1.Uea 8 - Te B'aib'ara

Uotakin Te Atiniberita Iroun Toromon Nakon Te Tembora

^1-2 E kaawakinaki ngkoa te Atiniberita i aon te Maunga are Tion are e ataaki naba n arana are Ana Kaawa Tawita. Ma e tangiria Toromon b'a e na kam'ainga te Atiniberita nakon te Tembora ngke a bane ni mena aomata i Ierutarem ni bukamarua te Toa ae M'anganikaai i nanon te nam'akaina are Etanim, te kaitiua n nam'akaina n te ririki. Ao e botiia taani kairiiri aika a kakannato i aon Ierutarem Toromon.

^3-4 Ao a uota te Atiniberita, ma te Um'antabunrianna ao b'aina nako nakon te Tembora ibonga ma kanoan Rewi.

⁵ Ao e nakonako Toromon ma aomata i matan te Atiniberita ao a anga taian tiibu ma karea ae a raka m'aitiia i aon ae konaa ni warekaki.

⁶ Ao a uota te Atiniberita ibonga nako nanon te tabo are Moan te Tabu, ao a katikua i aani b'aai ake iai baiia ni kiba,

⁷ aika a taakin i aon te Atiniberita ma amo ake b'ain uotakina.

⁸ A rangi n anaanau amo akekei n te aro are a nooraki naba mai tinanikun te tabo are Moan te Tabu, ao akea riki te tabo ae a nooraki mai iai. Ao a bon tiku naba ikanne n taai nako.

⁹ B'aai ake a kakawakinaki i nanon te Atiniberita bon baaba ake atiibu aika uoua ake e katikui Moote ikanne ngke E karaoa ana boraraoi te UEA ma aomatan Iteraera i aon te Maunga are Tinai, i mwiin kaotinakoaia mai Aikubita.

¹⁰ Ao e karina ni kaonaki nanon te Tembora n te nang ngke a kiitana te tabo are Moan te Tabu taiani ibonga.

¹¹ E mena mimitongin te UEA i nanon te nang, ao e rangi n raneanea ootana n te aro are a aki konaa n tiku ni maan ibonga i nanona ni karaoa aia m'akuri.

¹² Ao e tataro Toromon: “Ara UEA. Ko taku b'a ko na maeka n te nang ae roo.

¹³ I a tia ngkai ni karaoa te Tembora ae e mimitong ike ko na konaa ni maeka i nanona n aki toki.”

¹⁴ Ao e rairaki Toromon nakoia aomata ake a tei ikekei. Ao i mwiina e kakabawaiaia

^15-16 Ao e taku: Neboa te UEA ae Atuan Iteraera. E kaotinakoia ana Aomata man te aba are Aikubita n taai ake ngkoa. Ao i mwiina riki, E kakoroa bukin ana Berita ni karika tamau are Tawita b'a uean Iteraera. Ao e taku naba te UEA b'a E tuai n rinea te kaawa are e na karaoaki iai te tembora.

¹⁷ Ma ngaia are, e tangiria Tawita ni karaoa ana Tembora te UEA ae Atuan Iteraera,

¹⁸ ao E taku te UEA, “E rangi n raoiroi ngkai ko iangoa karaoan te Tembora ae N na taromauriaki iai.

¹⁹ Ma bon tiaki ngkoe ae ko na karaoia. Natim te m'aane ae e na karaoa te Tembora i bukin neboau.”

²⁰ “Ao ngkai, E a tia ni kakoroa bukin ana Berita te UEA ae N na riki b'a uean Iteraera n aron tamau, ao I a tia ni karaoa te Tembora i bukin te UEA ae Atuara.

²¹ I a tia naba ni karaoa nnen te Atiniberita i nanon te Tembora. Ao a mena i nanon te Atiniberita anne uoua baaba aika atiibu aika a koreaki i aona taiani boraraoi ake E karaoi te UEA ma ara bakatibu ngke E kaotinakoia mai Aikubita.”

Ana Tataro Toromon N Te Tembora

²² Ao e tei Toromon ni kaaitaraa te baonikarea ao a bane n tei aomata i bukina. Ao i mwiina, e tabeki baina nako karawa

²³ ao e tataro ni kaangai: Te UEA ae Atuan Iteraera, bon akea atuani karawa ke aonnaba ae ai arom. Ko aki konaa ni m'aninga am Berita are Ko a tia ni karaoia ma am Aomata, ao ko kakaonimaki nakoia ni kabane aika a kakaonimaki nakon am Reirei nako.

²⁴ Bon am Toro tamau are Tawita, ao n te bong aei Ko a tia ni kakoroa bukin am Berita are Ko karaoia nakoina.

²⁵ Te UEA ae Atuan Iteraera, Ko berita nakon tamau i aon Iteraera b'a e na uea n taai nako temanna man ana kariki tamau i aon Iteraera ngkana a teimatoa n ongotaeka nakoim n aron are e karaoia tamau.

²⁶ Taiaoka kaawakina am Berita are Ko karaoia nakon am toro are Tawita.

²⁷ E aki tau karawa i bukin nnen ni maeka te UEA ae te Atua. Ao Ko nang kanga riki ni maeka n te aonnaba i nanon te Tembora ae I karaoia?

²⁸ Ma I butiiko b'a ko na kaeka au tataro.

²⁹ Bon aei te Tembora are Ko rineia b'a nnem n taromauriaki. Taiaoka tararuaia ni bong ao ni ngaina ao ongora ngkana I nakomai n tataro.

³⁰ Bon am toro ngai, ao am b'ai aomatan Iteraera. Ma ngaia are, ngkana iai mai i buakora ae e nakomai n tataro ao kaeka te UEA mani mwengam are i karawa ao kab'arai ara bure nako.

³¹ Ngkana tao arona b'a iai ae e bukina temanna n te bure teuana, ao teuare e bukinaki e tei i matan te Atiniberita i nanon te Tembora ao e taku, I bon tuea b'a I bon aki karaoa te bure.

³² Ko na ongora mai karawa ao karaoa am babaaire i aoia b'a antai ae e bure. Ao Ko na katuaaea te tia bure ao ni kainaomata teuare akea ana bure.

³³ Ngkana tao arona b'a a bure aomatan Iteraera nakoim, ao i mwiina a manga konaaki irouia aia kairiribai. Ao ngkana arona b'a a roko n te Tembora aei man buubutii kab'araan aia bure,

³⁴ ao ongora mani mwengam mai karawa. Kab'arai aia bure ao uotiia rikaaki nakon te aba are Ko anganiia aia bakatibu.

³⁵ Ngkana tao arona b'a a bure am a Aomata nakoim, ao katuaaia n taua te karau b'a e na aki b'aka nakoia. Ao ngkana arona b'a a manga rairaki nakon te Tembora arei ma n tataro n Aram ma ni katoka karaoan te bure,

³⁶ ao Ko na ongora mani mwengam i karawa mani kab'arai aia bure. Bon am Toro aomatan Iteraera, ma ngaia are, Ko na reireiniia aroia ni maiuakina te maiu ae e eti. Ao taiaoka ni kanakoa te karau i aon te aba are Ko berita iai nakoia n aki toki.

³⁷ N taai tabetai, a na m'autakataka taian aroka, ke a na mka, ke a na kanaki irouia rookati ke taian taake, ao ane a na mate ni baki am Aomata. N tabetai ane a na katobibiaki aia kaawa irouia aia kairiribai, ke a na aoraki am Aomata n aoraki aika a kamaamate,

³⁸ ao Ko na kakauongo ngkana iai temanna ae e tataro ma nanona n raraoma ni koaua ma baina aika e tabeki nakon am Tembora.

³⁹ Ko bon atai b'aai ni kabane inanoia aomata ni kabane. Ma ngaia are, ko na kaekai aia tataro mani mwengam ane i karawa, ni kaineti ma aroni maiuia, ao b'aai ake n aia iango.

⁴⁰ Ao ane a na taromauriiko ma n ongotaeka iroum n aron anaun maiuia n te aba are Ko a tia n anganiia aia bakatibu.

⁴¹ Ao i bukin te iabatera ae tiaki raoia kaain am botannaomata ae Iteraera ae e roko ni maeka n te aba i bukin aram,

⁴² b'a ane a na ongo aram ma m'aakan baim aomata, ao ane a na tataro nakon am Tembora.

⁴³ Ko na kakauongo mani mwengam i karawa ao kaekai aia tataro. Ane a na bane aomatan te aonnaba n taromauriiko n aroia am Aomata aika Iteraera, ao ane a na ataia b'a I karaoa te Tembora aei i bukin neboakim.

⁴⁴ Ara UEA, n te tai teuana ao ane Ko na tuangiia am Aomata b'a a na buakaniia aia kairiribai. Ao ane a na rairaki nakon am Tembora ae I a tia ni karaoia i bukim n am Kaawa ae ko rineia, ao ane a na tataro nakoim.

⁴⁵ Kaekai aia tataro mai karawa ao anganiia te tokanikai.

⁴⁶ A bure aomata ni kabane. Ma ngkana a karaoa te bure am Aomata nakoim, ao tao Ko a un irouia ao Ko a karokoia aia kairiribai b'a a na katikiia nako abaia I-Anena.

^47-49 Rimwi, a na namakina aia bure ao a na butiiko kab'araan aia bure. Kaekaia ngkana a tataro ni kaaitaraa te Tembora aei ae I a tia ni karaoia i bukin n am kaawa ae Ko rineia aei i nanon te aba are Ko anganiia aia bakatibu. Ko na ongora mani mwengam i karawa nakon aia tataro korakora ao kaekai aia buubutii.

⁵⁰ Kab'arai aia bure, e aoria ngkana tao e a m'aiti aia bure nakoim. Karaoia aia kairiribai ake a taenikai irouia b'a a na manga karaoa te akoi nakoia.

⁵¹ Uringnga b'a bon aomata ngkoa ake Ko rineia ao Ko kamaiuia mai Aikubita are kaanga te ai ae e uram'aaka nakoia.

⁵² Bon am toro ngai, ao bon am b'ai naba aomatan Iteraera. Ma ngaia are, Ko na ongora iroura ngkana iai ae e tataro man tangira buokana.

⁵³ Ngke Ko kaotinakoia ara bakatibu mai Aikubita, ao Ko tuanga Moote are am toro b'a e na taetae nakoia ni kaangai, E a tia n rineingkami te UEA ae te Atua mai i buakoia aomatan te aonnaba b'a ana Aomata ni koaua.

⁵⁴ Ao ngke e bane ana tataro Toromon n te baonikarea, ao e katorobubua ma baina aika e tabeki rake nako karawa. E teirake,

⁵⁵ e rairaki ni kaaitaraia aomata ma ni kakab'aiaia ao e takaarua ni kaangai:

⁵⁶ Neboa te UEA. E a tia ni kaawakina ana berita ma n anganiira te rau. E a tia ni koro bukin ana berita ni kabane ake E berita iai nakon ana toro are Moote.

⁵⁷ E memena te UEA ae Atuara irouia ara bakatibu ni buokiia, ao I tataro b'a E na memena iroura man aki kikitaniira.

⁵⁸ Tera ngke E buokiira te UEA n ongotaeka nakoina man toui mwiin ana tua ao ana reirei ni kabane ake E anganiia ara bakatibu.

⁵⁹ I tataro E na ururing au tataro te UEA ae Atuara ni bong ao ni ngaina. Tera ngke E buokiia aomata ni kabane i aon Iteraera ni boongi nako ni b'aai ni kabane ake a kainanoi.

⁶⁰ Ao ane a na ataia iai botannaomata ni kabane b'a bon te UEA te Atua ni koaua.

⁶¹ Ongotaeka iroun te UEA ae Atuara ao iri nanon ana Tua ma nanomi ni kabane, n aron ae kam karaoia n te bong aei.

Katabuan Te Tembora Iroun Toromon

⁶² Ao Toromon ma aomata a katabua te Tembora b'a Ana b'ai te UEA,

⁶³ ao a karean 22,000 taiani kao ao 120,000 taian tiibu b'a aia karea ni butiia te UEA ana Kakab'aia.

⁶⁴ Ao n te bong arei, e katabua nanoaan oon te Tembora b'a e na riki b'a te tabo n taromauri. E angakarea ikanne i bukina ngke e uarereke te baonikarea are te buraonti are i matan te Tembora.

⁶⁵ Ao e karaoa aia bootaki ae e buubura Toromon ma aomata ni bukamarua te Toa ae M'anganikaai i nanon te Tembora itiua te bong. Ao a roko aomata man taabo aika a raroa; mani karaangan Aikubita ae uarereke i maiaki ao mai Rebo Amata i meang.

⁶⁶ Ao n te kawani bong, e a kanakoia aomata ni kabane nakoni mwengaia. A bane ni kabo, ao a nako ma te kukurei i bukini b'ai aika a raraoi aika E a tia ni karaoi te UEA i bukin ana Toro are Tawita ao aomatan Iteraera.