Yoano 4 - KNTP

Yesu ne mwanamukazhi mwina Samaliya

¹ Bafaliseo ba umvwine amba, aye Yesu ubena kulenga ne kubatizha baana babwanga bavula kukila Yoano,

² (nangwa byo byo kechi mwine Yesu wabatizhilenga ne, kana bonka baana banji babwanga).

³ Yesu, byo ayukile, wafumineko ku Yudea, wabwelele ku Ngalilea.

⁴ Kabiji wafwainwe kupita mu Samaliya.

⁵ Kepo afikile ku muzhi umo wa mu Samaliya yebateela amba Saikala, pepi na ku mushiji wapaine Yakoba kwi mwananji Yosefwa.

⁶ Mushima wa kwa Yakoba naye wajinga konka. Yesu byo akookele na lwendo, waikajile ku mushima, juba kasa jashinkimana pa mitwe.

⁷ Kwaishile ne mwanamukazhi mwina Samaliya na kutapula mema. Yesu wamwambijile amba, “Mpepo mema ntome.”

⁸ (Baana banji babwanga kasa baya kala mu muzhi na kupota kajo).

⁹ Kepo mwanamukazhi mwina Samaliya a mukumbwile amba, “Anweba, byo muji mwina yudea, mambo ka o mundombela bya kutoma, amiwa mwanamukazhi mwina Samaliya?” (Ke pakuba Bayudea kechi bomvwang'ana na bena Samaliya ne).

¹⁰ Kumvwa Yesu amba, “Umvwe wajikuyuka akya kipana Lesa, ne aye ubena kukulomba amba, mpepo mema ntome inge wajikumulomba aye, aye naye inge wajikukupa mema a bumi.”

¹¹ Mwanamukazhi wamwambijile amba, “Mwane, kechi muji na kya kutapulako ne, ne mushima naye wazhika, nanchi ao mema a bumi mwi afumye pi?

¹² Nanchi anweba mwakila mushakulu wetu Yakoba, witupele uno mushima nyi? Kabiji aye mwine watomenengamo, ne baana banji, ne banyama banji.”

¹³ Kumvwa Yesu wamwambijile amba, “Bonse batoma ano mema bakomvwa kilaka jibiji,

¹⁴ pakuba awa ukatoma mema o nkamupa amiwa, kechi ukomvwa kilaka myaka ne myaka ne. Mambo aa mema o nkamupa akaaluka munda mwanji ke nsulo ya mema, kasa atupauka ne ku bumi bwa myaka.”

¹⁵ Mwanamukazhi wamwambijile amba, “Mwane, mpai ao mema, ntome! Pakuba amba kechi nkomvwe jikwabo kilaka ne, nangwa kwiya kuno na kutapula mema ne.”

¹⁶ Ne Yesu wamwambijile amba, “Kamwite mwata obe, wiye nanji kuno.”

¹⁷ Kumvwa mwanamukazhi amba, “Kechi nji na mulume ne.” Ne Yesu wamwambijile amba, “Wa amba bulongo, byo wa amba amba, kechi uji na mulume ne.

¹⁸ Mambo waikajile na banabalume batanu, ne yewo ye uji nanji kechi mwata obe ne. Abyo byo wa amba, wa amba kine.”

¹⁹ Kumvwa mwanamukazhi amba, “Mwane, nanchi pano nayuka namba anweba mwi ngauzhi.

²⁰ Bashakulu betu bapopwejilenga Lesa mu ye uno mutumba, pakuba anweba amba, mu Yelusalema mo bafwainwa bantu kumupopwela Lesa.”

²¹ Yesu wa ambile amba, “Obewa mwanamukazhi ngitabile amiwa, juba jibena kwiya jo mukabula kupopwela Bataata pa ye uno mutumba, nangwa mu Yelusalema ne.

²² Anweba mupopwela kyo mwabula kuyuka, atweba tupopwela kyo twayuka, mambo lupulukilo lufuma ku Bayudea.

²³ Kabiji kimye kibena kwiya, ne pano kyafika kala, kyo bakebapopwelanga Bataata ku bapopweshi bakine mu Mupashi ne mu bukine, mambo bo bo bakeba Bataata amba, bampopwele.

²⁴ Lesa ye Mupashi, ne bonse bamupopwela bafwainwa kumupopwela na Mupashi ne na bukine.”

²⁵ Kumvwa mwanamukazhi amba, “Nayuka aye Mesiasa ukeya (yebateela amba Kilishitu,) aye byo akeya uketulumbulwila byonse.”

²⁶ Kumvwa Yesu amba, “Ye amiwa uno ye wisamba nanji.”

²⁷ Ponkapo baana banji babwanga babwelele, kabiji bakuminye byo a ambilenga na mwanamukazhi. Bino kafwako wa ambile amba, “Mubena kukeba ka? Nangwa amba, ‘Mambo ka kyo mwisambila nanji?’”

²⁸ Ponkapo mwanamukazhi washiile mulondo wanji, kaye ne kuya ku muzhi, wakebabujiile bantu amba,

²⁹ “Twayai, mukamone muntu, wambuula byonse byo naubile kala. Uno kana ye Kilishitu nyi?”

³⁰ Ponkapo bafumine mu muzhi, ke beye ne ko aji Yesu.

³¹ Akwa kunyuma baana banji babwanga bamusashijile amba, “Laabi, jai!”

³² Pakuba aye wibambijile amba, “Amiwa nji na kajo ka kuja ko mwabula kuyuka anweba.”

³³ Kepo baana banji babwanga beipwizhenga bene na bene amba, “Kuji wa kumuletela kajo nyi?”

³⁴ Kumvwa Yesu amba, “Kajo kami, ko kuuba kyaswa muchima wa aye wantuma, ne kupwisha mwingilo wanji.

³⁵ Anweba mwamba amba, ‘Kwashala bang'ondo bana, kepo ke kunowa.’ Talai, amiwa nemwambila namba, inunai meso enu, mumone majimi, byo atooka kala afwainwa kunowa.

³⁶ Kabiji awa unowa utambula mfweto, ubungizha ne kajo ka ku bumi bwa myaka; namba ne yewa ukusa nkunwa ne yewa unowa basekele pamo.

³⁷ Mambo pano po paji bukine bwakyo kino kyambo, mukwabo ukusa nkunwa, mukwabo unowa.

³⁸ Amiwa nemutumine anweba po mwabujile ne kwingila, bakwenu baingijilengamo, anweba mwajiila mu mingilo yabo.”

³⁹ Ne bavula bena Samaliya ba kuyewa muzhi bamwitabijile mambo a byambo bya mwanamukazhi, byo a ambile amba, “Wambuula byonse byo naubile kala.”

⁴⁰ Kabiji bena Samaliya byo baishile ko aji, bamusashijile amba, bekale nanji mu muzhi wabo, byonkabyo wazhikijilwe monka moba abiji.

⁴¹ Bavula bakwabo baitabijile mambo a byambo byanji mwine,

⁴² Ne abo ba mwambijile mwanamukazhi amba, “Pano twaitabila, kechi na mambo a byambo byobe ne, bino mambo ne atweba bene twiumvwina, ne kuyuka twayuka namba, uno kine ye Mupulushi wa ba pano pantanda.”

Kubukwa kwa mwana wa mukulumpe wa kyalo

⁴³ Kabiji pakupwa ao moba abiji Yesu wafumineko, ne kuya ku Ngalilea.

⁴⁴ Mambo aye mwine Yesu wa ambile amba, “Ngauzhi kechi uji na buneme mu kyalo kyanji mwine ne.”

⁴⁵ Byonkabyo byo aishile mu Ngalilea, bena Ngalilea bamutambwile, mambo bamwene byonse byo aubilenga mu Yelusalema mu moba a kijiilo mambo ne abo bayile ku kijiilo.

⁴⁶ Kepo abwelele mu Kena wa mu Ngalilea, konka ko a alulwile mema ke binyu, kabiji ku Kapenama kwajinga ne kinemanga, wajinga na mwananji wamulume wakolelwenga.

⁴⁷ Ne aye byo a umvwine amba, Yesu wafuma kala ku Yudea waiya ku Ngalilea, ponkapo wayile ko ajinga, na kumusashijila amba, amubuke mwananji, mambo wajinga pepi na kufwa.

⁴⁸ Ne Yesu wamwambijile amba, “Anweba kechi mwitabila ne kanatu mwamona biyukilo ne bya kukumya.”

⁴⁹ Kinemanga wamwambijile amba, “Mwane beye, kasa akyangye kufwa mwanami.”

⁵⁰ Kumvwa Yesu amba, “Yainga, mwanenu pano ke mumi!” Ponkapo aye mwanamulume waitabile byambo byo a mwambijile Yesu, kaye ne kuya.

⁵¹ Byo akiyilenga, bakalume banji bamusambakene, ne kumwambila amba, “Mwanenu ke mumi.”

⁵² Ponkapo wibepwizhe amba, “Ng'anyi kimye kyo atatwile kukosa?” Abo bamukumbwile amba, “Kesha mabanga pa kimye kya butanu ne bubiji po amulekele mashika.”

⁵³ Kabiji shanji wayukile amba, po pa kyonkakya kimye kyo ang'ambijile Yesu amba, “Mwanenu ke mumi.” Ne aye mwine waitabijile, ne ba munzubo yanji bonse.

⁵⁴ Kino kyo kiyukilo kya bubiji kyaubile Yesu byo afumine mu Yudea kwiya mu Ngalilea.