1.Rongorongo 22 - Te B'aib'ara

¹ E taku Tawita, “E na karaoaki ana Tembora te UEA ikai n te tabo ni kaaki kun ni uita aei. Ao e na mena naba ikai te baonikarea i bukin taiani karea.”

Ana Katauraoi Tawita i bukin karaoan te Tembora

² Ao Tawita, e tuangiia iruwa ake a maeka i aon Iteraera b'a a na nako Ierutarem. Ao e anganiia tabeman tabeia b'a te korokoroi taian atiibu aika a buubura i bukin karaoan te Tembora.

³ Iai i rouna te biti ae e m'aiti i bukin karaoan te neera ao intitin taian mataroa, ao e katauraoa te buraonti ae e korakora ae e a aki konaa ni baaireaki m'aitina.

⁴ Bon iai naba ana kai aika tiira aika e uoti man kaawan nako Titon ao Turo.

⁵ Ao e taku, “E na riai ni kakannato ana Tembora te UEA, b'a a aonga ni bane n ataia aomata nako n te aonnaba. Ma ngkai e rangi ni uarereke natiu te m'aane ae Toromon ao e tuai wanawana, ao n na riai moa ni katauraoi b'ain katean te Tembora ni kabane.” Ao bon anne bukina are e karaoi b'aai ni kabane iai aikai Tawita i m'aain matena.”

Tuangakin Toromon iroun Tawita Katean te Tembora

⁶ Ao e kananako wetean natina te m'aane are Toromon Tawita ao e tuangnga b'a e na katea te Tembora i bukin te UEA ae Atuan Iteraera.

⁷ Ao e taku, Natiu, I tangiria ni katea te Tembora ike E na taromauriaki iai te UEA ae Atuau.

⁸ Ma tabeua te tai n nako, ao E taku te UEA nako iu, “Tawita, ko a tia n tiringiia aomata aika a rangi n rawata, ao ko a tia ni buaka n taiani buaka aika a m'aiti. Ao bon anne bukina ae ko na aki katea iai au Tembora.

⁹ Ma ngkana e uea natim te m'aane, N na anganna te raoi n aki bubuaka ni kabuta abanueana. E na aranaki b'a Toromon i bukina b'a N na karokoa te mwengaraoi ao te rau i nanon ana tai ni uea.

¹⁰ E na karaoa au Tembora Toromon. E na riki b'a kaanga te nati te m'aane irou, ao N na riki b'a kaanga te tama nakoina. Ni koauana, e na uea n taai nako temanna mai buakoia ana kariki i aon Iteraera.”

¹¹ Toromon, natiu te m'aane, I tataro ngkai b'a E na memena iroum n taai nako te UEA ae Atuam ma ni kaawakina ana berita ni buokiko ni katea te Tembora i bukina.

¹² Tera ngke E anganiko te rabakau ma te wanawana, b'a ko aonga ni konaa n tautaekana Iteraera n aron are n Ana tua.

¹³ Ngkana ko ira nanon Ana tua nako ma ana reirei ake E a tia te UEA n angan Moote, ao ko na bon tetekeraoi. Ko na korakora ao ko na ninikoria ao e na aki b'ab'ara nanom ke ni maaku ni b'aai nako.

¹⁴ A bane n tia n reke irou b'aai ake ko na kainanoi ni karaoan te Tembora: Iai ngkai iroum e raka i aon 3,000 te tan te koora ao e raka i aon 34,000 te tan te tirewa. A rangi m'aiti naba taiani kai, atiibu ao taian buraonti aika a m'aiti ma taiani biti aika I aki konaa n taui rawawataia. Bubuti i bukin b'aai riki akana ko tangiri.

¹⁵ I a tia naba n anganiia m'aane tekorakina tib'angaia b'a taani koro atiibu mani katoka atiibu. Ao iai aomata aika kabenta ao aomata ake a rangi ni b'aati n te m'akuri ma

¹⁶ taiani koora, tirewa, buraonti ao taiani biti. Moan te rawata am taani m'akuri i bukin te m'akuri. Ma ngaia ae ko a riai ni waaki ngkai, ao I tataro b'a E na memena iroum te UEA i nanon am tai ni m'akuri.

¹⁷ Ao e anga ana taeka Tawita nako ia ana taani kairiiri mai Iteraera b'a a na buoka Toromon.

¹⁸ Ao e taku Tawita: E a tia te UEA ae Atuara ni buokiira ni kataenikaiia aomata ake a maeka ikai mai m'aira, ao E a tia n anganingkami te rau mairouia ara kairiribai ni kabane. Ao ngkai bon ana b'ai te UEA te aba aei ma ana aomata.

¹⁹ Ongotaeka iroun te UEA ae Atuami ma nanomi ni kabanea ao Tamneimi ni kabanea. Kam na moana karaoan te Tembora ni karineana, b'a a aonga ni konaa ni kaawakinaki ikai te Atiniberita ma b'aai ake a na kabonganaaki i bukin te taromauri ikai.