma ngaia ae, ko na nako ngkai ao taekina naba ae ti te bo ma ake a tia n taekinaki.”

¹³ Ao e kaeka Mikaia, “N na bon taekina are e a tia n tuangai te UEA ae Atuau ae e maiu b'a n na taekin.”

¹⁴ Ao e m'ananga Mikaia nakon Aaba, ao e titirakin Aaba ni kaangai, “Mikaia, ti na buakana Ramota ke ti na aki?” Ao e kaeka Mikaia, “Eng, E na buokiko te UEA n taua te kaawa ane e buubura anne.”

¹⁵ Ao e takaarua Aaba ni kaangai, “Mikaia, I a tia n tuangko n taai aika a bati b'a ko na tuangai te koaua! Tera ae E a tia n taekinna te UEA nakoim?”

¹⁶ Ao e taku Mikaia, “I nanon te kaotioti I nooria tautian Iteraera aika a tiotionako, ma ni m'arua i aon taian tabuki n ai aroia tiibu aika akea aia tia kaawakini tiibu. Ao e taku te UEA, “Bon akea aia tia kairiiri te taanga ni buaka aei. A riai n okiri mwengaia ma n aki buaka.”

¹⁷ Ao e rairaki Aaba nakon Ieotiab'ata ao e taku, “Ao are I a tia n tuangko, b'a e na manga bon taekinii naba rongorongo ae e buakaka nako iu!”

¹⁸ Ao e kaeka Mikaia: I a manga noora te UEA n tekateka i aon ana kaintokanuea ma b'aai ni kabane aika a maiu i karawa b'a a bootaki ni katobibia.

¹⁹ Ao e taku te UEA, “Antai i buakomi ae e konaa ni kam'anea Aaba b'a e na nako Ramota ike e na tiringaki iai?” Ao a maroroakina te b'ai arei tabeua te tai

²⁰ ao n tokina ao e a koerake te tamnei temanna ao e taku nakon te UEA, “I konaa ni kam'anea Aaba.” Ao e taku te UEA, “Ao ko na kangaa ni kam'anea?”

²¹ “N na karaoia ana burabeti Aaba b'a a na manga boni kewea Aaba.” Ao e taku te UEA, “E raoiroi! Naako ngkai ao karaoa anne, E na bon nakoraoi am m'akuri anne.”

²² Aaba, bon aei raoi te b'ai ae e a tia n riki. E karaoia am burabeti ni kabane b'a a na keweniko, ao e ataia b'a ko nang mate n te tai ae e waekoa.

²³ Ao e m'ananga Tetekia ma n orea taban Mikaia n nanoni baina. Ao e a manga titiraki ni kaangai, “Ko taku n am iango b'a e ti taetae te UEA nako im ao e aki taetae nako iu?”

²⁴ Ao e taku Mikaia, “Ane ko na bon ataia n te bong arei ngkana ko karabako n te ru teuana i akuun auti tabeua.”

²⁵ Ao e takaarua Aaba ni kaangai, “Katika Mikaia! Uotia nakon te natinuea te m'aane are Ioati ao te koowana are Amon i Tamaria.

²⁶ Ao tuangiia b'a a na kainna n te karabuuti ao tai anganna kanana ma ti anganna te kariki ma te ran ni karokoa I oki rikaaki man te buaka ma te maiu.”

²⁷ Ao e taku Mikaia, “Ngkana tao arona b'a ko na oki, ao ngaia tao I kaairua n te b'ai are E tangiria te UEA b'a n na taekinna.” Ao i mwiina, e a manga taetae nakoia aomata ni kaangai, “Kam na aki m'aninga te b'ai are I a tia n taekinna!”

Maten Aaba i Ramota

²⁸ Ao a kairiia aia taanga ni buaka Aaba ma Ieotiab'ata nako Ramota i Kireata.

²⁹ I m'aain are a waaki nakon te buaka, ao e a taku Aaba, “Ieotiab'ata, N na biti kunnikaiu b'a I aonga n aki kinaaki, ma ngkoe ko na bon b'aina niiniiram n uea.” Ao e karaoa ae e na aki kinaaki iai Aaba, ao e nako ni buaka.

³⁰ Ao e a tia uean Turia n tuangiia ana mataniwi n taiani kaanibuaka b'a a na ti buakana Aaba.

³¹ Ma ngaia are, ngke a noora Ieotiab'ata ma niiniirana ni uea ao a taku b'a Aaba, ao a moana buakanakina. Ma e tataro Ieotiab'ata, ao E katokiia tautian Turia te UEA.

³² Ao ngke a ataia b'a ngaia tiaki Aaba, ao a kiitanna ni katikua n ti ngaia.

³³ Ao i nanon tain te buaka, ao e a kanakoa ana kanoanikatebe temanna te tautia n aki akaaka, ao e a teke iai marenan biiti ake rabunan b'aab'aan Aaba. E takaarua nakon ana tia kabuta ana kanibuaka ni kaangai, “I a teke! Uotai nako ni kararoaai mai ikai!”

³⁴ E bong bongin te buaka arei, ao e tautauaki ni buokaki ni kateaki Aaba i aon ana kanibuaka ni kabongnga, b'a e aonga ni konaa n nooriia aia taanga ni buaka kaain Turia. E tiku ikekei ni karokoa te tairiki, ao ngke e a bung taai ao e a mate.