1.Tamuera 15 - Te B'aib'ara

Aki ongotaekan Tauro I Roun Te UEA

¹ Ao n te bong teuana ao e taku Tamuera nakon Tauro: E kabonganaai te UEA n rineiko b'a aia uea Ana aomata aika Iteraera. Ao ngkai ko na ongora n te rongorongo mairoun te UEA:

² “Ngke a tabe ni waaki nako Iteraera i aon kawaia n otinako mai Aikubita, ao a buakanaki irouia kaain te botannaomata aika kain Amareka. Bon te UEA Ngai ae Moan te M'aaka, ao ngkai a nang kabooa mwiin te b'ai ae a tia ni karaoia kaain Amareka!

³ “Naako buakaniia kaain Amareka! Kamaunaia ma aia b'ai ni kabane. Kam na bon aki nanoangaia naba teutana. Tiringiia m'aane, aine, ataei, n reitaki naba ma ake a uarereke. Tiringiia naba aia kao, aia tiibu, aia kamero, ao aia aati.”

⁴ Ao e kanakoia taan uarongorongo Tauro ake a tuangiia kaain te kaawa ni kabane b'a a na kanakoia m'aane b'a a na ira te taanga ni buaka i Teraim. Ao m'aitiia tautia bon 210,000 ni kabane, ao 10,000 mai buakoia aikai bon kaain Iuta. Ao e baaireia Tauro,

⁵ ao e kairiia nakon te m'arua are i rarikin teuana mai buakon kaawa ake i Amareka, ake a katauraoia iai nakon te buaka ae a na karaoia n te aro kakubanako.

⁶ Ao a maeka kaain Kenaite i rarikin te tabo arei, ao e taku Tauro nakoia, “A bon rangi n akoi ami aomata nakoia Iteraera ngke a otinako ara botannaomata mai Aikubita, ao I aki tangiriko b'a ko na mate ngkana ti tiringiia kaain Amareka. Ma ngaia ae, kam na kiitana ikai ni kararoaingkami mairouia.” Ao a nako kaain Kenaite,

⁷ ao Tauro ma ana taanga ni buaka, a buakana Amareka mai Awira nako Tiura, are i mainikun Aikubita.

⁸ Ao a bane n tiringaki kaain Amareka, ao ti nikirana te uea are Akaaka.

⁹ Ao Tauro ma ana taanga ni buaka a kamaiua Akaaka, ao kamaiuia naba taian tiibu ma taiani kao aika rangi n raoiroi. A bon aki kan kamaunai b'aai aika manena, ma ngaia are, a tiringi naba maan aika akea bonganaia, ao aika mamaara.

Ribaakin Tauro I Roun Te UEA

¹⁰ Ao E taku te UEA nakon Tamuera,

¹¹ “E a tia ni katoka arona n ongotaeka Tauro nako Iu, ao I kab'ara Au bure ngkai I karikia b'a te uea.” E rangi n un Tamuera, ao e tang n onon man tataro nakon te UEA ni kangainaa

¹² Ao e utim'aaka n te ingabong are i mwiina n nako ni maroroo ma Tauro. Ao e taku te aomata temanna nako ina, “E nako Karemera Tauro ao e karaoa iai te kanuringa b'a aonga aomata nako n ururinga ana tokanikai. Ao i mwiina, e na manga nako Kirekara.”

¹³ Ao e reke Tauro iroun Tamuera, ao e taku Tauro nako ina, “Bon au kantaninga b'a E na kakab'aiako te UEA! I a tia ni karaoa te b'ai are tuangai te UEA.”

¹⁴ Ao e titiraki Tamuera ni kaangai, “Ao bukin tera ngkai a tangitang taian tiibu ma taiani kao?”

¹⁵ Ao e kab'arab'ara Tauro ni kaangai, “A anaia tautia mairouia kaain Amareka. A kaawakin taian tiibu ma kaao ake kabanean tamaroa, b'a aonga n anga b'a aia karea nakon te UEA ae Atuam. Ma ti kamaunai b'aai ni kabane.”

¹⁶ Ao e taku Tamuera, “Katokia ikanne. N na tuangko te b'ai ae taekinna te UEA ngke tairiki.” Ao e taku Tauro, “E raoiroi.”

¹⁷ Ao e reitanako ana taeka Tamuera ao e taku, “Ko na tai iangoia b'a ko a rangi ni kakannato, b'a E rineiko te UEA b'a ko na uea b'a ko na tararuaia barongan Iteraera.

¹⁸ Ngke E kanakoko te UEA n te m'akuri aei, ao E tuangngkami b'a kam na kamaunaia kaain Amareka aika akea bonganaia aikai.

¹⁹ E aera ngkai kam aki ongotaeka nakon te UEA? E aera ngkai kam kaawakin taiani man ao kam kaunna?”

²⁰ Ao e taku Tauro, “Ma kai I bon ongotaeka i Roun te UEA. E kanakoai n te m'akuri teuana, ao I nako. I taua te uea are Akaaka ao I kamaunaa ana botannaomata.

²¹ A na tiringaki maan ni kabane n taai nako. Ao bon anne bukina are a uoti iai taian tiibu ma taian kao aika kabanean raoiroi taian tautia nako Kirekara b'a te karea nakon te UEA ae Atuam.”

²² Ao e taku Tamuera, “Ko na tuangai. E bon kukurei te UEA n taiani karea ma taian angab'ai? E aki! E bon aki tangira am karea. E tangiriko b'a ko na ongotaeka i Rouna.

²³ Kakaitaraan te UEA ma te aki ongotaeka nako Ina bon ti te bo ma buakakan taromauriaia bouananti ke bubutiaia kairakimi. Ko rawa ni karaoa te b'ai ae tuangko te UEA, ma ngaia are, E a tia te UEA ni baaireia b'a ko na aki konaa n uea.”

²⁴ Ao e kariaia burena Tauro, ao e taku, “I a tia ni bure. I aki ongotaeka i roum ao i roun te UEA b'a I maaka te taanga ni buaka, ao I ira nanoia.

²⁵ Taiaoka, kab'ara au bure ao irai n okirikaaki b'a I aonga ni konaa n taromauriia te UEA.”

²⁶ Ao e taku Tamuera, “I aki! Ko aki ongotaeka i roun te UEA, ao n na aki okirikaaki ma ngkoe. Ngkai E a tia te UEA n taku b'a ko nang aki uea i aon Iteraera.”

²⁷ Ao ngke a taonnako Tamuera, ao Tauro e rawea niiniiran Tamuera, ao e raeuaaki!

²⁸ Ao e taku Tamuera, “E a tia te UEA ni bwenaua te tautaeka ni Iteraera man anaia mairoum n te bong aei, ao E na anga nakon temanna ae raoiroi riki nako im.

²⁹ Ao i rarikin anne, bon tiaki te aomata Atuaia Iteraera ae akea tokina E aki taetaekina te kewe ke ni bibitaki nanona.”

³⁰ Ao e taku Tauro, “I boni bure, ma taiaoka ma karineai i mataia taani kairiiri n te taanga ni buaka ao i mataia Iteraera. Okirikaaki ma ngai b'a I aonga ni kona n taromauria te UEA ae Atuam.”

³¹ Ao e ira rikaaki Tauro Tamuera, ao e taromauriia te UEA Tauro.

³² Ao e takaarua Tamuera ni kaangai, “Uotaamai te uea are Akaaka are uean Amareka!” Ao e roko Akaaka ma kabaean baina te tiein, ao e taku i boni i rouna, “A na bon aki tiringai n te tai aei.”

³³ Ma e taku Tamuera, “Akaaka, ko a tia n anaiia ataei aika uarereke mani baiia tinaia ao ko tiringiia. Ao ngkai akea natiia tiina.” Ao i mwina, e anaa Akaaka Tamuera ao e korobitiia ni kauarerekea n te tabo n taromauri are i Kirekara.

³⁴ Ao e nako Tamuera nakon ana auti i Ram'a, ao e okira ana auti Tauro i Kibea.

³⁵ E ngae ngke e nanoanga Tauro Tamuera, ma e bon aki roko n te manga noora Tauro Tamuera. Ao E bon nanokawaki te UEA ngke E rinea Tauro b'a te uea.