1.Rongorongo 5 - Te B'aib'ara

Ana Kariki Reuben

¹ Bon te karimoa te m'aane Reuben iroun Iakob'a, ma e bua nakoana ni karimoa i bukina ngke e matu ma temanna buun tamana. E a manga nako te karineaki ni karimoa mai rouna, ao e a manga anganaki Ioteb'a,

² e ngae ngke bon te baronga are Iuta ae te kabanea ni korakora mani kakarekeaki te tia kairiiri mai iai.

³ Iai natin Reuben aika aman m'aane aika: Anoka, Baru, Etiron, ao Karemi.

⁴ Aikai ana kariki Ioera:

⁵ Temaia, Koka, Timei, Mika, Reaia, B'aara, ao Beera are te tia kairiiri man te baronga are Reuben.

⁶ Rimwi riki, e uotaki nako Beera iroun uean Aturia are Tikerata Birenetera b'a te taenikai.

⁷ A tauaki naba i nanon rongorongon te utu taekaia taani kairiiri man te baronga are Reuben: Ieiera, Tekaria,

⁸ ao Bera are natin Atati te m'aane ao tibun Tema are kaain te kaainga are Ioera. A maeka n te aba are i rarikin te kaawa are Aroera, ni karokoa meang i Nebo, ao B'aara Meon,

⁹ ao ni waerake nakon te rereua i maeaon te Karaanga are te Iuberetiti. A tangira te aba ae e buubura n aron aei i bukina ngke a rangi ni m'aiti aia nanai ni man aika a na kaawakin i Kireata.

¹⁰ Ngke e uea Tauro, ao a buakaniia kaain Akera kaain te baronga are Reuben ma ni kataenikaiia, ao a anaa abaia are i mainikun Kireata.

Ana Kariki Kata

¹¹ A maeka kaain te baronga are Kata n aonon Batian, i meangin te baronga are Reuben. E reitinako abaia kaain te baronga are Kata n iraanako te kawai n toki n te kaawa are Tareka.

¹² Taani kairiiri ake tabeman n te kaainga bon Ioera, Tiabam, Ianai, ao Tiabata.

¹³ Ao aia koraki boni Mikaera, Meturam, Tieb'a, Iorai, Iakan, Tia, ao Ebera.

¹⁴ Bon ana kariki Abiaira ngaia ni kabane. Abiaira are e riki ana utu mairouia Uri, Iaroa, Kireata, Mikaera, Ietitiai, Iato, ao Buti.

¹⁵ Ai bon natin Aberiera te m'aane, ao tibuni Kuni are te tia kairiiri n te kaainga.

¹⁶ A maeka kaain te baronga are Kata ni kaawa ake n aonon nako Batian ao Kireata, ao ai uana naba ma te tabo n uteute are i Tiaron.

¹⁷ A koreaki tauani mwiin aia utu n ana tai ni uea Iotam i aon Iuta, ao n ana tai ni uea Ieroboam i aon Iteraera.

¹⁸ N taian baronga are Reuben, Kata, ao Manate Mainiku ao iai aia tautia aika 44,760 m'aitiia aika a kataneiaaki nakon te buaka n te marae ma taian otanga, kabaang, kainikatebe, ao kanoanikatebe.

¹⁹ A buakaniia kaain Akera, ao kaain baronga ake Ietura, Nabiti, ao Notaba.

²⁰ Ni katoa nako ia tautia aikai ni buakaniia aia kairiribai, ao a aki toki n taatataro nakon te Atua ma n onimakinna b'a E na buokiia. Ao bon anne bukin totokanikaia baronga aika Reuben, Kata, ao Manate Mainiku i aoia kaain Akera ma taani buokiia.

²¹ A reke irouia barongan Iteraera aikai 50,000 taiani kaamero, 250,000 taian tiibu, 2,000 taian aati, ao 100,000 te aomata.

²² A m'aiti kaain Akera ake a mate i nanon tain te buaka, i bukina ngke E buaka te Atua ni kaaitaraia. A maeka kaain te baronga are Reuben, Kata, ao Manate i Mainiku n te aba arei ni karokoa te tai are a manga uotakinako iai b'a taenikai nako Aturia.

Ana Kariki Te Baronga Are Manate i Mainiku

²³ E bon rangi ni korakora aomatan te baronga are Manate i Mainiku, ma ngaia are a tekateka kaaina n aononi Batian meang, ni karokoa B'aara Oman i meang.

²⁴ Aia taani kairiiri n te kaainga bon Ebera, Iti, Eriera, Atiriera, Ieremia, Otawia, ao Iariera. Bon taani kairiiri aika a rangi n ataaki ao bon tautia naba aika a ninikoria.

Konaakiia Baronga ake Reuben, Kata, ao Manate i Mainiku

²⁵ A aki kakaonimaki nakon te Atua are a tataromauria aia bakatibu kaain te baronga ake Reuben, Kata, ao Manate Mainiku, ao a manga moana taromauriaia antiia botannaomata ake E a tia ni kanako ia te Atua mai Kanaan.

²⁶ Ma ngaia are, E kanakoa uean Aturia are Tikeraka Birenetera te Atua b'a e na buakaniia barongan Iteraera aikai. E kairiia nako te uea b'a taenikai nako Aturia, ao man n te tai anne are e a kairoroia iai b'a a na maeka i Aba, Abora, Ara, ao i rarikin te Karaanga are Kotan.