1.I-Korinto 15 - Te B'aib'ara

Manga Maiun Iesu mai buakoia Maate

¹ Taari, I a manga tuangngkami te euangkerio are I taekinna nako imi, are kam kaki naba i nanomi, are kam tei naba iai,

² ao are kam kamaiuaki naba iai ngkana kam taua ni kamatoa i nanomi; ma ngkana kam aki, ao a matebuaka ami onimaki.

³ B'a I moa n anganingkami i buakoni baika kakannato te baere I anganaki naba: b'a E mate Kristo i bukin ara bure n ai aron taekana n te B'aib'ara;

⁴ E taunaki, ao E a manga uti n te katenibong n ai aron taekana n te B'aib'ara;

⁵ E noraki irouni Keeb'a, ao rimwi, irouia uake tengauni ma uoman.

⁶ Ao rimwi, E noraki irouia taari aika nimabubua tabun n te tai ae ti teuana; ao m'aitin te koraki aei a boni maiu naba ngkai, ma iai tabem'aang ake a tia ni mate.

⁷ Ao rimwi, E noraki iroun Iakobo, ao rimwi, irouia taan tuatua ni kabaneia.

⁸ Ao i mwiia ni kabaneia, ao E noraki naba i rou, ngke kanga ai aron te aomata ngai are e bungiaki i m'ain ana tai.

⁹ B'a moan te mangori ngai i buakoia taan tuatua, ao I aki tau b'a N na atongaki b'a te tia tuatua, i bukina b'a I b'ainikirina ana ekaretia te Atua.

¹⁰ Ma n ana akoi te Atua ao I riki n ai arou aei; ao e aki matebuaka ana akoi nako iu: b'a I m'akuri korakora riki nakoia taan tuatua akekei; ma tiaki ngai, b'a bon ana akoi te Atua are i rou.

¹¹ Ma ngaia aei, ngkana tao ngai ae I tataekina te euangkerio ke uakekei, ma anne are ti tataekinna ao kam onimaki iai.

Manga Maiuia Maate

¹² Ngkana e taekinaki Kristo b'a E a tia ni manga uti mai buakoia maate, ao e aera ngkai a taku tabem'aang i buakomi b'a akea manga utiia maate?

¹³ Ma ngkana a aki manga uti maate, ao nanona ngkanne b'a e tuai ni manga uti Iesu;

¹⁴ ao ngkana E tuai ni manga uti Kristo, ao a matebuaka ara reirei, ao a matebuaka naba ami onimaki.

¹⁵ Ti na ataaki naba iai b'a ti kewe n ara kaotioti i bukin te Atua, ngke ti kaotiotia b'a Ngaia ae manga kamaiua Kristo man te mate; ma ngkana e koaua b'a a aki manga kamaiuaki maate, ao nanona b'a E bon aki manga kamaiua Kristo.

¹⁶ B'a ngkana a aki manga kamaiuaki maate, ao nanona ngkanne b'a E tuai ni manga kamaiuaki Iesu.

¹⁷ Ao ngkana E tuai ni manga kamaiuaki Iesu, ao a matebuaka ami onimaki, ao kam mena naba i buakon ami bure;

¹⁸ ao a aki kamaiuaki naba te koraki ake a tia ni mate ake a onimakina Kristo.

¹⁹ Ngkana arona b'a ti kaantaninga Kristo n ti te maiu aei, ao moa ni kananoanga ngaira i buakoia aomata ni kabaneia.

²⁰ Ma E a bon tia ni manga kamaiuaki Kristo mai buakoia maate, ao E riki b'a te b'ai ni kakoaua i bukiia ake a tia ni mate b'a a na manga kamaiuaki naba man te mate.

²¹ B'a ngke e roko te mate iroun te aomata, ao boni mairoun naba te aomata rokoni manga-maiuia maate.

²² B'a ngke e reke te mate irouia aomata ni kabaneia mairoun Atam, ao ai aroia naba b'a a na bane n reke i rouia te manga uti mairouni Kristo.

²³ Ma iai bairean temanna ma temanna ngkana e a manga kamaiuaki mai buakoia maate: b'a Kristo moa, ao rimwi te koraki ake a onimakinna ngkana E roko;

²⁴ ao rimwi te toki, are E na anga iai te tautaeka Kristo nakon te Atua are te Tama, ngkana E a tia ni kamaunai aaro n tautaeka, ma n tau aaro nako, ma aeka ni m'aka nako.

²⁵ B'a E riai n uea Kristo ni karokoa te tai are E kabaneia iai ni kakiia ana kairiribai i aani waena.

²⁶ Te kabanea ni kairiribai are na kamaunaki bon te mate.

²⁷ B'a ngke E taku te B'aib'ara b'a a bane b'aai ni kakiaki i aani waena, ao e mataata iai b'a e aki kakiaki i aana te Atua. Ma bon te Atua are kaki “b'aai ni kabane” i aani m'aakani Kristo.

²⁸ Ma ngkana a kabaneaki b'aai ni kakiaki i aani m'aakani Kristo, ao Ngaia ae te Nati E na kakiaki naba i aani m'aakan Teuare kabane b'aai ni kaki i aan te Nati, b'a E aonga n ataaki te Atua b'a Atuaia aomata nako, ao Atuani b'aai ni kabane.

²⁹ B'a ngkana tiaki ngaia anne, ao a na aera ake a b'abetitoaki i bukiia maate? Ngkana a bon aki manga uti maate, ao a aera ngkai a b'abetitoaki naba i bukiia?

³⁰ Ao bukin tera ngkai ti a boni kakaitara naba ma taiani kaoanikai ni katoa te aoa?

³¹ Taari, I kaitara ma te mate n te bong ae koraki! I riki n taekina aei i bukin nanou ni kamoamoa i bukimi i nanoni Kristo Iesu are ara UEA.

³² Ngke arona b'a I un ma maan aika tiritiri i Ebeto ao I b'aina te nano n aomata, ao tera manenana i rou? Ngkana arona b'a a aki manga kamaiuaki maate, ao e kangai te taeka n rabakau teuana, “Ti na am'arake ma ni mooi, b'a ae ti na mate ningabong.”

³³ Kam na tai burebureaki. “Aaro n i raorao aika buakaka a uru aroaro aika riai.”

³⁴ Kam na b'aina te iango raoi, ao tai bure; b'a iai tem'angina i buakomi aika aki ata te Atua; ao I taekina aei b'a kamamaaeami.

Aron te Rab'ata ngkana e a Manga Maiu

³⁵ Ane e na kangai temanna, “A na kanga ni manga uti maate? Ao tera aron rab'ataia ane a na roko iai?”

³⁶ Te baba! E aki kona n riki te baere ko unikia ngkana e aki mate moa.

³⁷ Ao ane ko unikia bon tiaki te aroka ae ikawai ma bon te uaa, ae tao uaan te uita ke tao uaan te kai riki teuana.

³⁸ Te Atua E angan te uaa anne te rab'ata n ai aron nanona, ao E katoai uaa nako ma aron rab'ataia.

³⁹ Tiaki te iriko ae ti te arona irikoni b'aai ni kabane aika maiu; iai te aeka teuana i bukiia aomata, ao teuana i bukiia manin aon te aba, ao teuana i bukiia mannikiba, ao teuana i bukiia ika.

⁴⁰ Ao iai rab'ata aika b'aini karawa ao rab'ata aika b'ain aon te aba; ma bon te tamaroa teuana tamaroani b'aini karawa, ao te tamaroa teuana tamaroani b'ain aon te aba.

⁴¹ Bon te tamaroa teuana tamaroan taai, ao teuana tamaroan nam'akaina, ao teuana tamaroaia itoi; ma e kakaokoro tamaroan te itoi teuana ma te itoi teuana.

⁴² Ao ai aron naba manga utiia maate. E na mka te rab'ata are taunaki, ma ngke e a manga uti, ao ai te rab'ata ae aki kona ni mka.

⁴³ Akea tamaroana ngke e taunaki, ma iai tamaroana ngke e a manga uti. Akea korakorana ngke e taunaki, ma iai korakorana ngke e a manga uti.

⁴⁴ E taunaki b'a te rab'ata ae bon te rab'ata, ma ngke e a manga uti ao ai te rab'ata ae te rab'ata n tamnei. Ngkana iai te rab'ata ae bon te rab'ata, ao iai naba te rab'ata ae te rab'ata n tamnei.

⁴⁵ Ao ai aron naba are koreaki ni kangai, “Te moa n aomata are Atam bon te aomata ae maiu”; Te kabanea n Atam bon te tamnei ni kamaiu.

⁴⁶ Ma tiaki te rab'ata n tamnei are roko moa, b'a te rab'ata ae bon te rab'ata, ao rimwi te rab'ata n tamnei.

⁴⁷ E riki te moa n aomata mai aon te aba, ao e karikaki man te tano; te Aomata are te kauoman boni mai karawa.

⁴⁸ Aron rab'atan te aomata are karikaki man te tano, bon aron naba rab'ataia aomata ake i aon te aba; aron rab'atan te Aomata are mai karawa, bon aron naba rab'ataia aomata ake mai karawa.

⁴⁹ Ao ngkai ti katotonga aron te aomata are karikaki man te tano, ao ti na manga katotonga naba aron te Aomata are mai karawa.

⁵⁰ Ao aio au taeka, taari: e aki kona ni karekea uean te Atua te iriko ma te raraa, ao e aki kona naba ni karekea te aki mka te mka.

⁵¹ Noria, I tuangngkami te b'ai ae raba: Ane ti na aki bane ni mate, ma ti na bane n onikaki,

⁵² n te tai ae moan te waekoa, n te rube ni mata, n tangin te kabanea ni bu. B'a ane e na tangi te bu, ao a na manga kamaiuaki maate n aki kona ni mka, ao ti na onikaki.

⁵³ B'a e riai n oneaki te aro ni mka aei nakon te aki mka, ao te aro ni mamate aei nakon te aki mamate.

⁵⁴ Ao ngkana e a tia n onikaki te aro ni mka aei nakon te aki mka, ao te aro ni mamate aei nakon te aki mamate, ao e kakoauaki iai te taeka are koreaki ni kangai: “E tae ana kai te mate!

⁵⁵ Te Mate, e nga am tokanikai? Te Mate, e nga am b'ai ni kaikoaki?”

⁵⁶ Te bure boni ngaia ana b'ai ni kaikoaki te mate, ao korakoran te bure bon te Tua.

⁵⁷ Ma E na katituaraoaki te Atua, are anganira te tokanikai iroun ara UEA are Iesu Kristo.

⁵⁸ Ma ngaia aei, tariu, aika kam tangiraki, kam na teimatoa, ao kam na aki toki ni kakaraoi ana m'akuri te UEA, ngkai kam ataia b'a a aki matebuaka ami m'akuri i bukin te UEA.