1.Rongorongo 16 - Te B'aib'ara

¹ A katuka te Atiniberita i nanon te autinrianna are e a tia ni karaoia Tawita i bukina, ao i mwiina, a anga te karea are kakukureian te UEA ao taiani karea i bukin bubutiana ana kakab'aia.

² I mwiin banen ana waaki Tawita, ao e kakab'aiaia aomata n aran te UEA

³ ao e anganiia aomata n tatabemaniia ni kabane akekei teutana te kariki, tabeua taiani iriko ni man, ao te abutana te kureebe ae e m'au.

⁴ Ao e rineia tabeman kanoan Rewi b'a a na m'akuri n te Atiniberita, ana katangitang ao a na anene ni kamoamoa nakon te UEA ae Atuaia Iteraera.

⁵ Aia tia kairiiri bon Ataba, ao ana tia buobuoki bon Tekaria. A rineaki Ieiera, Temiramota, Ieiera, Matitia, Eriaba, Benaia, Obeta-Etom, ao te m'aane temanna ae arana Ieiera b'a taan katangi aabi ake a uarereke ao b'aai ni katangitang ake taiani karai. E katang taian timbara Ataba,

⁶ ao taian ibonga aika uoman ake Benaia ao Iatiera bon taan katangi buu ni katoa bong i matan te Atiniberita.

Ana Anene n Nebo Tawita

⁷ N te bong naba anne, ao bon ana moan tai Tawita n reireina Ataba ma kanoan Rewi ake tekorakina anenean taian anene n nebo aikai nakon te UEA:

⁸ Neboa te UEA ao tataro n arana! Tuangiia aomata nako b'aai ake E a tia ni karaoi.

⁹ Anene n nebo nakon te UEA! taekina ana kakai.

¹⁰ Kakatonga ao taromauria arana ae e tabu ma nanom ni kabanea.

¹¹ Onimakina te UEA ao m'aakana ae e korakora. Taromauriia n taai nako.

¹² Uring ana kakai ao ana kamimii ao ana babaaire aika a nako raoi.

¹³ Bon kaain ana utu Iteraera ngkoe, are ana toro; bon ana aomata ngkoe ae e rineaki, are ana kariki Iakob'a.

¹⁴ Bon te UEA Atuara, ao e uota te eti nako aon te aonnaba ni kabuta.

¹⁵ Ti na bon aki m'am'aninga ana boraraoi ao ana berita, ni karokoa ngaa n ririki.

¹⁶ E a tia ni karaoa ana berita ae akea tokina te Atua

¹⁷ nakon Aberaam, Itaaka, ao Iakob'a

¹⁸ ngke e kaangai, “N na anganiko te aba are Kanaan.”

¹⁹ N te tai arei ao bon ti tabeman ngaira, ao bon akea mwengara.

²⁰ Ti tiotio nako man te botannaomata teuana nakon te botannaomata teuana, man te aba teuana nakon te aba teuana.

²¹ E aki kariaia tekorakina b'a a na karaoa ae e aki raoiroi nako ia ana aomata. Ma E boni kaawakiniira ni katuaaia taan tautaeka

²² ma ni kaangai nako ia, “Kam na aki riingia au taani kairiiri aika a rineaki ke ni kamateia au burabeti!”

²³ Kaain aonnaba ni kabane anene n nebonebo nakon te UEA. Katanoataa ni katoabong ae e kaangai, “E a tia ni kamaiura te UEA”

²⁴ Tuangiia botannaomata nako n te aonnaba ni kaangai, “E kamimii te UEA e karaoi m'akuri aika a tamaroa”

²⁵ E korakora te UEA ao ti bon riai n anganna ara nebonebo ae moan te bati! Bon ti Ngaia te Atua ae e riai taromauriana iroura

²⁶ A taromauri bouannanti botannaomata ake tekorakina, ma E karaoi taiani karawa te UEA

²⁷ Anga te karinerine ma te nebonebo nakon te UEA, e on ana Tembora are e tabu ni m'aakana ma tamaroana.”

²⁸ Tuangiia aomata nako ni botannaomata ni bane, “Neboa mimitongin m'aakan te UEA.

²⁹ E kamimii, Neboia ao uotimai ami karea nako nanon ana Tembora. Taromauria te UEA, ae e rine man tabu.

³⁰ Kaain aonnaba ni kabane, kam na ruru!” E tei n nene te aonnaba, e aki konaa ni ioioaki.

³¹ Tuangiia taiani karawa ma aonnaba b'a a na kukurei ma ni bukamaruia! Katanoata nako ia botannaomata, “E uea te UEA!”

³² Tuanga marawa b'a a na rurunga ma baika a maiu ni kabane iai ao taian tawaana b'a a na kukurei ma arokan nanoia ni kabane.

³³ Ane a na bane arokan te buakonikai n anene ni kukurei nakon te UEA E a roko b'a e na motikitaekaia aomata ni kabane n te aonnaba.

³⁴ Neboa te UEA b'a e raoiroi nakoira, ao e aki konaa ni matebuaka ana tangira.

³⁵ Kam na kaangai nakoina, “Kamaiura, te UEA ae te Atua! Kaokiira mai buakoia taiani botannaomata. Ti na bukamaru man takaarua n neboa arana ae e tabu.

³⁶ Te UEA ae Atuan Iteraera, ko bon riai n neboaki n aki totoki.” I mwiin banen ana anene Tawita, ao a takaarua aomata ni kaangai, “Amen, Neboa te UEA!”

Rineakiia Taani Kairiiri n te Taromauri I Ierutarem ao Kibeon

³⁷ Ao Tawita e rinea Ataba ao kanoan Rewi man ana kaainga b'a a na tararua te taromauri n te bong koraki n te tabo are e kaawakinaki iai te Atiniberita.

³⁸ Ao taani buobuoki bon Obeta-Etom ma onongauni ma onoman aika ana koraki, ao Ota ao Obeta-Etom are natin Ierutun te m'aane bon taan tei.

³⁹ Ao Tawita e rinea naba Tatoka are te ibonga ma ana koraki b'a a na m'akuri i bukin te UEA n te Um'antabunrianna are i Kibeon.

⁴⁰ A na riki b'a taan angakarea n te baonikarea ni katoa ingabong ao tairiki, n aron te tua are E a tia te UEA n anga n te Tua are e a anganiia Iteraera.

⁴¹ Ao taani buokiia bon Eman ao Ierutun, n reitaki naba ma m'aane ake te koraki ake a tia n rineaki b'a a na neboa te UEA i bukin ana tangira ae akea tokina.

⁴² Bon tabeia naba Eman ma Ierutun te katang taiani buu, ao katangakin taian timbara ao b'aai ni katangitang ake tabeua i nanon tain te taromauri n te Um'antabunrianna. Ao kanoan Rewi ake n te kaainga are Ierutun boni ngaiia ake taan tei i Kibeon.

⁴³ Ao ngke e a toki, ao a bane n okiri aia auti aomata nako, ao Tawita e okiria ana utu n ana auti.