Yoano 6 - KNTP

Yesu byo ebajishishe bantu biumbi bitanu

¹ Bino byo byapwile aye Yesu wa abukijile ku bushiya bwa kizhiba kya Ngalilea, kyo kizhiba kya Tibeliasa.

² Ne jibumba jikatampe ja mulondejilenga, mambo bamwene biyukilo byo aubilenga ku bakolwa.

³ Ponkapo Yesu wakanjijile pa mutumba, po poaikajile na baana banji babwanga.

⁴ Kabiji kijiilo kya Bayudea kya Lupitailo kyajinga pepi.

⁵ Ponkapo Yesu byo ainwine meso anji, ne kumona jibumba jikatampe kasa jiiya ko aji, wa ambijile Filipa amba, “Tusakupota kwepi bashinkwa, namba bano baje?”

⁶ Aye wa ambile bino mu kumweseka, mambo aye mwine wayukijile jimo byo asakuuba.

⁷ Kumvwa Filipa wamwambijile amba, “Ndenali bitoota bibiji kechi asa kufikilamo kupota bashinkwa ba kukumbana bonse kutambula kacheche, kacheche ne.”

⁸ Mwananji wabwanga umo aye Andeleo mulongo wanji Shimona Petelo, wamwambijile amba,

⁹ “Po aji mwanyike pano, uji na bashinkwa ba mbaale batanu ne masabi abiji. Pakuba bino byakepeshatu mambo bantu bavujisha.”

¹⁰ Kumvwa Yesu amba, “Bekajikai bantu.” (Kabiji akwa kwajinga nsono yavula.) Kepo baikajile panshi, banabalume pa kwibabala bajinga pepi biumbi bitanu.

¹¹ Ponkapo Yesu washikwile bashinkwa, ne kumusanchila Lesa, wibabijile baikajile panshi ne masabi nao pamo, kabiji bonse bajiile monka mwasakijile michima yabo.

¹² Ponkapo byo baikuchile wa ambijile baana banji babwanga amba, “Tolaulai bibese byashalapo, kechi ponaike nangwa kacheche ne.”

¹³ Kepo batolawile, ne kuyuzha bayuzhizhe bilukwa jikumi na bibiji bya bibese bya bonkaba bashinkwa batanu ba mbaale byashajilepo pa kupwisha kuja bantu.

¹⁴ Ponkapo aba bantu byo bamwene kiyukilo kyo aubile ba ambilenga amba, “Kine uno ye yewa Ngauzhi wa Lesa ye twatengejilenga pano panshi.”

¹⁵ Ponkapo Yesu byo ayukile amba, basaka kwiya na kumukanjikizha amba, ekale ke mfumu, wabwelele ku mutumba kwa bunke bwanji.

Yesu byo a endele pa mema

¹⁶ Kabiji mabanga a bufuku baana banji babwanga bakunkulukijile ku kalunga ka mema.

¹⁷ Bayile mu bwato amba, babukile ku Kapenama. Bwaubile bwaila ne kala, ne aye Yesu wajinga ukyangye kwiya ko baji.

¹⁸ Kabiji pa kalunga ka mema payilenga na kuuba manyaki na mambo a kipuupu kikatampe kyapupilenga.

¹⁹ Kabiji byo bavuwilenga misinso isatu nangwa ina pa mema, bamwene Yesu kasa enda pa mema, kwiya kwipi na ku bwato, ne abo baubile moyo.

²⁰ Pakuba aye wibambijile amba, “Ye amiwa bano, kechi mube moyo ne!”

²¹ Kepo baswile kumutambula mu bwato, ponkapotu bwato bwafikile ku kitulu ko bayilenga.

Bantu byo bakebele kiyukilo

²² Juba jalondejilepo, jibumba jaimene ku bushiya bwa kizhiba byo jayukile amba, kechi kwajinga bwato bukwabo kuno ne, kwajingatu bumo bonka, kabiji ne Yesu kechi wajikuya mu bwato pamo na baana banji babwanga ne, pakuba baana banji babwanga baji kuyatu bunke bwabo.

²³ Nangwa byonkabyo kwaishile maato akwabo afumine mu Tibeliasa kwiya kwipi nako bajiile kajo, byo apwishishe kusanta aye Nkambo.

²⁴ Kepo jibumba byo jayukile amba, Yesu kechi uji kuno ne baana banji babwanga ne, ponkapo abo bene bakanjijile mu maato, ne kuya ku Kapenama na kumukeba Yesu.

Yesu ye kajo ka bumi

²⁵ Kabiji byo bamutaine ku bushiya bwa kizhiba, bamwipwizhe amba, “Laabi, ng'anyi kimye kyo mwaji kwiya kuno?”

²⁶ Yesu wibakumbwile amba, “Kine, kine, nemwambila namba, mubena kunkeba, kechi na mambo a biyukilo byo mwamwene ne, bino na mambo onka a bashinkwa bo mwajiile ne kwikuta.

²⁷ Kechi mwingijile kajo konaika ne, pakuba ingijilai kajo kakelwa ne ku bumi bwa myaka ko akemupa Mwana Muntu. Mambo aye bamubikile kayukilo kwi Shanji, yenka Lesa.”

²⁸ Kepo ba mwambijile amba, “Tube byepi, namba twingile mingilo ya Lesa?”

²⁹ Kumvwa Yesu wibambijile amba, “Uno ye mwingilo wa Lesa, amba mu mwitabile aye yenka ye atuma.”

³⁰ Kepo ba mwambijile amba, “Nanchi ng'anyi kiyukilo kyo musa kuba namba twikimone, twimwitabile? Ng'anyi mwingilo ye musa kwingila?

³¹ Bashakulu betu bajiilenga aa manna mungyetu, monka mo kyanembelwa amba, ‘Wibapele kajo kafuma mwiulu amba baje.’ ”

³² Kabiji Yesu wibambijile amba, “Kine, kine, nemwambila namba, Mosesa kechi wimupele kajo kafuma mwiulu ne, pakuba bataata bapana kajo ka kine kafuma mwiulu.

³³ Ke pakuba kajo ko apana aye Lesa, ke yenkawa ufuma mwiulu, ye upana bumi ku ba pano pantanda.”

³⁴ Kumvwa abo ba mwambijile amba, “Nkambo, mwitupenga kano kajo myaka ne myaka.”

³⁵ Kumvwa Yesu wibambijile amba, “Amiwa ne kajo ka bumi, aye wiya kwi amiwa kechi akomvwe nzala nangwa pacheche ne, kabiji ne awa wangitabila amiwa kechi akomvwe kilaka nangwa myaka yonsetu ne.

³⁶ Kabiji byo naji kwimwambila namba, kumona nangwa mwammona amiwa, kechi mwaitabila ne.

³⁷ Bonse bo bampa bataata bo bakeya kwi amiwa, kabiji awa wiya kwi amiwa kechi nkamupange nangwa pacheche ne.

³⁸ Mambo nafumine mwiulu, kechi mambo a kuuba kyaswa muchima wami amiwa mwine ne, poso kuuba kyaswa muchima wa kwa Aye wantuma.

³⁹ Kabiji kino kyo kyaswa muchima wa Aye wantuma amba, ku bonse bo ampele kechi nkeleepo nangwa umo ne, nanchi amba nkebasangule mu juba jikapelaako.

⁴⁰ Pakuba kino kyo kyaswa muchima wa bataata amba, bonse bamumona Mwana ne kumwitabila, bekale na bumi bwa myaka, kabiji ne amiwa nkebasangula mu juba jikapelaako.”

⁴¹ Kepo Bayudea bamunyinyichilenga, mambo aye wa ambile amba, “Amiwa ne kajo kafuma mwiulu.”

⁴² Ne abo ba ambile amba, “Nanchi uno kechi ye Yesu, mwana Yosefwa nyi? Bashanji ne bainanji twibayuka. Pano wa ambilaka byo byo amba nafuma mwiulu?”

⁴³ Kumvwa Yesu wibambijile amba, “Kechi munyinyitenga anweba bene na bene ne.

⁴⁴ Kafwako wakonsha kwiya kwi amiwa ne, poso abo Bataata bantuma bamukoka, ne amiwa nkamusangula mu juba jikapelaako.

⁴⁵ Kyanembwa mu buku wa bangauzhi amba, ‘Bonse bakebafunjisha kwi Lesa.’ Byonkabyo bonse bomvwa ne kufunjishiwa kwi Bataata, bo beya kwi amiwa.

⁴⁶ Bino kafwako wibamwenepo Bataata ne, poso yenkawa wafuma kwi Lesa, ye wibamwene Bataata.

⁴⁷ Kine, kine nemwambila namba, aye waitabila uji na bumi bwa myaka.

⁴⁸ Amiwa ne kajo ka bumi.

⁴⁹ Bashakulu benu bajilenga aa manna mungyetu, ne kufwa bafwile.

⁵⁰ Kano ko kajo kafuma mwiulu, amba muntu ajeko abule kufwa.

⁵¹ Amiwa ne kajo komi kafuma mwiulu, inge muntu waja ku ko kano kajo ukekalanga na bumi myaka. Kabiji ne aka kajo ko nkapana amiwa ye mubiji wami, ye nkapana namba ba pano pantanda bekale na bumi.”

⁵² Ponkapo abo Bayudea bapachikilenga bene na bene amba, “Nanchi uno, wakonsha byepi kwitupa mubiji wanji amba tuje?”

⁵³ Kumvwa Yesu wibambijile amba, “Kine, kine nemwambila namba, umvwe anweba ne kuja ku mubiji wa Mwana Muntu ne, ne kutoma mashi anji ne, kechi muji na bumi mwi anweba bene ne.

⁵⁴ Awa uja ku mubiji wami, ne kutoma mashi ami, ye uji na bumi bwa myaka, ne amiwa nkamusangula mu juba jikapelaako.

⁵⁵ Ke pakuba mubiji wami ko kajo ka kine, ne mashi ami byo bya kutoma bya kine.

⁵⁶ Awa uja ku mubiji wami ne kutoma mashi ami ye uji mwi amiwa, ne amiwa nji mwi aye.

⁵⁷ Byo bantumine abo bataata ba bumi, ne amiwa mbena kumwena bumi monka mwi bataata. Byonkabo awa unja amiwa, ne aye naye ukamwena bumi monka mwi amiwa.

⁵⁸ Kano ko kajo kafuma mwiulu, kechi pamo nako bajilengapo bashakulu benu ne, pakuba abo bekajiile ne kufwa bafwile, bino awa uja ku kano kajo ukekala na bumi myaka.”

⁵⁹ Bino wibyambile byo afunjishenga mu shinagoga mu Kapenama.

Byambo bya bumi bwa myaka

⁶⁰ Ne baana banji babwanga bavula, byo ba umvwine bino ba ambile amba, “Ano mafunjisho akatazha, ng'anyi wakonsha kwiatambula?”

⁶¹ Pakuba Yesu byo ayukile mwine mu muchima wanji amba, baana banji babwanga babena kunyinyita ano mambo, wibambijile amba, “Ano mambo abena kwimutuntwisha nyi?

⁶² Nanchi inge mukamone Mwana Muntu sa akanjila ko ajinga kala mukoba byepi?

⁶³ Ye Mupashi upana bumi, buntunshi bo bwatu. Byambo byo nemwambila byo bya mupashi, kabiji byo bya bumi.

⁶⁴ Bino mo baji bamo ba mwi anweba babula kwitabila.” Ke pakuba Yesu wayukijile jimo ne ku ntendekelo babula kwitabila, ne aye ukamusolola.

⁶⁵ Kabiji wa ambile amba, “Naji kwimwambila namba, kafwako wakonsha kwiya kwi amiwa ne, poso wapewakyo kwi bataata.”

⁶⁶ Ponkapo baana banji babwanga bavula babwelele mu nyuma, ne kwenda nanji jibiji ne.

⁶⁷ Ne aye Yesu wa ambijile ba jikumi na babiji amba, “Ne anweba musaka kufumako nyi?”

⁶⁸ Kumvwa Shimona Petelo wamwambijile amba, “Nkambo, tukaya kwi ng'anyi? Byambo bya bumi bwa myaka muji nabyo anweba.

⁶⁹ Kabiji atweba twaitabila ne kuyuka namba, anweba mwi Wazhila wa kwa Lesa.”

⁷⁰ Yesu wibambijile amba, “Nanchi, kechi nemusalulwile anweba jikumi na babiji nenyi? Pakuba umo wa mwi anweba ye mulwanyi.”

⁷¹ Wanenene Yudasa, mwana Shimona Isakaliota, mambo aye ye wajinga ukamusolola, ye umo wa boba ba jikumi na babiji.