1.Rongorongo 19 - Te B'aib'ara

Buakanakin Ammon ao Turia iroun Tawita

¹ Tabeua te tai i mwiina, ao e mate uean Ammon are Naati, ao e a manga uea natina te m'aane are Anun.

² Ao e taku Tawita, “E rangi n akoai Naati ma ngaia, ae n na manga akoa naba natina te m'aane.” E kanako ia tabeman ana mataniwi nakon Ammon b'a a na tuanga Anun ana rainanoanga Tawita i bukin maten tamana

³ ao a taku mataniwi mai Ammon nakon Anun, “Ko kakoaua b'a e bon rangi ni karinea tamam ngkai e kanako ia m'aane aikai i bukin karauan nanom? E aki, ma e kanako ia b'a e na tib'aiakina abara, b'a e aonga ni konaa ni manga oki n tiringiira.”

⁴ Ao Anun, e tauia ana mataniwi Tawita ao e koroi buaia ni kabane ao e korouai niiniiraia rikaaki nakon koreaia, ao e kanako ia ni kaokiia.

⁵ Ao a rangi ni b'ainrang. Ao ngke e ongo arei Tawita ao e kanakoa ana taeka nako ia ana mataniwi akekei ni kaangai, “Kam na tiku i Ieriko ni karokoa a manga m'arairai buaimi, ao kam a tib'a konaa n okira ami auti.”

⁶ Ao a tib'a namakinna kaain Ammon ae a rangi ni kauna Tawita. Ma ngaia are, a kabooi e raka i aon tenibwi ma aua te ngaa te kirokuraem te tirewa i bukin kaboaia te taanga ni buaka ake a toka i aoia aoti mai Metobotamia ao man abanuean Turia ake Maaka ao Tob'a.

⁷ Tenibwi ma uoua te ngaa te taanga ni buaka, ao ai uana naba ma te uea are Maaka ma ana taanga ni buaka, ake a roko ni katei maeka i rarikin Meteb'a. Ao a kiitana naba aia kaawa ana taanga ni buaka Ammon man roko naba ni katauraoi nakon te buaka.

⁸ Ao e ongo Tawita te b'ai ae e riki, ao e a kanakoa Ioaba ma ana taanga ni buaka.

⁹ Ao a m'ananga ana taanga ni buaka Ammon nakon mataroan te kaawa are e buubura ao a katauraoi nakon te buaka, ngke a tei n aia tabo ni buaka ana taanga ni buaka Turia i nanon taiani marae.

¹⁰ Ao e nooriia aia taanga ni buaka aia kairiribai Ioaba b'a a borein n iterana ake uoua. Ma ngaia are, e a anaiia tautian Iteraera aika a bane aroia b'a a na buakaniia kaain Turia.

¹¹ Ao e rinea tarina are Abitiai b'a e na kairiia ake nikiraia kaain te taanga ni buaka ao e tuangiia b'a a na buakaniia kaain Ammon.

¹² Ao Ioaba e tuanga tarina ni kaangai, “Ngkana I a aki konaa ni kaaitaraia kaain Turia b'a a rangi ni m'aiti nakoira ao ko a manga roko ni buokiira. Ao ngkana a manga rangi ni korakora riki kaain Ammon nakoimi, ao ti na manga roko ni buokingkami.

¹³ Kam na ninikoria ao kakorakoraingkami ni buaka i bukiia ara aomata ao ana kaawa te UEA ae te Atua. I tataro b'a e na karaoi b'aai nako akana e kukurei iai.

¹⁴ Ao e buakaniia tautian Turia Ioaba, ao a birinako kaain Turia mairouia.

¹⁵ Ao ngke a nooria kaain Ammon b'a a birinako kaain Turia, ao a birinako mairoun Abitiai n okira oin aia kaawa. Ao e rairaki naba Ioaba n okira Ierutarem.

¹⁶ Ao ngke a ataia kaain Turia ae a tia ni konaaki, ao a kawaekoa aia taanga ni buaka teuana are e mena n iteran te Karaanga are Iuberetiti are teuana. A kairaki ana taanga ni buaka Ataretera aikai iroun ana mataniwi n te taanga ni buaka are Tiobaka nako Ammon.

¹⁷ Ao e ongo Tawita te b'ai ae a karaoia kaain Turia, ao e a bootia te taanga ni buaka ni kabane i aon Iteraera. A ri aon te Karaanga are Ioretan, ao e tuangiia b'a a na katauraoi nneia ni kaaitaraia ana taanga ni buaka Turia. Bon i mwiin teutana moanakin te buaka,

¹⁸ ao a birinako kaain Turia mairouia Iteraera. Ao Tawita e tiringiia itiua te ngaa taani buaka i aon aoti ao abwi te ngaa ake bon tautia. E bon tiringa naba Tiobaka, are aia mataniwi n te taanga ni buaka.

¹⁹ Ao ngke a nooria uea ake a mena ngkoa i aan Ataretera b'a e a tia Iteraera ni kataenikaiia, ao a raoi ma Tawita ao a kariaia b'a e na riki b'a aia tia tautaeka. A aki manga oki kaain Turia ni buokiia kaain Ammon.