1.Timoteo 5 - Te B'aib'ara

Te Aroaro ae Riai nakoia Tem'angina

¹ Ko na tai boaa ane e a unimm'aane, ma ko na anganna am taeka ni buokia b'a kanga tamam. Ko na reitaki ma rorobuaka b'a kanga tarim,

² ao unaine b'a kanga tinam; ao ko na reitaki n te aro ae itiaki ma ateiaine b'a kanga m'anem.

³ Ko na karineia n akoia aine aika boni kananoanga ni koaua ngkai a mate buia.

⁴ Ma ngkana iai natin ke tibun te aine ae kananoanga ae e mate buna, ao a na reireiaki moa aroia ni karaoi tabeia aika a aanaki n ana kaantaninga te Atua nakoia oin aia utu, ma ni kabooa akoakiia irouia aia karo ma tibuia: b'a e riai aei i matan te Atua.

⁵ Ao te aine ae kananoanga ni koaua, ngkae e mate buna ao e tiku n ti ngaia, e mwiokoa te Atua ni maiuna, ao e botum'aka n tatataro ni bubuti n te bong ao n te ngaina.

⁶ Ma te aine ae ti te kani kakukureia rab'atana, e boni ngae ngke e maiu, ma e mate.

⁷ Ko na tuangiia baikai, b'a a aonga n aki kabuakakaki.

⁸ Ma ngkana e aki karekei baika riai te aomata i bukiia ana koraki, ao ai moa ra riki i bukin oin ana utu, ao kaotana b'a e a kaaki taekan te onimaki, ao e a buakaka riki nakon are tiaki te tia onimaki.

⁹ E na koreaki aran te aine ae e mate buna i buakon araia aine aika a mate buia ngkana e a koro onongaun ana ririki, ao te aine ngaia ae ti teuana ana tai ni mareaki;

¹⁰ ao e kakoauaki b'a te aine ngaia ae kakaraoi m'akuri aika raraoi, n arona ni kaikawaia natina, n akoia iruwa, n teboki waeia raona ni Kristian, ni buokiia aika rawawata, ao n arona ni botum'aka ni karaoi m'akuri aika raraoi ni kabane.

¹¹ Ma ko na tai korei araia ateiaine aika a mate buia i buakon araia aine aika a mate buia; b'a n te tai are e roko iai nanoia ae korakora ni kan iein, ao ane a na rairaki nako mairouni Kristo;

¹² ao a reke kabuakakaia iai, i bukina ngkai a urua aia taeka ni bau nakoni Kristo.

¹³ I rarikin anne, ao a reireiia naba te aro ni kabane tai n aroia ni kawara te auti teuana ma teuana; ao a aki tii kabane tai n aroia anne, ma a bon riki naba b'a taan ua-taeka, ao taani katabetabea te aba, n aroia n tataekini baika aki riai n taekin.

¹⁴ Ma ngaia ae I tangiriia riki ateiaine aika a mate buia b'a a na iein, a na karikiia natiia, a na tararuaia aia utu, ao a na aki karekea te anga are e na kabuakakaira iai te kairiribai;

¹⁵ b'a a a tia tabem'aang i buakoia ateiaine aika a mate buia n rairaki nako n ira Tatan.

¹⁶ Ma ngkana iai aine aika a mate buia i buakoia ana utu te aine ae te Kristian, ao e riai neienne ni buokiia. E na aki karawaawata te ekaretia, b'a e aonga n tabeakiniia aine aika kananoanga ni koaua ngkai a mate buia.

¹⁷ A riai unimm'aane aika raoiroi aia kairiri n iangoaki b'a e riai ni kataboroaki nakoia booia, ai moa ra riki nakoia te koraki aika korakora aia m'akuri ni kab'arab'ara ma n reirei;

¹⁸ b'a e kaangai te B'aib'ara: “Ko na tai kabaea wiin te kao ngkana e tabe n toutoua te uita ni kaaki kunna” ao “E riai b'a e na anganaki te tia m'akuri boon ana m'akuri.”

¹⁹ Ko na tai butim'aea taekani bukinan te unimm'aane, ma ti ngkana iai uoman ke teniman taani kakoauaa bukinana.

²⁰ Ko na boaiia akana bure i mataia aomata ni kabaneia, b'a a aonga ni maaku naba raoia.

²¹ I tuangko i matan te Atua, ma Kristo Iesu, ma ana anera te Atua, b'a ko na tou mwiini baikai ma te nano ae eti ae aki nanonano.

²² Ko na tai kukuri ni katokaa baim i aon temanna ni katabua nakon nakoana i bukin te Uea. Ko na tai buokanib'ai n aia bure tabem'aang; ko na b'aina te maiu ae itiaki.

²³ Ko na tai moi n te ran n ti ngaia, ma ko na moi n te wain teutana i bukini birotom ma aorakim nako aika ko itutuuaki iai.

²⁴ Akea te kangaanga n aia bure tabem'aang b'a a teretere aroia, ao a ri moaia nakon te motiki-taeka; ma aia bure tem'angina a tib'a kaoti rimwi.

²⁵ Ao ai arona naba, b'a akea te kangaanga ni m'akuri aika raraoi b'a a teretere aroia, ao ake a aki bati n teretere a aki kona n raba.