1.Tamuera 1 - Te B'aib'ara

Erekana Ma Ana Utu I Tiro

¹ Iai ngkoa te m'aane temanna ae arana Erekana, ae kaain te baronga are Eberaim, ae maeka n te kaawa are Ram'a n aaba ake a tabukibuki i Eberaim. Bon natin Ieroboam ngaia ae te m'aane ao tibuna bon Eriu, ao tibutoruna Tou.

² Erekana bon uoman buuna, Anna ao Beninna. E kariki Beninna, ma akea natin Anna.

³ Ni katoa ririki Erekana e m'ananga man ana kaawa nako Tiro, ike e taromauriia iai te UEA ae Moan te M'aaka ma n anga karea. Eri bon ana ibonga te UEA ikekei ao natina m'aane ake uoman aika Obeni ao Bineati ake a m'akuri naba b'a ibonga.

⁴ Ngkana e anga karea Erekana, ao e anga tabeua te iriko ni man nakon Beninna, ao tabeua nakoia natina m'aane ma aine n tatabemaniia nako.

⁵ Ma e angan Anna ae m'aiti riki i bukina b'a e tangira riki Anna, e ngae ngke E a tia te UEA n aki anganna te kakariki.

⁶ Ao e tangiria Beninna ni karawawata Anna n arona n aki kakariki,

⁷ e a moamoa riki n te tai are a nako iai aia utu nakon Ana auti te UEA ni katoa ririki. N te bong teuana, ngke tabe n angakarea Erekana, ao Anna e tabe n tang ao e rawa n am'arake,

⁸ Ao e titiraki Erekana ao e taku, “Anna, e aera ngkai ko a tang? E aera ngkai ko aki am'arake? E aera ngkai ko a bon rangi ni karawawatako? Ti aki I raoiroi riki i roum nakoia naati m'aane aika tengaun?”

⁹ Ao ngke a tia n anga karea, ao n tia naba n am'arake, ao e teirake Nei Anna ao e tataro. E tekateka Eri n ana kaintekateka i rarikin mataroan te tabo n taromauri.

¹⁰ Ao e bon rangi n uruaki nanon Nei Anna ao e tang ngke e tataro ao e taku,

¹¹ “Te UEA ae Moan te M'aaka, bon am toro ngai, ae I bon rangi n rawawata! Taiaoka karekea natiu te m'aane. I berita b'a N na anganiko b'a Am b'ai n aron ab'ab'akin maiuna, ao e na aki kokoreaki iran atuuna.”

¹² Ao e tataro n aki kakarongoa Nei Anna nakon te UEA n te tai ae maan.

¹³ Ma a kakam'akuri riana, ao e taku Eri b'a e manging.

¹⁴ E taku, “Tao ana manra arom n tiku ni manging ikai? Ani katoka mangingim!”

¹⁵ “Teuaei, tai iangoia b'a I aki raoiroi!” E kaeka Nei Anna. “I aki manging. I bon aki momooi manging.

¹⁶ Ma I rangi n rawawata mani kainano nanou. I tabe n tataro, ma n taekin au kangaanga ni kabane nakon te UEA.”

¹⁷ Ao e taku Eri, “Okira mwengam. Ana bane n raoiroi b'aai ni kabane. E na bon kaekai am tataro Atuaia Iteraera.”

¹⁸ Ao e taku neierei, “Teuaei, ko bati n rab'a n nanoangakiu iroum.” Ao i mwiina e nako, ao i mwiin am'arakena teutana, ao e namakina te marurung ae tau.

Bungiakin Tamuera Ao Katabuakina

¹⁹ Ao a uti m'aaka Erekana ma ana utu n te bong are i mwiina, ao ngke a tia n taromauria te UEA, ao a manga okira Ram'a. Ao e a tia ni wene Erekana ma buuna are Anna, ao te UEA E kaekai ana tataro neierei.

²⁰ Ao e bikoukou neierei ao e bungia natina te m'aane. E arana natina b'a Tamuera, ao ni kab'arab'araaki, “I bubutiia te UEA i bukina.”

E Anga Tamuera Anna Nakon Te UEA

²¹ Ao a manga m'ananga riki Erekana ma ana utu b'a a na anga aia karea are b'ain te ririki ae koraki, ao e uota naba te b'aintangira are a tia ni berita b'a e na anga nakon te UEA.

²² Ma e aki iri Nei Anna b'a e a tia n taetae nakon buuna ni kaangai, “E na aki roko Tamuera n Ana auti te Atua ni karokoa e matoa raoi, ao I a tib'a anga nakon te UEA, ao e kona n tiku i Tiro ni karokoa tokin maiuna.”

²³ Ao e taku Erekana, “Karaoa ane ko bon taku b'a e riai. Ko na tiku ni karokoa e matoa raoi te tei. E na bon buokiko te UEA ni kakoroa bukin am berita.” Ao e aki roko n te m'ananga Nei Anna ni karokoa matoan raoi Tamuera.

²⁴ Ao ngke a manga roko naba tain te nako Tiro n te ririki, ao a uota Tamuera Nei Anna ma Erekana e uota Tamuera nakon Ana auti te Atua. Ao a uota naba te kao ae tenua ana ririki, ma te tiaeki ae kanoana ruaiwa te kirokuraem te buraawa, ao te b'aata ae onrake n te wain.

²⁵ Ao a anga te kaom'aane b'a aia karea Nei Anna ma Erekana, ao i mwiina, a anga te ataei ni m'aane nakon Eri.

²⁶ Ao e taku Nei Anna, “Teuae ko karineaki, Ko kinaai? Boni ngai te aine ae I tei ikai tabeua te ririki n nako ao I bubutiia te UEA

²⁷ b'a E na anganai natiu te m'aane. Ao aei te ataei ni m'aane are I bubuti iai! E a tia n anganai te UEA te b'ai are I bubuti iai.

²⁸ Ao ngkai I a angan te UEA, ao e na riki b'a Ana toro te UEA ni kabane bongin maiuna.”