1.Tamuera 3 - Te B'aib'ara

E Taetae Te UEA Nakon Tamuera

¹ Ao e m'akuri i bukin te UEA Tamuera ni buoka te ibonga are Eri, are e a mataki n te tai aei.

² E aki tataetae te UEA nakoia aomata ni boong akekei, ao E aki naba rangi ni kakaoti nakoia aomata n te mii. Ma n te tairiki teuana, e matu Eri n ana ruu,

³ ao Tamuera e matu i aon te kie i rarikin te ati are tabu i nanon Ana auti te UEA. A bon tuai rangi ni maan ni matu

⁴ ao E wetea aran Tamuera te UEA. Ao e kaeka Tamuera, “Aio ngai!”

⁵ Ao e kawaekoa ni biri nakon Eri ao e taku, “Aio ngai, Tera ae ko tangiria?” Ao e taku Eri, “Kai I aki weteiko. Naako oki nakon kiem.” Ao e nako Tamuera.

⁶ Ao E a manga wetea riki aran Tamuera te UEA. Ao e teirake Tamuera, ao e kawara Eri ao e taku, “Aio ngai, Tera ae ko tangiria?” E kaeka Eri, Natiu, I aki weteiko. Naako oki nakon kiem.”

⁷ E bon tuai man taetae te UEA nakon Tamuera mai m'aaina, ngaia are, e tuai kinaa te b'anaa arei Tamuera.

⁸ Ao ngke E a manga wetea naba arana te katenua n tai, ao e teirake Tamuera ni kawara Eri ao e taku, “Aio ngai! Tera ae ko tangiria?” Ao e a ataia Eri b'a bon te UEA ae taetae nakon Tamuera.

⁹ Ma ngaia are e taku, “Naako oki weene! Ngkana e a manga taetae riki te aomata nako im, ao ko na kaeka ni kaangai, Te UEA, I ongo b'anaam. Tera te b'ai ae Ko tangiria b'a n na karaoia?’ ” Ao e a manga nako naba ni wene Tamuera.

¹⁰ Ao E tei te UEA i rarikin Tamuera ao E manga weteia naba n aron are karaoia mai m'aaina, “Tamuera! Tamuera!” Ao e kaeka Tamuera, “I ongo b'anaam. Tera te b'ai ae Ko tangiria b'a n na karaoia?”

¹¹ Ao E taku te UEA: Tamuera, N nang karaoa te m'akuri teuana i aon i Iteraera ae a na bane n tiaoki iai aomata ngkana a ongo taekana!

¹² N na katuaaea Eri ma ana utu, n aron are I a tia ni berita iai.

¹³ E bon ataia b'a a rawa natina m'aane n karineai, ao e bon katikuia n aroia arei, e ngae ngke I a tia n taekinna b'a N na katuaaia ma ana utu n taai nako.

¹⁴ I kauringa Eri b'a e aki kona te karea ke te angab'ai ni kaeti b'aai! B'a e a rangi ni m'aiti aia tai ni karaoi b'aai aika rangi n ribaaki.

¹⁵ Ao te ingabong are i mwiina, ao e uti Tamuera ao e kauki mataroan Ana auti te UEA. Ao e maaku n tuanga Eri te b'ai are taekinna te UEA nako ina.

¹⁶ Ma e taku Eri nako ina, “Tamuera ae natiu, nakomai ikai!” Ao e taku Tamuera, “Aio ngai!”

¹⁷ Ao e taku Eri, “Tera ae taekinna te UEA nako im? Tuangai b'aai ni kabane. N na butiia te Atua b'a E na katuaaeko n te aro ae moan te kangaanga ngkana ko aki tuangai Ana taeka ni kabane ake taekin!”

¹⁸ Ao e tuanga Eri b'aai ni kabane Tamuera. Ao i mwiina, e taku Eri, “Bon te UEA, ao E na bon karaoa te b'ai ae eti.”

Buokan Tamuera Iroun te UEA

¹⁹ Ngke tabe n rikirake Tamuera, ao E buokaki iroun te UEA ao e karaoi b'aai ni kabane ake e taekin Tamuera.

²⁰ Ao e bane n ataaki irouia aomata ni kabane man te kaawa are Taan are i meang nakon te kaawa are Beerateb'a are i maiaki, b'a Tamuera bon Ana burabeti ni koaua te UEA.

²¹ Ao E aki toki ni kakaoti te UEA nakon Tamuera i Tiro ma n tuangnga te b'ai are e na taekinna.