1.Tamuera 20 - Te B'aib'ara

Buokakin Tawita Iroun Ionatan

¹ Ao e biri nako Tawita mai Naiota i Ram'a ao e nakon Ionatan ao e taku, “Tera ae I a tia ni karaoia? Tera au bure ae I a tia ni karaoia? Tera te kaairua ae I a tia ni karaoia nakon tamam n te aro ae e nang tiringai iai?”

² Ao e kaeka Ionatan ni kaangai, “E na bon aki kariaia te Atua b'a ko na mate! E bon tuutuangai tamau b'aai ni kabane aika kakaawaki aika e na karaoi ke e na aki, ao e na riai n aki karabaa mairou. I aki kakoaua b'a e na karaoa aei!”

³ Ao e kaeka Tawita ni kaangai, “E ataa tangirakiu iroum tamam, ao e aki tangiria ni kaongoko te b'ai ae e iangoia, b'a ko kaawa n rangi n nanokawaki iai. I tuea nakoim n aran te UEA ae e maiu, b'a I kaan roaroa ma te mate!”

⁴ Ao e taku Ionatan, “N na karaoi b'aai ni kabane akana ko taku.”

⁵ Ao e kaeka Tawita ni kaangai, “Bon tain te Toa ae Moan Otin Nam'akaina nakon te ingabong, ao N na bae n am'arake ma te uea. Ma ngkana arona b'a akea am kangaanga iai, ao N na nako ni karabaai n te katawanang ni karokoa tairikin te bong are i mwiin te ingabong.

⁶ Ngkana arona b'a e ataia tamam b'a I aki roko n te am'arake, ao ko na tuangnga b'a aongkoa I buubutiiko te kariaiakaki b'a N na kawaekoaai nakon mwengau i Betereem, i bukin aia anga karea n te ririki au utu ni kabane.

⁷ Ao ngkana arona b'a e kaangai, ‘E tamaroa’ Ao e na akea te kangaanga nako iu; ma ngkana e un, ko na ataia b'a e iaiangoa tiringakiu.

⁸ I butiiko b'a ko na karaoa aei ibuku, ao kamatoa ara berita are ko karaoia ngkoa nako iu. Ma ngkana arona b'a I bure iai, ao ko na tiringai boni ngkoe! E aera ngkai ko na kairai nakon tamam b'a e na tiringai?”

⁹ Ao e kaeka Ionatan ni kaangai, “E kaairua ane ko iangoia anne. Ngke arona b'a I ataa te b'ai ae e na karaoia tamau nakoim, N na riai ni kaman tuangko.”

¹⁰ Ao e titiraki Tawita ni kaangai, “Ko na kangaa n tuangai b'a e un irou?”

¹¹ Ao e kaeka Ionatan ni kaangai, “Ti a nakon te katawanang. Ma ngaia are a m'ananga nako,

¹² ao e taku Ionatan nakon Tawita, “E na riki te UEA ae te Atua b'a ara tia kakoaua! Nakon te ingabong n taina naba aei, N na titirakina tamau ana iango i bukim. Ngkana arona b'a e tamaroa, n na kanakoa te taeka nakoim.

¹³ Ma ngkana iai ana iango n tiringko, e na oreai te UEA ni kamateai ngkana I aki kaongoko taekana ma ni kabiri nakoko n rawea maium. E na meemena te UEA iroum n aron ngkoa memenana iroun tamau!

¹⁴ Ngkana arona b'a I maiu, I buubutiiko ko na kateimatoa ara berita ae e tabu nako iu; ma ngkana I mate,

¹⁵ ko na kaota naba am kakaonimaki anne nakoia au utu n aki toki. Ao ngkana E bane ana m'akuri te Atua ni kamaunaiia ni kabane am kairiribai,

¹⁶ tera ngke e aki roko n uruaki ara berita imarenara. E na katuaaeko te UEA ngkana e uruaki.”

¹⁷ Ao e a manga kaberitaa riki Tawita Ionatan b'a e na tangiria, i bukina ngke e rangi n tangira Tawita Ionatan n aron tangirana i bon i rouna.

¹⁸ Ao e taku Ionatan nakoina, “Tain te Toa ae Moan Otin Nam'akaina ningabong, ao ko na bon ataaki ngkana ko aki roko n te am'arake.

¹⁹ I mwiin te ingabong e na bon mauanti riki aki rokom; ma ngaia ae, ko na nakon am tabo are ko na karabako iai n te tai are teuana, ao karabako i akuun b'ariko n atiibu ikekei.

²⁰ N na katebenakoa kanoan te kainikatebe tenua te tai nako iai, kaanga aongkoa au taakete.

²¹ Ao i mwiina, N na tuanga au toro b'a e na nako ni kakaaea taiani kanoanikatebe i rarikim; b'a e na anai, ao ngkana I kaangai nakoina, “Nooria, a mena taiani kanoanikatebe i rarikim; anai,” ao e nanonaki iai b'a ko konaa n oti nako b'a akea te kangaanga. I tuea n iroun te UEA ae e maiu b'a e na bon akea te kangaanga.

²² Ma I kaangai nakoina, “Akana a mena taian kanoanikatebe maikekei riki,” ao ko na iangoa nakom, b'a E kanakoko te UEA.

²³ Ma ti na bon kakaawakina ara berita are ti a tia ni karaoia i marenara, ao E na kamatoaa aei te UEA ni kaawakinna n aki toki.”

²⁴ Ma ngaia are, e karabaa Tawita i buakon taiani katawanang. Ao ngke e roko tain te Toa ae Moan Otin Nam'akaina, ao e a roko Tauro nakon te am'arake

²⁵ ao e tekateka n ana tabo are e tataneiai iai i rarikin te oo. E tekateka Abenera i rarikina, ao e tekateka Ionatan ni kaaitaraa. Ao akea kaain ana tabo Tawita,

²⁶ ma akea te b'ai ae e taekinna Tauro n te bong anne, b'a e taku i nanona, “Tao iai te b'ai ae e riki i rouna, tao e aki itiaki ni kaineti ma aron te taromauri.”

²⁷ N te bong are i mwiina, are te bong are i mwiin te Toa ae Moan Otin Nam'akaina, e bon teimatoa naba n akea kaain ana tabo Tawita, ao e titiraki Tauro nakon Ionatan ni kaangai, “E aera ngkai e aki roko Tawita ngkoananoa ao ngkai?”

²⁸ Ao e kaeka Ionatan ni kaangai, “E rangi ni buubutiai b'a N na kariaia b'a e na nako Betereem.

²⁹ E taku, “Taiaoka b'a ko na kanakoai, b'a a karaoa aia baka n angakarea n te kaawa, ao e tuangai tariu b'a N na nako ikekei. ‘Ma ngaia ae, ngkana raoraou ngkoe, ko na kariaia nakou n nooriia au koraki. Anne bukina ngkai e aki roko ngkai.’ ”

³⁰ Ao e un Tauro ao e taku nakon Ionatan, “Ko katotoonga tinam ni kamangao ma n aki kakaonimaki! I ataia ngkai b'a ko mena n ana itera Tawita ao ko bon kamamaaeko ma tinam anne!

³¹ Ko aki ataia b'a e na uea Tawita ngkana e maiu, ao ko na bon aki uea n te aba aei? Ko na nako ngkai ni kairiia mai, E na riai n tiringaki!”

³² Ao e kaeka Ionatan ni kaangai, “B'a tera bukina ngkai e na tiringaki. Tera ae e a tia ni karaoia?”

³³ Ao e rangi n un Tauro n te taeka arei, ao e karea Ionatan n te kainiwai b'a e na tiringnga, ao e a ataia Ionatan b'a e bon iangoa tiringan Tawita tamana are Tauro.

³⁴ Ao e kawaekoa Ionatan n teirake man te taibora ao e aki roko n te am'arake n te bong arei; are kauabongin te Toa ae Moan Otin Nam'akaina. E rangi n nanoangaa Tawita, b'a e a tia Tauro ni kabuakaka.

³⁵ Ao e nako Ionatan n te ingabong are i mwiina nakon taian katawanang ni kawara Tawita. E kaira te ataeinim'aane ae e uarereke

³⁶ ao e taku nakoina, “Ko na biri ni kakaai taian kanoanikatebe aika N na katebenakoi.” Ao e biri te ataeinim'aane arei, ao e katebenakoa te kanoanikatebe Ionatan i aona.

³⁷ Ao ngke e roko te tabo are e b'aka iai kanoanikatebe, ao e takaarua Ionatan ni kaangai, “Ane mai ikekei riki!”

³⁸ Tiaki ikanne! Kawaekoako! E anaa te kanoanikatebe ao e kawara ana toka,

³⁹ ao e aki roko te ataa nanon te b'ai arei; bon ti Ionatan ao Tawita aika a ataia.

⁴⁰ Ao e anga ana b'ainibuaka Ionatan nakon te ataeinim'aane arei ao e tuangnga b'a e na uoti rikaaki nakon te kaawa.

⁴¹ Ao ngke e a nako te ataeinim'aane arei, e a kaotia Tawita mai akuun taian b'ariko n atiibu, ao e b'aka i aon bubuaniwaena ao e bobaraaki ni kabooa matana ma aontano tenua te tai. Ao a kaai n tang ma ni kiiti i bon irouia; e korakora riki nanokaawakin Tawita nakon Ionatan.

⁴² Ao i mwiina, e taku Ionatan nakon Tawita, “E na raoraoniko te Atua. E na bon kakoroa raoi nanon au berita ma ngkoe te UEA, ao i marenaia naba am kariki ma au kariki n aki toki.” Ao i mwiina, e nako Tawita ao e oki Ionatan nakon te kaawa.