2.Rongorongo 14 - Te B'aib'ara

Uean Iuta are Ata

¹ Ao e mate Abiia ao e taunaki i Ierutarem. Ao e a manga uea natina te m'aane are Ata, ao e rau aon Iuta i nanon te maan ae tebwiina te ririki.

² E ongotaeka Ata iroun te UEA are Atuana ao e kakaraoa ae e eti.

³ E kamaunai baangotan te aba ao taian baonikarea i bukin taian anti. E urui taian atiibu ake bannan taian anti ao e koroi ni kab'akai taiani boua ake a tabu ake a kabonganaaki i bukin taromaurian te anti are Nei Atera.

⁴ Ao i mwiina, e tuangiia aomata ni kabane i aon Iuta b'a a na taromauriia te UEA ae te Atua, n ai aron are a tia ni karaoia aia bakatibu, ao a iri nanon taian tua ma taian reirei.

⁵ E kamaunai baangotan te aba ni kabane ao taiani baoni karea ake i bukin b'aai ni kaboiarara ake i Iuta.

⁶ E kakab'aia Iuta te UEA n anga te rau ngke e uea Ata, ao n te tai anne, e nonoi kaawa aika a m'aiti Ata.

⁷ E taku nakoia aomata, “Ti na karaoi taian oo ao taian taua n totoko i bukin ara kaawa nako, ao ti na karaoi taian mataroa aika a konaa n rokanaki n taiani biti aika a buubura. E na riki te aba aei b'a ara b'ai, i bukina b'a ti a tia n ongotaeka iroun te UEA ae Atuara. E a tia n anganiira te rau mairouia ara kairiribai.” Ao a bane ni karaoi b'aai ni kabane aomata ake e iangoi Ata.

⁸ Bon iai ana taanga ni buaka Ata e korakora aika a ninikoria: Tenibubua te ngaa mai buakoia bon man te baronga are Iuta ao iai otangaia ao aia kainiwai n tatabemaniia nako; uabubua wanibwi te ngaa man te baronga are Beniamin ao iai aia kainikatebe ao aia kanoanikatebe.

Konaakiia Ana Taanga ni Buaka Itiobia Irouia kaain Iuta

⁹ E kaira te taanga ni buaka Tera are kaain Itiobia ae m'aitina teuana te mirion tautiana ao tenibubua taiani kaanibuaka nakon te kaawa are Maretia i Iuta.

¹⁰ E kaaitibo ma Ata ikekei, ao a katauraoi nakon te buaka taanga ni buaka aika uoua aikai n te M'arua are Tebata.

¹¹ E tataro Ata ao e taku: Te UEA ae te Atua, bon ti ngkoe ae ko konaa ni buoka te taanga ni buaka ae akea korakorana ma ni katokanikaia i aon ae korakora. Ma ngaia ae, ti onimakinna b'a ko na buokiira. Ti na buakana te taanga ni buaka ae korakora aei i bukin neboan aram, ao ti ataia b'a ko bon aki konaa ni konaaki. Bon te UEA ae Atuara ngkoe.

¹² E buokiia Ata ma ana taanga ni buaka te UEA ni kataenikaiia kaain Itiobia. A biri nako tautia,

¹³ ma a kakioaki irouia Ata ma ana taanga ni buaka ni karokoa Kerara. Bon te konaaki koaua a bon aki konaa ni buaka Itiobia. Ao a anai b'aai ni kabane tautian Iuta ake aia b'ai kaain Itiobia.

¹⁴ A ongo aomata ake a maeka ni kaawa aika a uarereke i rarikin Kerara ao a maaka te UEA. Ma ngaia are, e a rangi ni beebete irouia ana taanga ni buaka Iuta ni kataenikaiia ma ni uoti nako b'aai ake a tangiri aika a kakaawaki man taiani kaawa aikai.

¹⁵ A bon buakani naba taiani maeka n rianna ake a maeka iai taani kaawakin tiibu, kooti, ao kaamero. Ao i mwiina, a oki nako Ierutarem.