1.Tamuera 19 - Te B'aib'ara

E kataia Tauro n tiringa Tawita

¹ Ao Tauro, e tuanga Ionatan ma ana aobitia b'a e tabe ni iangoa tiringakin Tawita. Ma e rangi n tatangira Tawita Ionatan,

² ma ngaia are, e taku nako ina, “E iangoa tiringakim ngkai tamau. I butiiko b'a ko na kakaawakiniko raoi nakon te ingabong, naako nakon te tabo teuana ae ko na raba iai ao tiiku iai.

³ N na nako n teitei i rarikin tamau n te tabo are ko karabako iai, ao N na taetae ma ngaia i bukim, b'a N na ongora i rouna, ao I a manga tuangko.”

⁴ Ao e karaoiroa Tawita Ionatan nakon Tauro ao e taku, “Teuae ko karineaki, ko na aki karaoa te b'ai ae buakaka nakon Tawita are am toro. Bon akea te b'ai ae buakaka ae a tia ni karaoia nako im: ma baika e a tia ni karaoi bon buokam aika ab'ab'aki.

⁵ E kariaia te ri nanon te kangaanga ngke e tiringa Koria, ao E a tia n anga te tokanikai te UEA nakon Iteraera. Ngke ko nooria, ao ko nang kim'areirei. Bukin tera ngkai ko tangiria ni kan karaoa ae buakaka nakon te aomata ae aki ataib'ai ao n tiringa Tawita n akea bukina?”

⁶ Ao e kariaia Tauro ao e berita ao e taku, “I berita n aran te UEA ae maiu b'a N na aki tiringa Tawita!”

⁷ Ao e wewetea Tawita Ionatan ao e tuangnga te b'ai are taekinna Tauro, ao i mwiina, e a kaira Tawita nakon Tauro, ao e a manga m'akuri naba Tawita n ana taanga ni buaka Tauro n aron are e bon kakaraoia mai m'aaina.

⁸ Ao i mwiina, e a teirake te buaka ma kaain Biritia, ao e kakorakora Tawita ni buakaniia ni uaa a birinako.

Buokakin Tawita Ni Biri Nako Iroun Mikara

⁹ Ao n te tairiki teuana, ao e mena Tawita n ana auti Tauro b'a e katanga te aabi nako ina. Ao e tekateka Tauro, ma te kainiwai i nanon baina, ao ngke e niniaki n te tamnei ae buakaka are roko mairoun te UEA.

¹⁰ E teirake naba Tauro ni karetekea Tawita b'a e na kanim'a ma te o. Ma e katuaa kaina Tawita, ao e nim ma te o te kainiwai arei. Ao e biri n otinako Tawita man te auti ma ni biri nako.

¹¹ N te tairiki naba arei ao e kanakoia rorobuaka tabeman Tauro b'a a na tarataraa ana auti Tawita ao n tiringnga n te moaningabong. Ao e kauringa Tawita Nei Mikara ao e kaangai, “Ngkana ko aki biri nako n tairiki, ao ko na tiringaki nakon te moaningabong!”

¹² Ma ngaia are, e karuoa neierei man te winto, ao e biri nako.

¹³ Ao neierei, e anaa bouanantin te utu, e kawenea i aon te kainiwene, ao e kaaki atuuna i aon te uninga ae e karaoaki ni buraen te kooti, ao e rabunna.

¹⁴ Ao ngke a roko ana rorobuaka Tauro nakon Tawita, ao e tuangnga Nei Mikara b'a e aoraki.

¹⁵ Ma e a manga kaokiia Tauro b'a a na bon noora Tawita. Ao e taku, “Uotiamai karinna ma ana kainiwene ikai, b'a N na tiringnga.”

¹⁶ Ao a nako n rin nako, ao a noora bouanantin te utu i aon te kainiwene ma uningana buraen te kooti i aan atuuna.

¹⁷ Ao e taku Tauro nakon Mikara, “E aera ngkai ko keweai n aron aei ao ko a kabirinakoa au kairiribai?” Ao e taku neierei, “E taku b'a e na tiringai ngkana I aki kabirinakoa?”

¹⁸ Ao e biri nako Tawita ao e kawara Tamuera i Ram'a ao e tuangnga b'aai ni kabane ake e a tia ni karaoia Tauro. Ao i mwiin arei, e a nako ma Tamuera nako Naiota n tiku iai.

¹⁹ Ao e kaongoaki Tauro b'a e mena Tawita i Naiota i Ram'a,

²⁰ ma ngaia are, e kanakoia tabeman rorobuaka b'a a na katikia. A nooriia koraki ni burabeti aika a m'am'aie ma n tatakarua, ae a kairaki iroun Tamuera. Ao e niiniia ana rorobuaka Tauro Tamnein te Atua, ao a manga ira te m'am'aie ma n tatakarua.

²¹ Ao ngke e ongo Tauro te b'ai arei, e a manga kanakoia riki tabeman taan uarongorongo, ao a manga m'am'aie ma n tatakarua. E a manga kanakoia naba ana taan uarongorongo te katenua n tai, ao e teimatoa n riki anne nakoia.

²² Ni karokoa e a bon m'ananga nako Ram'a. Ao ngke e roko n te m'anib'a are i Teku, e a titiraki b'a e mena ia Tamuera ma Tawita ao e tuangaki b'a a mena i Naiota.

²³ Ao ngke e m'ananga nako ikekei, e a manga niniia naba Tamnein te Atua, ao e a manga m'am'aie naba ma n tatakarua ni karokoa rokona i Naiota.

²⁴ E buti ana kunnikai ao e m'am'aie ma n tatakarua i matan Tamuera, ao e wene ni bebeekan n te ngaina arei ni karokoa e bong ao e a manga ngaina. Aio te tabo are e nako mai iai te taeka ae e kaangai, “E bon riki naba ni burabeti Tauro?”