1.Uea 7 - Te B'aib'ara

Karaoan Ana Bareti Toromon

¹ E karaoaki ana bareti Toromon i nanon 13 te ririki.

² Te Ru are Buakonikai boni ngaia te kabanea ni buubura i nanon te bareti. Ab'akina bon 45 te miita, 23 te miita rababana, ao 14 te miita rietaatana.

³ Ao e rabunaki n tiiran Reb'anon. Bon iai bouana aika tiira, aika aua rinaniia: 15 te boua n teuana te rinan, ao a taui 45 taiani waannano aika tiira. E tiiringinaki naba n te tiira.

⁴ Tenrinan taiani winto aika a kakaitara n iterana nako,

⁵ ao iai naba tenua mataroana i aon iterana ake uoua i rarikin matan te ru are e buubura.

⁶ Ao te ru are e buubura are e aranaki b'a Boua bon 23 te miita ab'akina ao 14 te miita rababana. A tei i matan te bareti taiani boua ake a taua raun te kaman.

⁷ E mena ana kaintokanuea Toromon n te ru ae e buubura are e aranaki b'a Motikitaeka. E buta nanon te ru aei n taian tiira.

⁸ E mena m'akoron te bareti are e maeka iai Toromon i akuun te ru are e buubura are Motikitaeka, ao ti te arona ma ngaia. E karaoaki naba ana tabo buuna are natin uean Aikubita te aine ae bon ti te bo ma ngaia.

⁹ E karaoaki te kateitei ma ruuna nako aika a buubura ni moa man aana ni karokoa taubukina, man atiibu aika a rangi n tamaroa, aika a karauaki ni koreaki nakon buburaia ae e tangiraki, ao a karauaki ni kamaranaki n taian tao.

¹⁰ A rangi ni buubura atiibun aana, ao a rangi n tamaroa. Iai tabeua mai iai aika 5 te miita ab'akiia ao tabeua 4 te miita ab'akiia.

¹¹ A kaweneaki taiani waannano aika taian tiira, ma atiibu ake a tia ni koreaki i aon taian atiibu ake taian aana.

¹² A karaoaki oon nako nanoaan te bareti man atiibu aika tennatao, ao teataona te kai ae e ab'ab'aki ae te tiira, kaanga ai aron taiani kaman ake mai moa, ao nanon te oo are i nanon te Tembora.

Te Karaob'ai Man te Buraonti Iroun Ira

¹³ Te tia m'akuri n te buraonti te m'aane are Iram are kaain te kaawa are Turo. E a tia ngkai ni mate tamana are bon te tia m'akuri naba ma te buraonti, ao tinana boni kaain te baronga are Nabetari.

¹⁴ Ao Toromon e butia Iram b'a e na nako Ierutarem ni karaoi b'aai man te buraonti i bukin b'ai n taromauri n Ana Tembora te UEA, ao e kariaia ni karaoi.

¹⁵ Ao e karaoi uoua te boua Iram man te buraonti aika m'aane te miita ab'akiia ao e kaaniia uoua te miita buburaia.

¹⁶ Ao e karaoi b'aran tabon taiani boua ake mai eta aika uoua te miita rietaataia aika taiani buraonti.

¹⁷ Ao a katamaroaaki tabon boua akekei n itirinanin bannan taian tiein,

¹⁸ ma uoua bannan taiani bamkuranete.

¹⁹ Rietaatan b'aran tabon bouan taiani kaman bon 2 te miita ao kaanga taraan taiani kiebu.

²⁰ A mena bannan taian tiein ake i aon b'arani boua i tabon raoi mronronin tabon taiani boua ake uoua, ao 200 m'aitin taiani bamkuranete aika a rinan raoi i aon tabon b'aran te boua.

²¹ Ao e karaoi uoua te boua Iram b'a teaina n iteran mataroan te Tembora are teuana, ao teaina n iterana are teuana. E aranaki te boua are n iterana mai maiaki b'a Iakin, ao aran are teuana n iterana are mai meang boni Boaati.

²² Ao i tabon taiani boua boni b'araia aika ai aroni kiebu. Ao ikai are e a bane iai m'akurian taiani boua.

²³ E boni karaoa naba te boora ae e buubura Iram, ao e aranaki te boora arei b'a Taari. Boni uoua te miita rietana mai kabina nako mataniwiina i eta, ao e kaaniia 5 te miita rababana, ao 15 te miita mronronna.

²⁴ Uoua rinanin taiani katamaroa aika buraonti ni katobibia mataniwiin te boora, ao tebwina taiani katamaroa ni katoa 45 te tientemiita.

²⁵ E toka te boora arei i aon 12 katotongan taian kaom'aane. Ao a kaaitaraa mainiku, maiaki, meang, ao maeao kakateniman mai buakoia.

²⁶ Matenin te boora bon 10 te tientemiita, ao mataniwiina kaanga baan te uee aika a b'aoua nako tinaniku. M'aitin kanoan te boora bon 50,000 te riita.

²⁷ Ao e karaoi taian nangoa aika a konaa ni kabuubutaki Iram aika taiani buraonti aika uoua te miita rietaataia, uoua te miita ab'akiia, ao uoua te miita rababaia.

²⁸ Ao e karaoi rarikiia aika buraonti aika a raababa aika a kai mataniwiiaki, ao a katamaroaaki ni bannan taiani uee.

²⁹ A katamaroaaki taiani buraonti ake a raababa akekei ni bannaia raian, kaom'aane, ao b'aai ake iai baiia ni kiba.

³⁰ Iai wiran nangoa akekei aika kakaaeai n tatabeua nako ao kakateuana naba kanoaia ni katoai wiirana, ao a minomino naba i aona, ao teina ae e mronron ae 65 te tientemiita buburana ae e kamatoaaki ni buraonti aika aua aika kaka 45 te tientemiita rietaataia.

³¹ Ao iai te boora ae e uarereke ae e toka i aona i nanon te mataniwi. A katamaroaaki n tamnein taiani uee, ao e katamaroaaki mataniwiina n tamnei aika taiani katoto. A tikuea taiani buraonti ake a raababa ake i rarikina,

³² ao a mena i aana taiani wiira ma taiani kanoa. Rietan taiani wiira bon 65 te tientemiita

³³ ao kaanga ai aron taraan wiirani kaanibuaka ake a katikitikaki irouia taian aoti. A karaoaki bitiia are e tomai wiira ma nainaiia, ma waitekeia, ma kanoaia n taiani buraonti.

³⁴ Ao iai te b'ai ni katamaroa i aon mronronin taubukin taian nangoa akekei ae 20 te tientemiita terenakona ni katobibia, ao iai aua taiani b'ai n tautau.

³⁵ Ao a nim buraonti ake a raababa ma kainikamatoa ma taian nangoa,

³⁶ ao a katamaroaaki n tamnein taiani uee, ao bannan taian raian, baam, ao mannikiba.

³⁷ Ao e karaoi tebwina nangoa n te b'ainikab'aro ae ti teuana Iram n te aro are ti te arona buuburaia ma teia.

³⁸ Ao e karaoi naba tebwina boora aika a uarereke riki nakon are e buubura Iram, teuana i bukin teuana te nangoa. Bon uoua te miita buburan boora akekei n tatabeua nako, ao a konaa ni kanoaaki n te m'aiti ae 100 te riita.

³⁹ E katikui nangoa ake nimaua ni iteran te Tembora are maiaki, ao nimaua n iterana are meang, ao te boora are e buubura ni koonan te Tembora are maiaki mainiku.

⁴⁰ Ao e karaoi naba taian baan Iram i bukin mannang aika a kabuebue, ao e karaoa naba te tiabora ao taiani boora ni katimtim. Aikai b'aai aika buraonti ake e karaoi Iram i bukin Ana Tembora te UEA:

Tauani Mwiin B'aai Ni Kabane Inanon Te Tembora

⁴¹ Uaai boua, uoua b'aran taboni boua aika tein te boora; uoua bannan taian tiein i aon taiani b'ara;

⁴² 400 bannan taiani bamkuranete i bukin bannan te tiein. Ao iai te b'ai ni katamaroa i aon mronronin taubukin taian nangoa akekei ae 20 te tientemiita terenakona ni katobibia, ao iai aua taiani b'ai n tautau.

⁴³ Tebwina taian nangoa aika a konaa ni kabuubutaki; tebwina boora aika a uarereke nakon ake a buubura ake b'ain taian nangoa;

⁴⁴ teuana te boora ae e buubura; tengaun ma uoman katotongan taiani kaom'aane aika e toka te boora i aoia;

⁴⁵ baanin taiani mannang, ao taian tiabora, ao boora ni katimtim. E karaoi b'aai aika buraonti Iram i bukin Toromon

⁴⁶ i rarikin te karaanga are te Ioretan i marenan Tukota ma Taretan. E karaoi ni kab'aroa te buraonti ae kararaki nako nanon te b'ai ni kab'aro ae e karaoaki man te tano ae e ibe.

⁴⁷ A bon rangi n rawata b'aai aika buraonti aika e aki tabeakin Toromon n tau mwiin rawawataia, ao bon akea ae e roko n te ataia b'a iraua te buraonti aika a tia ni kamanenaaki.

⁴⁸ Ao aikai b'ain nanon te Tembora ake e tuatua Toromon b'a a na karaoaki man te koora: te baonikarea; te taibora are e totoka i aona te kariki are e tabu;

⁴⁹ Tebwina kaintein te taura ake a katukaki i matan te tabo are Moan te Tabu; katotongan taiani uee, ao taian taura ma m'anai aika koorai;

⁵⁰ m'angko; b'ain tiringan te taura; ao boora ni katimtim aika a uarereke; rauraun te b'ai ni kaboiarara; baanin te ai; ao ai intitin mataroan te tabo are Moan te Tabu ao te ru are te kabanea ni buubura n te Tembora.

⁵¹ Ao ngke e a bane karaoan ana Tembora te UEA, ao e a kaaki i nanona b'aai ni kabane Toromon ake e a tia ni katabui tamana are Tawita i bukin te UEA, n ikotaki ma te koora ao te tirewa i nanon te ruunib'ai.