1.Rongorongo 24 - Te B'aib'ara

Anganakiia Ibonga Tib'angaia

¹ A manga bwenauaaki ana kariki Aaron nakon taiani m'akoro ni m'akuri. Bon aman natin Aaron m'aane: Nataba, Abiu, Ereata, ao Itama.

² Ma a kaman mate Nataba ma Abiu i m'aain maten tamaia, ao akea natiia m'aane. Ao bon anne bukina are a m'akuri iai Ereata ma Itama b'a ibonga.

³ Ao Tawita e bwenauaia ana kariki Aaron nakon taiani m'akoro, ni kaineti ma tib'angaia. Ao a buoka Tawita Tatoka, are ana kariki Ereata temanna, ao Aimereka are ana kariki Itama temanna.

⁴ A bwenauaaki ana kariki Ereata nakon tebwi ma onoua te m'akoro, ao Itama a bwenauaaki ana kariki nakon wanua te m'akoro, i bukina b'a a m'aiti riki ana taani kairiiri n te utu ana utu Ereata.

⁵ I bukina ngke iai taian mataniwi n te Tembora ao ibonga n taian utu aika uoua aikai, ao e a titirakina te UEA Tawita te b'ai ae e na karaoia are e na tib'aaki raoi te m'akuri i marenaia.

⁶ Ao ngke a anganaki m'akoro nako tabeia, ao Temaia are natin Netanera te m'aane are kanoan Rewi e koroi araia taani kairiiri ake taan tararuaia taiani m'akoro akanne. Ao taani kakoaua bon Tawita ma ana mataniwi, ao ai uana naba ma Tatoka te ibonga, Aimereka are natin Abiata te m'aane, ao taani kairiiri man aia utu ao aia kaainga ibonga ao kanoan Rewi.

⁷ Taiani kurubu nako ni ibonga a bon tannako araia ma aia tia kairiri n aia utu, ao n anganaki tib'angaia n aron aikai:

⁸ Ieoiariba, Ietaia, Arim

⁹ Teorim, Marekia, Miiamin,

¹⁰ Akoti, Abiia

¹¹ Ietua, Tekania

¹² Eriatiba, Iakim

¹³ Uba, Ietebeaba,

¹⁴ Bireka, Immera

¹⁵ Etira, Abiteti,

¹⁶ Betaia, Ieetikera,

¹⁷ Iakin, Kamura,

¹⁸ Teraia ao Maatia.

¹⁹ A anganaki tabeia m'aane aikai n te Tembora, n aron are e a tia ni mwiokoa iai aia bakatibu are Aaron te UEA ae Atuan Iteraera.

Anganakiia Nikiraia Kanoan Rewi Tabeia

²⁰ Aikai araia ana kariki Rewi ake te korakina: Amram bon aia bakatibu Tebuera ao Ieteia.

²¹ Reabia bon aia bakatibu Itiia, are te karimoa n ana utu.

²² Itira bon taman Teromota ao tibun Iaata te unim'aane.

²³ Bon iai natin Eberon aika aman m'aane aika a bungiaki n aron aei man te karimoa nakon te karimwi: Ieria, Amaria, Iatiera, ao Iekameam.

²⁴ Utiera bon taman Mika ao tibun Tiamira te unim'aane.

²⁵ Itiia are tarin Mika, bon taman Tekaria.

²⁶ Merari bon tamaia Mari, Muti, ao Iaatia.

²⁷ Bon iai natin Iaatia aika teniman m'aane: Toam, Takuura, ao Iberi.

²⁸ Mari bon tamaia Ereata ao Kiti.

²⁹ Bon akea natin Ereata m'aane, ma Kiti bon taman Ierameera.

³⁰ Bon iai natin Muti aika teniman m'aane: Mari, Etera, ao Ierimota. Bon aikanne ana kariki Rewi ni kaineti ma aia kaainga.

³¹ A bon bane n anganaki tabeia n aron naba anganakiia aia koraki ake taian ibonga tabeia. Ao taani kakoaua bon Tawita, Tatoka, Abimereka, ao mataniwiin aia utu ibonga ao kanoan Rewi.