1.Uea 12 - Te B'aib'ara

Kaitaran Reoboam Irouia Tabeman Aomata

¹ Ao e m'ananga nako Tekem Reoboam ike a babane n tataninga iai aomata b'a a na kauea.

² Ao e ongo te b'ai are e riki Ieroboam are natin Nebata, ao e tiku i Aikubita, te tabo ike e karabaa ngkoa iai mai iroun Toromon.

³ Ma a kanakoa aia rongorongo kaain barongan Iteraera Meang ni kawaekoa. Ao i mwiina a bootaki ni kawara Reoboam ao a taku,

⁴ E kairoroira tamam are Toromon b'a ti na m'akuri korakora. Ma ngkana ko kabebetei riki ara m'akuri, ao ti na bon m'akuri i bukim ma ni karaoi b'aai ni kabane akana ko na tuangiira.

⁵ Ao e taku Reoboam, “Kam na anganai au tai ni iangoa kaekaana i nanon tenibong, ao kam a manga oki b'a ti na tuangngkami boona.”

⁶ Ao e nako Reoboam ni kawariia taani kairiiri ake a tia n riki b'a ana mataniwi n aobitia ngkoa tamana ao e titirakiniia, “Tera ae N na taekinna nakoia aomata akekei?”

⁷ Ao a taku, “Ngkana ko tangiriia b'a a m'akuri man ongotaeka iroum, ao ira nanon ane a butiiko n te bong aei. Tuangiia b'a ko na kabebetea aia m'akuri.”

⁸ Ma e aki kan n ongo Reoboam n aia taeka, ao e a manga kawariia rorobuaka n ataei ake a kaai n rikirake ma ngaiia ake a riki ngkai b'a ana aobitia.

⁹ Ao e taku nakoia, “Tera ami iango n te b'ai ae N na riai n taekinna nakoia aomata aika a butiai b'a N na kabebetea aia m'akuri?”

¹⁰ Ao e taku aia taeka rorobuaka n ataei akekei: “Ao aei ara iango n te b'ai ae ko riai n taekinna nakoia: ‘I matoatoa riki nakon tamau.

¹¹ Ma ngaia are tuangiia, ‘E kam'akuri korakoraingkami ma ngai N na rangi ni kakorakorai riki ami m'akuri. E kataerei ngkami ni kainikataere, ma ngai N na kataerei ngkami ni kainikataere aika iai baika a kakang n nim iai!’ ”

¹² Ao i mwiin tenibong ao a oki Ieroboam ma raona tabem'aang.

¹³ E aki m'annanoa aia taeka ni buobuoki unim'aane Reoboam.

¹⁴ E taetae ni kaitaraia n aki karariki teutana man tuangiia aia taeka ni buobuoki ana taani buobuoki ao e taku: “E kam'akuri korakorai ngkami tamau, ma ngai N na rangi ni kam'akuri korakorai ngkami riki. E kataerei ngkami ni kainikataere ao ngai N na kataerei ngkami ni kainikataere aika iai m'akoro ni biti aika a kakang aika a nim iai!”

^15-19 Ao ngke a ataia aomata b'a e aki kan ongo Reoboam irouia ao a takaarua ni kaangai, Ti na aki kakaonimaki nakon ana utu Tawita. Ti a kona ni karaoa are ti bon tangiri, nakomai Iteraera. Ti a okira mwengara. Ke e bon tautaekaniia ake bon oin ana botannaomata Reoboam. E mataniwi Atoram i aoia reib'a ake a kam'akuraki ma te matoa, ao e kanakoaki iroun Roboam b'a e na taetae nakoia aomata. Ma a karebanaia aomata n te atibu ni karokoa matena, e a manga birinako Roboam nakon ana kaa ni buaka ao e kawaekoaa n okira Ierutarem. Ma ngaia are, a okira mwengaia aomatan te baronga are meang mai Iteraera, ao a katuka Roboam b'a e na tii tautaekaniia kaain te kaawa are Iuta. Ao a teimatoa aomatan Iteraera ni moa man te bong anne ni kakaitaraa ana utu Tawita i Iuta. A bane n riki b'aai aikai n aron are e tia n tuanga Ieroboam ana burabeti te uea are Aiia.

²⁰ Ao ngke a ongo Iteraera ae e a oki Ieroboam, ao a butiia aomata ni kabane b'a a na boowi. Ao i mwiina ao a kanaanako wetean Ieroboam ao a karikia b'a uean Iteraera. Bon tii kaain te baronga are Iuta ae e teimatoa ni kakaonimaki nakon ana utu Tawita.

E kauringaki Roboam iroun Temaia

²¹ Ao i mwiin okin Roboam nako Ierutarem ao e iangoia b'a e na buakana Iteraera mani kabanea n tautaekana te aba arei. Ma ngaia are, e weteia 180,000 tautia man te baronga are Iuta ao Beniamin.

²² Ma e roko ana taeka te Atua iroun Temaia are te burabeti n te tai naba arei.

²³ B'a e na anga te kauring nakoia kaain Iuta ao Beniamin ae e kaangai:

²⁴ “Kam na aki nako ni buakaniia aomatan Iteraera-bon ami koraki. Nako okirii mwengami. Bon te UEA ngai, ao I bon kariki baikai.” Ao e ongo taeka Roboam ma ana taanga ni buaka, ao a okirii mwengaia.

E karaoi bitaki n te aro Ieroboam

²⁵ Ao e a manga katea Tekem i Eberaim Ieroboam mani karikiia b'a te kaawa ae e matoatoa riki nakon are mai i m'aaina, ao i mwiina e a m'aing nako ikekei. E nonoa naba te kaawa are Benuera.

^26-27 Ao e tabe ni iango Ieroboam n te bong teuana ao e taku, A teimatoa ni babane nako Iteraera nakon te Tembora are i Ierutarem man anga aia karea nakon te Uea. E na bon riki b'a te kaangaanga teuana ngkana a manga moana aia kakaonimaki nakon Tawita. A na tiringai man riki b'a ana aomata Roboam b'a aia uea.

²⁸ Ao e bubutiia taan iango b'a a na buokia n tuanga arona, ao i mwiina, e a karaoi uoua taiani kaoteteei aika koora. E kaoti nakoia aomata ao e taku, “Kakauongo aomata ni kabane. Kam a riai n aki manga nako Ierutarem n taromauri. Ao aikai atuami ake a kamaiungkami mai Aikubita.”

^29-30 Ao i mwina, e katuka te kaoteteei te koora are teuana n te kaawa are Betaera. Ao e katuka are temanna n te kaawa ae Taan, ao a m'ananga aomata rimoan te kaoteteei ngke e uotaki nako ikekei. Bon te bure ae moan te kakaiaki te b'ai are e tia ni karaoia Ierutarem.

³¹ Ao e karaoi taabo n taromauri aika a uarereke n taian baangota. Ieroboam, ao e rineia m'aane aika akea rekerekeia ma te baronga are Rewi b'a a na m'akuri b'a ibonga.

^32-33 Ao e manga iangoa naba te bong n toa ae e boou i bukiia Iteraera n te bong ae tebwi ma nimaua bongin te kawanua n nam'akaina, kaanga aron are e kakaraoaki i Iuta. Ao n te bong anne, e nako iai Ieroboam nako Betaera ao e anga iai ana karea iai i aon te baonikarea nakon te kaoteteei are te koora are e a tia ni katikua ikekei. Ao i mwiina, e a anganiia ibonga tib'angaia nako.