1.Uea 2 - Te B'aib'ara

Ana Taeka N Reirei Tawita Nakon Toromon

¹ Tabeua te tai i m'aain maten Tawita ao e taetae nakon Toromon:

² Natiu i aoni kawaiu ni mate n aroia aomata nako ma I tangiriko b'a ko na korakora ma n ninikoria.

³ Karaoi b'aai ni kabane akana E tuangko te UEA, ao tou mwiin Ana reirei. Ongotaeka ni b'aai ni kabane akana a koreaki n Ana tua Moote. Ane ko na tetekeraoi e aoria ngkana tao tera ae ko karaoia, ke tao ko nakon te tabo teuana.

⁴ Ko riai ni kakaonimaki n taai nako nakon te UEA ngkoe ma am kariki. Ngkana ko karaoa anne, ao ane E na kaawakina te berita aei ae E karaoia ma ngai b'a a na uea n taai nako ara utu i aon Iteraera.

⁵ Toromon, ko na aki m'aninga te b'ai are e a tia ni karaoia Ioaba nako iu ngke e tiringa Abenera are natin Nara te m'aane, ao Amata are natin Ietera te m'aane are, mataniwiin te taanga ni buaka i Iteraera ake uoman. E tiringiia kaanga ai aroia kairiribai n te bo ni buaka, ma e boni karaoa aei n tiaki tain te bo ni bo ni buaka. E bon reke n te bure, ao e bon nakoim katuaaeaia

⁶ n aron am kabanea n tamaroa. Ngkana tao ko iraaniia, ao ko na aki kariaia b'a a na mate ma te rau ni kauia karaia.

⁷ E buokai natin B'aretirai te m'aane are kaain Kireata ngke I birinako mairoun tarim are Abetarom. Ko na akoia, ao kariaia b'a e na am'arake n am taibora.

⁸ Ko na riai ni karaoa te b'ai teuana nakon Timei are natin Kera te m'aane are kaain Baurim are n abaia kaain te baronga are Beniamin. B'a e a tia ni karereantiai, ma ni karawawataai n te bong are I nako Maanaim iai. Ma rimwi, ngke e a manga roko n te karaanga are te Ioretan ao I berita b'a N na aki tiringnga.

⁹ Ma ngaia are ngkai, ko na riai ni katuaea. E a boni m'aane, ma ngkoe, ko a wanawana n ataa arom ni kamatea.

Maten Tawita

¹⁰ E uea Tawita i aon Iteraera i nanon 40 te ririki. E uea i Eberon i nanon itiua te ririki, ao e uea i Ierutarem i nanon 33 te ririki.

¹¹ I mwiina, e mate ao e taunaki i Ierutarem.

¹² E a manga uea natina te m'aane are Toromon ao e a tautaekana abanuean Tawita.

Tiringakin Atoniia

¹³ Ao e m'ananga Atoniia n te bong teuana ni kawara Nei B'atateb'a, are tinan Toromon, ao e taku Nei B'atateb'a nakoina, “Tera rokom aei, te iraorao?” Ao e taku, “Eng.

¹⁴ I bon roko b'a I kani maroroo ma ngkoe.” Ao e taku neierei, “E tamaroa, ao uotiko.”

¹⁵ Ao e taku Atoniia, “Ko bon ataia b'a I uea ngkoa i nanon ti tabeua te tai, ao a bane Iteraera ni kariaia b'a N na uea, ma E tangira tariu te Atua b'a e na uea, ao ngkai a bane n tia ni bitaki b'aai ni kabane.

¹⁶ I butiiko, ko aki konaa ni buokai?” Ao e taku Nei B'atateb'a, “Tera ae ko iangoia?”

¹⁷ Ao e taku Atoniia, “I butiiko b'a ko na taetae nakon Toromon ni buubutiia b'a e na kariaia b'a N na iein ma Nei Abitiaka b'a e ongongo riki iroum.”

¹⁸ Ao e taku neierei, “E tamaroa. N na butiia anne.”

¹⁹ Ao ngke e a nako Nei B'atateb'a ni kawara Toromon, ao e teirake Toromon ngke e roko tinana, ao e boobaraaki nakoina. E tekateka ao e kawaekoa teuana riki te kaintokanuea i bukin tinana b'a e na tekateka i angaataina.

²⁰ Ao e tekateka Nei B'atateb'a ao e bubutiia ni kaangai, “Iai au buubutii ae e uarereke?” Ao e taku Toromon, “Ani bon ti taetae naba b'a I a karaoa naba ane ko taekinna.”

²¹ Ao e taku neierei, “Taiaoka ni kariaia tarim are Atoniia b'a e na iein ma Nei Abitiaka.”

²² Ao e taku Toromon: “Tera, N na kariaia b'a e na iein karimoau ma Nei Abitiaka? Ti te bo ngke ko butiai b'a e na tautaekana te abanuea. E aera ngkai ko aki buubutii i bukiia Abiata ao Ioaba?

²³ I tuea n aran te UEA b'a e na tiringaki Atoniia i bukina ngkai e buubutii n aron aei. Ao ngkana e aki tiringaki, ao I tataro b'a E na katuaaeai te Atua.

²⁴ E kaueaai te UEA n onea mwiin tamau, ao E berita b'a a na uea i aon Iteraera aomata aika man ara utu. Eng, I tuea n aran te UEA b'a e na tiringaki Atoniia n te bong aei.”

²⁵ Ao e takaarua Toromon ni kaangai, “Benaia. Naako tiringa Atoniia.” Ao e mate Atoniia.

²⁶ Ao e kanaanako wetean Abiata are te ibonga te uea are Toromon, ao e taku: “Abiata naako okira mwengam i Anaton. Ko riai n tiringaki naba, ma I aki kani karaoia ngkai. Ngke e uea ngkoa tamau are Tawita, ao ko tararuaa ngkoa te Atiniberita, ao ko ri nanon taai aika a kaangaanga n taai aika a bati ngkoe ma tamau.”

²⁷ Ao Toromon e kabanea Abiata man te nakoa ni ibonga i bukin te UEA. Ao ikai are e a koro naba iai bukin baike E taekin te Uea i Tiro i bukin te ibonga are Eri ma kanoana.

²⁸ E aki buoka Abetarom teuare Ioaba b'a e na riki b'a te uea, ma e buoka Atoniia. Ma ngaia are, ngke e a ataia Ioaba b'a e a tia n tiringaki Atoniia, ao e biri nakon te Um'antabunrianna ma n taui ni kamatoai koonan te baonikarea ake aua.

²⁹ Ao ngke e ongo aei Toromon, ao e kanakoa te aomata temanna b'a e na titirakina Ioaba ni kaangai, “E aera ngkai ko biri nakon te baonikarea?” Ao e kaeka Ioaba ni kaangai, “B'a I maakuko ngaia ae I biri nakon te UEA b'a E na kamanoai.”

³⁰ Ao e biri nakon te Um'antabunrianna Benaia ao e takaarua ni kaangai, “Ioaba, e taku te uea b'a ko na otinako mai ikanne.” Ao e taku Ioaba, “I aki, ma nakomai tiringai ikai.” Ao e okirikaaki Benaia ao e tuanga Toromon ana taeka Ioaba.

³¹ Ao e taku Toromon: “Karaoa te b'ai ane e taekinna Ioaba. Tiringnga ao taunna, b'a I aonga n aki bukintaeka ma au utu n tiringakin te mataniwi n tautia n ana taanga ni buaka Iteraera are Abenera, ao nakon naba Amata are te kam'aanta n te bootaki n tautia i Iuta.

³² E tiringiia m'aane aika akea aia bure n te aro ae e aki ataaki iroun tamau. A raoiroi riki m'aane aikai nakon Ioaba.

³³ A teimatoa n tekebuaka ana utu Ioaba i bukin ana m'akuri are e a tia ni karaoia, ma E na kakab'aia ana utu Tawita n taainako, ao e na waaki ueana i nanon te rau.”

³⁴ Ao e okirikaaki Benaia n tiringa Ioaba. Ao e uotakinako rab'atana n taunaki i rarikin ana auti n te rereua.

³⁵ Ao Toromon, e katea Benaia n onea mwiin Ioaba b'a manga te kam'anta n te bootaki n tautia, ao e kateirakea Tatoka b'a te ibonga n onea mwiin Abiata.

³⁶ Ao e kanaanako wetean Timei ao e taku nakoina, “Karaoa te auti teuana i Ierutarem ikai ao maeka iai. Ko na aki manga kikitana ara kaawa aei.

³⁷ Ko na tiringaki ngkana ko kataia n ri nanon te M'arua are Kiteron ma ni kiitana Ierutarem. Boon am bure anne.”

³⁸ Ao e kaeka Timei ni kaangai, “E rangi n raoiroi te uea ae ko karineaki. N na karaoa anne.” Ma ngaia are, e a maekana Ierutarem Timei n te tai ae maan.

³⁹ Tao e kaaniia tenua te ririki i mwiina, ao a biri nako naba uoman ana m'aane Timei nakon uean Kate are Akiti. Ao ngke e a atai mwiia Timei ae a mena i Kate,

⁴⁰ ao e a tokara naba ana aati n rimwiia. Ao a reke i rouna ao e kairiia nako Ierutarem.

⁴¹ Ao e tuangaki Toromon iroun te aomata temanna taekan Timei b'a e a tia n nako Kate ao e a tia ni manga oki.

⁴² E kanaanako weteana Toromon, ao e taku nakoina: “Timei, ko a tia ni berita n aran te UEA b'a ko na aki kikitana Ierutarem. I a tia ni kauringko b'a ko na boni mate ngkana ko karaoa aei. Ao ko kariaia, ao ko taku b'a e raoiroi. Ngaia anne?

⁴³ Ko a tia n ongotaeka irou, ao ko a tia naba n urua am berita are ko karaoia nakon te UEA.

⁴⁴ I taku b'a ko bon atai b'aai aika a buakaka ake ko a tia ni karaoi nakon tamau are Tawita. Ao ngkai E nang katuaaeko te UEA i bukin te b'ai are ko a tia ni karaoia.

⁴⁵ Ma E boni kakab'aiaai te UEA ma ni kakorakoraa abanuean tamau n aki toki.”

⁴⁶ Ao e takaarua Toromon ni kaangai. “Benaia, tiringa Timei!” Ma ngaia are, e a mate Timei. Ao e a tab'anin raoi ana tautaeka Toromon i aon abanueana n te tai anne.