1.Uea 15 - Te B'aib'ara

Uean Iuta are Abiiam

¹ E uea Abiiam i aon Iuta i nanon ana ka 18 n ririki Ieroboam ni uea i aon Iteraera,

² ao e tautaeka mai Ierutarem i nanon tenua te ririki. Tinana bon Nei Maaka are natin Abetarom te aine.

³ E aki rangi ni kakaonimaki Abiiam nakon te UEA ae Atuana n aron ae a tia ni karaoia ana bakatibu are Tawita, ma e bon aki toki ni bubure n aron tamana are Roboam.

^4-5 E ongongotaeka n taai nako Tawita nakon Ana mwioko te UEA ngke e kakaraoa e eti, ma ti are ngke e anaa buun Uria. Ma E bon kakaawakina naba Ierutarem te UEA i bukina ngke bon tibutorun Tawita teuare Abiiam, ao E angan Abiiam natina te m'aane are e na manga onea mwiina.

⁶ Ao e bon reitinako naba te bubuaka are e riki ngkoa i marenaia Ieroboam ma Roboam n ana tai ni uea Abiiam.

⁷ A bane b'aai ni kabane ake e karaoi Abiiam n ana bongi ni maiu ni koreaki n te boki are Rongorongoia uean Iuta.

⁸ Ao e mate Abiiam ao e taunaki i Ierutarem, ao e a manga uea natina are Ata.

Uean Iuta Are Ata

⁹ Ao e a manga uea Ata i aon Iuta n ana kauangaun n ririki n uea, ao n tautaeka Ieroboam aon Iteraera,

¹⁰ ao e uea i nanon 41 te ririki ma Ierutarem. Tibuna te unaine bon Nei Maaka are natin Abetarom te aine.

¹¹ Ao e ongeaba Ata iroun te UEA n aron are e karaoia Tawita.

¹² E kanakoia ainen matawaan taiani baangota ni kanakoia man te aba, ao e kamaunai bannan anti ake a karaoi ngkoa ana bakatibu.

¹³ E boni karaoa naba bannan Nei Aatera tibuna are Nei Maaka, ao e anaia Ata ni kabuokia n te M'arua are Kiteron. Ao i mwiina, e kab'aka tibuna man nnena are te ueanaine ae te tina.

¹⁴ Ao e kakaonimaki Ata nakon te UEA ni kabane bongin maiuna, e ngae ngke e aki kamaunai baangotan te aba.

¹⁵ E kaaki i nanon te Tembora koora ma tirewa ake e a tia ngaia ma tamana ni katabui nakon te UEA.

¹⁶ E aki toki ni bubuaka te uea are Ata ma uean Iteraera are Baatia

¹⁷ Ao n te tai teuana, e a niniia Iuta uean Iteraera are Baatia man taua te kaawa are Ram'a. Ao e a moana kamatoaan riki te kaawa, n te aro b'a e aonga ni konaa ni kamenakiia ana tautia ikekei n te aro b'a a aonga n toki aomata man te rin ao te otinako mai Iuta.

¹⁸ Ao ngke e ongo aei Ata, ao e anaa te koora ma te tirewa man ana bareti ao man ana Tembora te UEA. E anganiia tabeman ana aobitia ao e kanakoia nako Tamateko ma te rongorongo nakon uean Turia are Benatata ae e kaangai:

¹⁹ “A tia ni karaoa te boraraoi n raoi tamara. Ao e aera ngkai ti aki katotongiia? Ao aikai taiani b'aintangira nakoim aika koora ma tirewa. Ma ngaia are, ko konaa n urua am boraraoi n raoi ma Baatia b'a e aonga ni kiitana abau?”

²⁰ Ao Benatata, e karaoa te b'ai are e buubutii iai Ata ao e kanakoia tautian Turia nako Iteraera. A taua te kaawa are Iion, Taan, ao Abera-Betamaaka, ao aban Kinnerota ao Nabetari.

²¹ Ao ngke e ongo arei Baatia, ao e kiitana Ram'a ao e oki nako Tireta.

²² Ao e tuangiia aomata ni kabane i Iuta b'a a na uotinako ni kabane atiibu ma kaai ake e kaboonganai Baatia are e kamatoa te kaawa iai. Ao e kaboonganai atiibu ma kaai naba akekei ni kamatoa iai te kaawa are Keeb'a are n aban Beniamin ao te kaawa are Mitib'a.

²³ A bane ni kaawakinaki rongorongon b'aai ni kabane ake e karaoi Ata i nanon ana tai ni uea, n reitaki ma tokanikaina n te buaka, ao kaawa ake e a manga karaoi n te boki are Rongorongoia Uean Iuta. E reke aorakin waena ngke e a kara.

²⁴ Ao e mate Ata ao e taunaki n ruanimateia ana bakatibu i Ierutarem. E a manga uea natina are Iotiab'ata.

Uean Iteraera Are Nataba

²⁵ Ao e uea Nataba are natin Ieroboam i aon Iteraera n ana kauoua n ririki ni uea Ata i aon Iuta, ao e uea i nanon uoua te ririki.

²⁶ Ao e aki ongotaeka Nataba nakon te UEA ngke e karaoa naba katotongan ana m'akuri ae e buakaka tamana, are e a tia ni karekeia Iteraera n te bure.

^27-28 Baatia bon natin Aiia are kaain te baronga are Itaakara, are e karaoa baairean tiringan Nataba. Ngke e m'ananga Nataba ma ana taanga ni buaka b'a a na buakana te kaawa are Kibeton i Biritia, ao Baatia e tiringa Nataba ikekei. Ma ngaia are, n ana katenua n ririki Ata ni uea, ao e riki b'a te uea Baatia i aon Iteraera.

²⁹ E kaangai ngkoa ana taeka Ana burabeti te UEA are Aiia, Bon akea temanna mai buakoia m'anen ke ataeinim'aanen ana utu Ieroboam ae e na tiku ni maiu. Ma ngaia are, ni bon te tai are e uea iai Baatia, ao e kabaneia n tiringiia ana utu Ieroboam,

³⁰ i bukina ngke e a tia ni kauna UEAN Iteraera ae te Atua Ieroboam ngke e bure are e a karika naba iai Iteraera b'a taani bure.

³¹ A bane ni koreaki b'aai ni kabane ake e karaoi Nataba n ana tai ni uea n te boki are Rongorongoia Uean Iteraera.

³² A aki toki ni bubuaka uean Iuta are Ata ma uean Iteraera are Baatia.

Uean Iteraera are Baatia

³³ Baatia bon natin Aiia are e riki ni uea i aon Iteraera n ana katenua n ririki ni uea Ata i aon Iuta, ao e uea mai Tireta i nanon 24 te ririki.

³⁴ E aki ongotaeka naba Baatia nakon te UEA ngke e katotonga Ieroboam, are e karekeia Iteraera n te bure.