1.Tamuera 8 - Te B'aib'ara

Tangiran Te Uea Irouia Kaain Iteraera

¹ Ao iai uoman natin Tamuera m'aane.

² Natina are te karimoa bon Ioera, ao te karimwi bon Abiia. Ao ngke a kara Tamuera, ao e karikiia b'a taani kairiiri i Beera Teba.

³ Ma a bon aki katotonga tamaia. Bon aomata ngaiia aika buakaka ao a kariaia te kamaraato i bukin te anga taian iango aika aki raoiroi.

⁴ Ao n te bong teuana, ao a roko taani kairiiri n te botannaomata nakon Tamuera i Ram'a

⁵ ao a taku, “Ko a boni kara. Ao ko a tia ni katea te banna ae raoiroi nakoia natim m'aane, ma a aki toua mwiina. Ao ngkai ti a tangira te uea ae na kairiira.

⁶ Ao e b'ara nanon Tamuera ngke e ongo aia taeka taani kairiiri b'a a tangira te uea, ma ngaia are, e tataro i bukin arei.

⁷ Ao E kaeka te UEA: Tamuera, karaoi b'aai ni kabane akana a tangiri. B'a a bon ribaai b'a N na riki b'a aia uea.

⁸ Ni moa man te tai are I kaotinakoia iai mai Aikubita ni karokoa te bong aei, a tia ni kiitanai n taromauri taiani bouananti, ao ngkai a manga tannako naba mai Rou.

⁹ Karaoi b'aai ni kabane akana a bubuti, ma kauringiia ni kaota nakoia aron te uea ae na uea i aoia.

¹⁰ Ao Tamuera e tuangiia aomata ake a bubuti te uea Ana taeka te UEA:

¹¹ Ngkana e reke ami uea, ao aio arona ae na karaoia nako imi. Ane na imanonoia natimi m'aane b'a a na kaaina te taanga ni buaka. Ao ane a na toka i aon taiani kanibuaka ake a katikitikaki irouia aoti, ao tabeman ane a na kaaina te taanga ni buaka ake a buaka i aoia taian aoti, ao tabeman a na biribiri i m'aain taiani kanibuaka ake a katikitikaki i rouia aoti.

¹² Ane a na riki tabeman b'a mataniwiia 1,000 te tautia, ao tabeman b'a mataniwiia 50 tautia. Ao tabeman naba a na unika aon aban te uea ma n taia uaana, ke ni karaoi taiani b'ainibuaka, ao b'ain nako te kanibuaka are katikitikaki irouia aoti.

¹³ Ane a na karaoi taiani boiarara natimi aine ke ni kuukana kanana ma ni umunna.

¹⁴ Ane na anai ami katawanang akana a rangi n tamaroa, n reitaki naba ma nnen arokami kureebe, ao taian oriwa ma n anganiia ana aobitia.

¹⁵ Ao ane na anai naba katebwina ni m'akoro man ami uita ao kureebe ma n anganiia ana aobitia.

¹⁶ Ane na anai naba ami toro ma ami rorobuaka aika raoiroi ao ami aati, ma ni karaoia b'a a na m'akuri i bukina.

¹⁷ Ane na anai naba katebwina ni m'akoro man ami tiibu ma ami kooti. Ao ane kam na riki b'a ana toro te uea,

¹⁸ ao ane kam na tang nakon te UEA b'a E na kamaiungkami mairoun te uea are kam tangiria. Ma E na aki kaekai ami tataro te UEA.

¹⁹ Ao a aki kan ongo aomata iroun Tamuera ao a kaangai, “Ti aki, b'a ti na katotongiia botannaomata ake tabeua.

²⁰ Ti tangira te uea b'a e na tautaekaniira ma ni kairiira nakon te buaka.”

²¹ Ao e ongora Tamuera i rouia, ao i mwiina, e a manga tuanga te UEA b'aai ni kabane ake bon taekin.

²² Ao E taku te UEA, “Karaoa te b'ai are a tangiria. Karekea aia uea.” Ao e tuangiia aomata Tamuera b'a a na okiri mwengaia.