1.Tamuera 5 - Te B'aib'ara

Karikan Taiani Kangaanga Nakoia Kaain Biritia Iroun Te Atua

¹ Ao a anaa te Atiniberita kaain Biritia i rarikin Ebenetera nakon te kaawa are Atitota.

² Ao ni uotia nako nanon temboran atuaia are Taakon, ao a kaaki i rarikin bouanantin Taakon, are a tataromauria.

³ Ao ngke a uti n te ingabong are i mwiina kaain Atitota, ao a noora aia bouananti ni wene ni bobaraaki i aon te burooa i matan te Atiniberita. A manga kaoka te bouananti nakoni nnena.

⁴ Ma n te ingabong are i mwiina, ao e a manga b'aka naba ni wene ni bobaraaki i aon te burooa i matan te Atiniberita. E boni b'anin rab'atan te bouananti, ma e tii uruaki atuuna ma baina ake uoua ao a wene i aon te burooa te timanti i matan te mataroa n otinako.

⁵ Aio bukina ni karokoa boong aikai ngkai a nakonako ibonga ma aomata nako n iteran te mataroa n rin arei ngkana a rin n ana tembora Taakon i Atitota.

⁶ Ao E karaoi kangaanga aika m'aiti te UEA nakoia kaain Atitota ma kaain rarikiia. E kariki taian kinaka aika wawarebwe i aon rab'ataia, ao a bane ni maaku aomata.

⁷ Ao n tokina, ao a taku, “E boni karaoa aei Atuaia Iteraera. Boni Ngaia ae karaoi kangaanga aikai ni kabanea nako ira ma atuara are Taakon. Ti na iangoa aron te Atiniberita aei.”

⁸ Ao kaain Atitota a weteia taan tautaeka ni kabane mai Biritia nako Atitota, ao a titirakiniia ni kaangai, “Tera ae ti na karaoia nakon te Atiniberita are Ana b'ai Atuaia Iteraera?” Ao a taku tautaeka akekei, “Kanakoa nako Kata.” Ao i mwiin uotakina nako ikekei,

⁹ ao E karokoa te kinaka ae warebwerebwe i aoia aomata ni kabane n te kaawa arei. Ao a bane ni maaku kaain Kata,

¹⁰ ma ngaia are, a manga kanakoa te Atiniberita nako Ekeron. Ma i m'aiin are a karinna ni mataroan te kaawa, ao a bane n takaarua kaain Ekeron ni kaangai, “A uotaamai te Atiniberita are Ana b'ai Atuaia Iteraera! Ane na tiringiira ma ara utu!”

Kaokan Te Atiniberita Irouia Kaain Biritia

¹¹ Ao a manga tewea riki aia bowi taan tautaeka i Biritia kaain Ekeron ao a taku nako ia, “Kaoka te Atiniberita aei nakoia ake bon aia b'ai, b'a ti kaawa ni mate.” Ao a bane ni maaku aomata ni kabane, i bukina ngke E katuaaia te UEA n te aro ae moan te rawawata,

¹² ao koraki ake a reke maiuia a manga rawata ni kinaka aika warebwerebwe mataia. Ao a bane n tangira buokaia mairouia atuaia.