Yoano 9 - KNTP

Yesu byo abukile muntu wasemenwe na bumpofu

¹ Yesu byo apichilenga, wamwene muntu wasemenwe na bumpofu.

² Kabiji baana banji babwanga bamwipwizhe amba, “Laabi, ng'anyi walengele mambo, uno nyi, inyi bamusema, byo asemwa na bumpofu?”

³ Kumvwa Yesu amba, “Uno muntu kechi walengele mambo ne, nangwa bamusema nabo ne. Waubilwa bumpofu amba mingilo ya Lesa imwekele pe aye.

⁴ Atweba twafwainwa kwingila mingilo ya Aye wantuma, byo jikijipo juba, bufuku bubena kwiya kafwako ukonsha kwingila ne.

⁵ Byonkiji pano pantanda amiwa, ne kyeya kya pano pantanda.”

⁶ Pa kupwisha kwamba bino, washipijile mate panshi, wabumbile maloba na mate, ne kumushinga mpofu mateshi pa meso,

⁷ ne kumwambila amba, “Yainga, kowai mu kizhiba kya Shiloma” (kulumbulula ko kuuba amba, “Kutumwa.”) Ponkapo kaye ne kuya, ne kowa waowele, ne pa kubwela kamone.

⁸ Ponkapo bo aikajilenga naabo, ne aba bamumwenenga kala, byo ajinga wa lulombo, ba ambile amba, “Kechi ye yewa waikalanga na kulomba nyi?”

⁹ Kumvwa bakwabo amba, “I ye.” Kabiji bakwabo amba, “Ine, wamupashatu.” Pakuba mwine wa ambile amba, “Amiwa yami iye.”

¹⁰ Ponkapo abo ba mwambijile amba, “Nanchi ki ka kimulabisha meso?”

¹¹ Kumvwa aye amba, “Awa muntu yebateela amba Yesu, ye waji kubumba maloba, ne kunshinga pa meso, ne kung'ambila amba, yanga ku Shiloma ukowe. Kepo naji ku kowa, kammone ne kumona.”

¹² Ne abo bamwipwizhe amba, “Nanchi aye uji pi?” Kumvwa aye amba, “Kechi nayuka ne.”

¹³ Ponkapo abo bamuletele ku Bafaliseo, yenkawa wajinga mpofu kala,

¹⁴ Ne aja juba jo abumbijilemo maloba Yesu, ne kumulabisha meso anji jajinga ja Sabado.

¹⁵ Ponkapo Bafaliseo nabo bamwipwizhe moamwena meso. Kumvwa aye wibambijile amba, “Waji kumbiika maloba pa meso, ne kowa na kowa, kammone ne kumona.”

¹⁶ Kepo bamo Bafaliseo ba ambile amba, “Nanchi awo muntu kechi wa kwa Lesa ne, mambo kechi ulama Sabado ne. Kumvwa bakwabo amba, nanchi muntu ndengamambo akonshe byepi kuuba biyukilo biji bibye?” Ponkapo mwi abo mwabuukile lwabano.

¹⁷ Kabiji bamwipwizhe awa wajinga mpofu jibiji amba, “Nanchi anweba mumutela amba ka, byo emulabisha meso enu?” Kumvwa aye amba, “Ye ngauzhi.”

¹⁸ Pakuba Bayudea kechi baswile amba wajinga mpofu pano kamone ne, poso byo baichile bamusema awa watambwile meso,

¹⁹ kepo be bepwizhe amba, “Uno ye mwanenu yemuteela amba, wasemenwe na bumpofu nyi? Pakuba pano, nga byo kamone?”

²⁰ Kumvwa bansemi bebakumbwile amba, “Twayuka namba uno ye mwanetu wasemenwetu na bumpofu.

²¹ Pakuba pano byo kamone, kechi twayuka ne, nangwa wamulabisha meso anji, kechi twamuyuka ne, mwipuzhai wakoma, mwine usakwiambila!”

²² Bamusema ba ambiletu bino, mambo bachiine Bayudea, mambo Bayudea baitabanzhenye kala amba, inge muntu amutele amba, ye Kilishitu, tukamupanga mu shinagoga.

²³ Onkao mambo bamusema ba ambile amba, “Mwipuzhai wakoma.”

²⁴ Ponkapo abo bamwichile jibiji awa wajinga mpofu, ne kumwambila amba, “Tumbijika Lesa, atweba twayuka namba awo muntu ye ndengamambo.”

²⁵ Kumvwa aye amba, “Inge ye ndengamambo akyo kechi nayuka ne, ko kiji kimo kyo nayuka, kala najinga mpofu pakuba pano mbena kumona.”

²⁶ Ponkapo abo ba mwambijile amba, “Waji kwimuba byepi? Wimulabisha meso enu byepi?”

²⁷ Kumvwa aye wa ambile amba, “Naji kwimubula kala, ne anweba kechi mwaji kumvwa ne, musakila ka kumvwa jibiji? Ne anweba musaka mwikale baana banji babwanga nyi?”

²⁸ Ponkapo ke bamutuke ne kumutuka, ne kwamba amba, “Obewa yobe mwananji wabwanga, pakuba atweba twi baana babwanga ba kwa Mosesa.

²⁹ Atweba twayuka namba aye Lesa wa ambile ne Mosesa, pakuba a o kechi twayuka ko afuma ne.”

³⁰ Aye ye balabishe meso wibambijile amba, “Mama, kine kino kyokya kukumya! Byo mwabula kuyuka ko afuma, bino ye wandabisha meso ami.

³¹ Twayuka namba, aye Lesa kechi umvwa bandengamambo ne, pakuba inge muntu wamwakamwa Lesa, ne kuuba kyaswa muchima wanji, aye ye ye omvwa.

³² Kufuma ku ntendekelo ya pano pantanda, kechi kyaumvwanyikilepo amba, muntu walabisha meso a wasemwa na bumpofu ne.

³³ Inge awo muntu kechi wafuma kwi Lesa ne, kechi wakonsha kuuba kintu ne.”

³⁴ Kumvwa abo ba mwambijile amba, “Obewa wasemenwetu mu mambo, kabiji witufunjishe atweba nyi?” Ponkapo bamupangilemo mu shinagoga.

Bumpofu bwa ku mupashi

³⁵ Yesu wa umvwine amba, bamupangamo, ne kumutaana wamutaine, wamwipwizhe amba, “Anweba mwa mwitabila Mwana Lesa nyi?”

³⁶ Kumvwa aye wamukumbwile amba, “Nanchi ye ng'anyi, Nkambo, namwitabile?”

³⁷ Kumvwa Yesu wamwambijile amba, Mwamumona kala, kabiji i ye ye mwamba nanji.

³⁸ Kumvwa aye wa ambile amba, “Nkambo, naitabila!” Kamupopwele ne kumupopwela.

³⁹ Ne Yesu wa ambile amba, “Naishila kuchiba mambo pano pantanda, amba babula kumona, bamone, ne aba bamona, baluke ke bampofu.”

⁴⁰ Ne bamo Bafaliseo bo ajinga naabo ba umvwine bino byambo, ne kwamba ba mwambijile amba, “Nanchi ne atweba twi bampofu nyi?”

⁴¹ Kumvwa Yesu wibambijile amba, “Inge mwajinga bampofu, inge kechi muji na mambo ne, pakuba pano byo mwamba amba tumona, kwapwa! Mukiji na mambo ne pano.”