Yoano 8 - KNTP

Mwanamukazhi wakwachilwe mu bukende

¹ Yesu wayile ku Mutumba wa maolivi.

² Lukelokelo wabwelele mu nzubo ya Lesa. Ponkapo ne bantu bonse bamupwijile, ne aye waikajile panshi na kwibafunjisha.

³ Banembeshi ne bafaliseo baletele mwanamukazhi ye bakwachile na bukende, ne kumwimika mukachi ka jibumba.

⁴ Bamwambijile amba, “Mufunjishi, uno mwanamukazhi wakwatwa na bukende.

⁵ Pano mu Mizhilo, Mosesa witukambizhe amba, Ba bibye mwibase mabwe. Pakuba anweba nanchi amba ka?”

⁶ Ba ambile bibye na kumweseka amba, tumone mwa kumushiina, pakuba Yesu wanyeng'amine ne kunemba panshi na munwe wanji.

⁷ Pakuba byo bamukosejile na kumwipuzha, aye wainukile, ne kwibambila amba, “Wabula kulengapo mambo mwi anweba, atendekelepo kumwasa jibwe.”

⁸ Ponkapo aye wanyeng'amine jibiji, ne kunemba panshi.

⁹ Ne abo, byo baumvwine byo byo, batatwijile ku mukulumpe, kasa balupuka umo umo kufikizha ne ku wapeleleko. Ne Yesu washajile bunke bwanji, ne mwanamukazhi kasa aimana mukachi.

¹⁰ Ponkapo Yesu wainukile ne kumwambila amba, “Obewa mwanamukazhi, bakukushiina baji pi? Nanchi kafwako wa kukuzhachisha nenyi?”

¹¹ Kumvwa aye amba, “Mwane nangwa umotu ne, Nkambo.” Kumvwa Yesu amba, “Ne amiwa kechi nkuzhachishe ne. Yanga, bino kechi ukabwezhepo kulenga mambo ne.”

Yesu ye kyeya kya pano pantanda

¹² Ponkapo Yesu wibambijile jibiji, amba, “Amiwa ne kyeya kya pano pantanda, awa undondela amiwa kechi ukenda mu mfishi ne, ukekala na kyeya kya bumi.”

¹³ Kepo Bafaliseo amba, “Mubena kwishimuna anweba bene, ne kushimuna kwenu kechi kwa kine ne.”

¹⁴ Kumvwa Yesu wibambijile amba, “Nangwa mbena kwishimuna amiwa mwine, kushimuna kwami ko kwa kine, ke pakuba nayuka ne konafuma, ne kongya, pakuba anweba kechi mwayuka konafumine ne, nangwa kongya ne.

¹⁵ Anweba muchibila mambo mu buntunshi, amiwa kechi nchiba mambo a muntu nangwa umotu ne.

¹⁶ Pakuba nangwa nchiba mambo amiwa, mo nchibila momwa kine, mambo kechi nji bunke ne, mambo bataata bantumine baji ne amiwa.

¹⁷ Kine ne mu mizhilo yenu kyanembwa amba, kushimuna kwa bantu babiji ko kwa kine.

¹⁸ Amiwa mbena kwishimuna amiwa mwine, ne bataata bantumine nabo banshimuna.”

¹⁹ Ponkapo ba mwambijile amba, “Nanchi bashenu baji pi?” Kumvwa Yesu amba, “Kechi mwangyuka amiwa ne, nangwa kwibayuka bataata ne, inge mwaji kungyuka amiwa, inge mwibayuka ne bataata.”

²⁰ Bino byambo wibyambile mo balambwila, byo afunjishenga mu nzubo ya Lesa, byonkabo kafwako wamukwachile ne, mambo kimye kyanji kyaji kikyangye kufika.

Akwa kongya amiwa, anweba kechi mwakonsha kuyako ne

²¹ Ponkapo Yesu wibambijile jibiji amba, “Amiwa nkafumapo, kabiji mukankeba, bino mukafwa mu mambo enu. Akwa kongya amiwa, anweba kechi mwakonsha kuyako ne.”

²² Ponkapo Bayudea batatwile kwamba amba, “Nanchi aye usakwiipaya mwine nyi, byo a amba amba, kongya amiwa, anweba kechi mwakonsha kufikako ne?”

²³ Kumvwa aye wibambijile amba, “Anweba mwi bapanshi, amiwa nafumine kwiulu anweba mwi ba pano pantanda, amiwa kechi ne wa pano pantanda ne.

²⁴ Onkao mambo naji kwimwambila namba, mukafwa mu mambo enu inge mwabula kungitabila amiwa amba, yami iye, mukafwa mu mambo enu.”

²⁵ Kepo abo bamwambijile amba, “Nanchi anweba mwi bang'anyi?” Ne Yesu wibambijile amba, “Byonka byonkelwa kwimubula kutatwila ku kimye kitanshi.

²⁶ Nji na byavula bya kwimwambila ne bya kwimuzhachisha. Pakuba aye wantuma ye wa kine, ne byonka byo naumvwine kwi aye, byo byo ng'amba kuba pano pantanda.”

²⁷ Abo kechi baumvwishishe amba, ubena kwamba na mambo a aye Shanji ne.

²⁸ Ponkapo Yesu wibambijile amba, “Byo mukemika Mwana Muntu, po po mukangyuka amiwa amba, yami iye, ne byo mbula kwiubila kintu amiwa mwine ne, pakuba mwamfunjishishe Bataata, momo ng'ambila bino bintu.

²⁹ Ne aye wantuma uji ne amiwa, aye kechi wandeka bunke ne, mambo mbena kuuba bya kumutokesha pa muchima moba onse.”

³⁰ Byo a ambile bino bintu, bavula bamwitabijile.

Bukine bukemukasulula

³¹ Ponkapo Yesu wa ambijile Bayudea bamwitabijile amba, “Anweba inge mwikajijile mu mambo ami, abya kine mwi baana bami babwanga,

³² ne anweba mukebuyuka bukine, ne abo bukine bukemukasulula ke baana ba bene.”

³³ Kumvwa abo bamwambijile amba, “Atweba twi ba mukisemi kya kwa Abulahama, tukyangye kunonkwapo buzha ku muntu nangwa umotu ne. Anweba ki ka kyo mwa ambila amba, mukekala ke baana ba bene?”

³⁴ Kumvwa Yesu amba, “Kine, kine nemwambila namba, bonse balenga mambo bo bazha ba bundengamambo.

³⁵ Byonkabo muzha kechi wikala myaka mu nzubo ne, pakuba mwana ye wikala mu nzubo myaka.

³⁶ Byonkabyo inge aye Mwana wimukasulula, abya mukekala bakasuluka kine.

³⁷ Nayuka namba, mwi ba mukisemi kya kwa Abulahama, bino mubena kusaka kungipaya mambo, mambo ami kechi aji na mpunzha mu michima yenu ne.

³⁸ Amiwa ng'amba byo namwene kwi bataata, ne anweba muba byo mwamwene kwi shenu.”

³⁹ Kumvwa abo ba mwambijile amba, “Abulahama ye shetu.” Ne Yesu wibambijile amba, “Inge mwajinga baana ba kwa Abulahama, inge mubena ku bamingilo ya Abulahama.

⁴⁰ Pakuba pano ke musake kungipaya, amiwa muntu wimubuula bya kine, byo naumvwine kwi Lesa. Abulahama kechi waubile bya bibye ne!

⁴¹ Anweba muba mingilo ya shenu.” Kumvwa abo ba mwambijile amba, “Atweba kechi twasemenwe mu bukende ne, tujitu na Shetu umo, yenka Lesa.”

⁴² Kumvwa Yesu wibambijile amba, “Inge Lesa wajinga Shenu, inge mwantemwa amiwa, mambo amiwa nafumine kwi Lesa, naiya ne pano. Kabiji kechi neishijiiletu amiwa mwine ne, bino aye ye wantumine.

⁴³ Mambo ka o mubujila kumvwisha byambo byami? Mambo anweba kechi mwakonsha kutambula mambo ami ne.

⁴⁴ Anweba mwi ba kwa shenu Diabola, kabiji musaka kulondela byo asaka aye shenu. Aye wajinga mbanzhi kufuma ku ntendekelo, ne kwikala mu bukine ne, mambo bukine kechi buji mwi aye ne. Byo a amba bubela, wamba bya kwanji mwine. Mambo ye wa bubela, ye shanja bubela.

⁴⁵ Pakuba amiwa naamba bya kine, anweba kungitabila ne.

⁴⁶ Nanchi ing'anyi wa mwi anweba wanzhachisha na mambo? Kabiji inge ng'amba bya kine, mambo ka o mwabujila kungitabila?

⁴⁷ Aye wa kwa Lesa umvwa byambo bya Lesa. Onkao mambo anweba kechi mwibyumvwa ne, mambo kechi mwi ba kwa Lesa ne.”

⁴⁸ Kumvwa Bayudea amba, “Nanchi twa amba bulongo namba, anweba mwi mwina Samaliya, kabiji muji na mudemona.”

⁴⁹ Kumvwa Yesu amba, “Amiwa kechi nji na mudemona ne, pakuba amiwa nebanemeka bataata, ne anweba mwampelula.

⁵⁰ Bino kechi nkeba lukumo lwami amiwa mwine ne. Ko aji umo unkebelalo, ye uchiba mambo.

⁵¹ Kine, kine nemwambila namba, umvwe muntu walama mambo ami, kechi ukamona lufu myaka ne myaka nangwa pacheche ne.”

⁵² Kumvwa Bayudea ba mwambijile amba, “Pano twayuka namba muji na mudemona! Abulahama wafwile, ne bangauzhi nabo, pakuba anweba amba, umvwe muntu walama mambo ami kechi ukamona lufu myaka ne myaka nangwa pacheche ne.

⁵³ Nanchi anweba mwakila mushakulu wetu Abulahama nyi? Aye wafwile ne bangauzhi nabo bafwile, nanchi anweba bene mwi languluka amba mwi ng'anyi?”

⁵⁴ Kumvwa Yesu amba, “Umvwe amiwa netumbijika amiwa mwine, abya lukumo lwami lo lwatu. Ko baji bantumbijika, abo bataata bo mwamba amba, ye Lesa wenu.

⁵⁵ Kechi mwibayuka ne, pakuba amiwa nebayuka. Kabiji inge ng'ambe namba, kechi nebayuka ne, abya nsakwikala ke wa bubela pamo ne anweba. Pakuba amiwa nebayuka, ne mambo abo nealama.

⁵⁶ Shenu Abulahama wasekejile pa kuketekela kumona juba ja kwiya kwami, ne kumona wijimwene, ne kusekela wasekejile.”

⁵⁷ Ponkapo Bayudea bamwambijile amba, “Anweba mukyangye kufikizha myaka makumi atanu, Abulahama mwamumwene nyi?”

⁵⁸ Kumvwa Yesu wibambijile amba, “Kine, kine nemwambila namba, Abulahama byo ajinga ukyangye, amiwa kasa njipo.”

⁵⁹ Ponkapo batolele mabwe amba bamwase, pakuba Yesu wifiile, ne kulupuka walupukile mu nzubo ya Lesa.