1.Uea 21 - Te B'aib'ara

Tiringakin Naabota Iroun Nei Ietebera

¹ Iai ana onaroka ni kureebe Naabota ae e mena i rarikin ana bareti Aaba i Ietireera.

² Ao n te bong teuana ao e a taku Aaba nakon Naabota, “Naabota. E rangi ni kaan am onaroka ni kureebe ma au bareti. I butiko b'a ko na anganai b'a N na karaoia b'a au onarokau i bukin kainam'arake aika a uarereke. N na manga anganiko te onaroka riki ae e raoiroi riki nakon anne, ke N na anganiko boona are ko bon tangiria b'a am b'ai.”

³ Ao e taku Naabota, “I bon aki konaa n anganiko b'a aia onaroka au bakatibu.”

⁴ Ao e a okira mwengana Aaba ma te marakinnano ao te rawawatannano i bukin ana taeka Naabota ake e taekin nakoina. E wene i aon ana kainiwene ni kaaitaraa te o ma n rawa n am'arake.

⁵ Ao e rin Nei Ietebera ni kawaria ao e titirakinna ni kaangai, “Tera ae e riki? E aera ngkai ko rawa n am'arake?”

⁶ Ao e taku Aaba, “I bubutiia Naabota b'a e na kabooa ana onaroka ni kureebe nako iu ke N na anganna ae e tamaroa riki. Ao e tuangai b'a e aki kona n anganai.”

⁷ Ao e taku Nei Ietebera, “Tiaki te uea ngkoe? Teirake man am kainiwene ao am'arake. N na anaa ana onaroka Naabota i bukim.”

⁸ Ao e kororeta Nei Ietebera nakoia taani kairiiri n tatabemaniia nako n te kaawa are e maeka iai Naabota.

⁹ Ao e kaangai kanoan ana reta: Weteia aomata ni kabane, ao tuangiia b'a a na aki am'arake n te bong aei. Ao ngkana a bane ni ikotaki ao katekateka Naabota mai i moa.

¹⁰ Ao karekeia uoman aomata aika taani kewe aika a na mena i rarikin Naabota ni kaaitaraa ao a na taetae n tuea b'a e a tia Naabota n taetaebuaka te Atua ao te uea. Ao i mwiina, kaotinakoa Naabota ao karebanaia n taian atiibu ni karokoa matena. Ao e tiainaa n aran Aaba ao e titamb'anna naba n ana titamb'a. Ao e a kanakoa nakoia taani kairiiri n te kaawa.

¹¹ Ao i mwiin reken ana reta, ao a karaoi raoi b'aai ni kabane ake e taekin.

¹² Ao a tuangiia aomata b'a bon te bong n aki am'arake, ao ngke a bane ni ikotaki, ao a katekateka Naabota i moa.

¹³ Ao a bukinna ni taetaebuaka te Atua ao te uea, ma ngaia are, a uaakinna aomata nako tinaniku ao a karebanaia n atiibu ni karokoa matena.

¹⁴ Ao a kaoka te rongorongo taani kairiiri nakon Ietebera ae e kaangai, “E a mate Naabota.”

¹⁵ Ao ngke e reke te rongorongo iroun Nei Ietebera, ao e taku nakon Aaba, “Ko a konaa ngkai ni b'aina te onaroka ni kureebe are e rawa Naabota ni kabooa ngkoa nakoim. E a mate.”

¹⁶ Ao e teirake Aaba ao e nako n anaa te onaroka ni kureebe arei.

Kabuakakan Aaba Iroun Eria

¹⁷ Ao E taku te UEA nakon Eria are te burabeti,

¹⁸ are e mena uean Iteraera are Aaba n ana onaroka ni kureebe Naabota n te tai aei, b'a e a anaia b'a a na nne n aroka.

¹⁹ Ko na nako n tuangnga au taeka ae e kaangai, “Aaba ko tiringa Naabota ao ko anaa ana b'ai. Ma ngaia are, n te tabo are e neweneweaki iai raraan Naabota irouia kamea, ao e na manga neweneweaki naba iai raraam.” Ao ngke e reke iroun Eria,

²⁰ ao e taku Aaba, “Au kairiribai, I a reke raoi iroum ngkai.” Ao e taku Eria: Eng, ko a reke irou. Aaba, ko a tia ni kataia ni karaoi b'aai aika E aki kukurei te UEA iai.

²¹ Ma ngaia ae, ko na katuaaeaki. A na bane n tiringaki ataei ni m'aane ni kabane akana n am utu, b'a tao te toro ke te inaomata.

²² A na kamaunaaki ni kabane am utu, n aron ana utu te uea are Ieroboam ao te uea are Baatia. Ko a tia n rangi ni kauna te UEA n am bure ao ko karekeia Iteraera n te bure.

²³ Ao i bukin Nei Ietebera, a na kana rab'atana taiani kamea i Ietireera.

²⁴ A na kana rab'ataia am koraki ake a mate i nanon te kaawa taiani kamea, ao a na kanaki rab'ataia ake a mate i tinanikun te kaawa irouia taiani ikare ake taiani kia.

²⁵ Akea te aomata n aron Aaba, ae e kabonakoa i bukin karaoan te buakaka i matan te UEA, ao ni kairoroaki iroun buuna ae Ietebera.

²⁶ E anuanna n te anua ae moan te buakaka, ae te taromaurii bouananti, ae te anua ae a anuanna naba ngkoa Amoraite, ao a teweaki nako iroun te UEA mai m'aaia Iteraera.

²⁷ Ao ngke e ongo aei Aaba, ao e raeuaaka ana kunnikai ao e karin i aona taiani baeki aika a mangaingai ni bong ao ni ngaina. E rawawata nanona ao e aki am'arake.

²⁸ Tabeua te tai i mwiina, ao E taku te UEA nakon Eria,

²⁹ “Ko noora raraoman Aaba n te b'ai ae e a tia ni karaoia? N na aki katuaiia ana utu ngkai e maiu. N na tataninga ni karokoa te tai are e uea iai natina te m'aane.