Yoano 3 - KNTP

Yesu ne Nikodema

¹ Kabiji kwajinga mwanamulume umo Mufaliseo, jizhina janji Nikodema, mukulumpe wa Bayudea.

² Uno waishile kwi Yesu bufuku, ne kumwambila amba, “Laabi, twayuka naamba mwi mufunjishi wafuma kwi Lesa. Mambo kafwako wakonsha kuuba bino biyukilo byo muuba anweba ne, poso Lesa uji nanji.”

³ Kumvwa Yesu amba, “Kine, kine nemwambila namba, inge muntu ne kusemwa jibiji ne, kechi akonshe kumona bufumu bwa Lesa ne.”

⁴ Nikodema wamwipwizhe amba, “Nanchi muntu akonshe kusemwa byepi byo aji mukote? Akonshe kutwela munda mwa inanji jibiji, ne kusemwa nyi?”

⁵ Kumvwa Yesu amba, “Kine, kine, nemwambila namba, inge muntu ne kusemwa ku mema ne ku Mupashi ne, kechi akonshe kutwela mu bufumu bwa Lesa ne.

⁶ Akya kyasemwa ku buntunshi bo buntunshi, ne akya kyasemwa ku Mupashi ye mupashi.

⁷ Kechi mukumye byo nemwambila namba, anweba mwafwainwa kusemwa jibiji ne.

⁸ Lubesha lupuupila ko lusaka, obewa umvwa ne jiwi jalo, bino kechi wayuka ko lufuma ne ko luya ne. Byo biji ne bonse basemwa ku Mupashi.”

⁹ Kumvwa Nikodema wamwambijile amba, “Lelo, bino bikonsheke byepi?”

¹⁰ Kumvwa Yesu amba, “Anweba mwi mufunjishi wa bena Isalela, ne kwibiyuka mo byayila bino nenyi?

¹¹ Kine, kine nemwambila namba, byo twayuka byo byonka byotwamba, ne byo twamona byo byonka byo tushimuna, ne anweba bonse ne kwitabila kushimuna kwetu ne.

¹² Lelo umvwe byo nemubuula bya pano panshi anweba ne kwitabila ne, muketabila byepi umvwe nemubuula bya mwiulu?

¹³ Kafwako muntu wakanjijilemo mwiulu ne, poso yenka waikijile mwiulu, aye Mwana Muntu.”

¹⁴ Kabiji byonka byaimikile Mosesa mulolo mungyetu, byo kyafwainwa ne Mwana Muntu akemikwe byonkabya,

¹⁵ amba bonse bamwitabila bekale na bumi bwa myaka.

¹⁶ Mambo Lesa byo ebatemwishe ba pano pantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.

¹⁷ Mambo Lesa kechi watumine Mwananji pano pantanda mu kwibazhachisha ba pano pantanda ne, poso amba ba pano pantanda bapulukile mwi aye.

¹⁸ Aye wamwitabila kechi wazhatwa ne, pakuba awa wabula kwitabila wazhatwa kala, mambo kechi waitabila mu jizhina ja Mwana Lesa yenkawa umo ne.

¹⁹ Kabiji kuzhatwa ko ko kuno, amba kyeya kyaiya pano pantanda, kabiji bantu batemwako mfishi kechi batemwa kyeya ne, mambo byubilo byabo byatama.

²⁰ Byonkabo bonse boba byatama bashikwa kyeya, ne kwiya ku kyeya ne, kuchiina amba byubilo byabo byakasoloka.

²¹ Pakuba awa uba bya kine ye wiya ku kyeya, amba byubilo byanji bisoloke, mo byaubilwa mwi Lesa.

Yesu ne Yoano Mubatishi

²² Bino byo byapwile, Yesu ne baana banji babwanga baishile mu kyalo kya Yudea, ko ko aikajile naabo, kasa babatizha.

²³ Ne Yoano naye wabatizhilenga mu Enona pepi na Salima, mambo ko kwajinga mema avula. Kabiji bantu baishilenga na kubatizhiwa.

²⁴ Ke pakuba aye Yoano waji ukyangye kutayiwa mu kaleya.

²⁵ Ponkapo kwabuukile lupata, baana babwanga ba Yoano ne umo mwina yudea na mambo a kwiovwa.

²⁶ Kabiji baishile kuji aye Yoano, ne kumwambila amba, “Laabi, awa wajinga ne anweba ku bushiya bwa Yodano, yenkawa ye mwashimwine, pano ubena kubatizha, ne bonse babena kupwila koaji.”

²⁷ Kumvwa Yoano amba, “Muntu kechi wakonsha kutambula nangwa kimotu ne, poso wapewakyo kufuma mwiulu.

²⁸ Anweba bene mwi bakamonyi bami byo nakaine namba, kechi yami Kilishitu ne, na ambile namba, bantuma palutwe yanji.

²⁹ Awa uji na musongwa ye musongoshi, kabiji mulunda na musongoshi, yenka waimana na kumumvwa, ye usekela bingi na mambo a jiwi ja musongoshi. Byonkabyo ne luno lusekelo lwami lwafikizhiwa.

³⁰ Aye wafwainwa kuya na kutumbalala, amiwa nafwainwa kuya na kupeela.”

³¹ Wafuma kwiulu ye wakila bonse. Wa panshi ye wa panshitu, ne bya panshi byo byo amba, wafuma mwiulu ye wakila bonse.

³² Kabiji byo amwene ne kumvwa, byo byonka byo ashimuna, kabiji kafwako nangwa umo waitabila kushimuna kwanji ne.

³³ Awa waitabila kushimuna kwanji ye waitaba amba, Lesa ye wa kine.

³⁴ Mambo ye batuma kwi Lesa ye wamba byambo bya Lesa, mambo Lesa kechi upana Mupashi na kupima ne.

³⁵ Shanji watemwa Mwananji, kabiji wabiika byonse mu maboko anji.

³⁶ Aye wamwitabila Mwana ye uji na bumi bwa myaka, pakuba aye ubula kukookela Mwana kechi akamone bumi ne, ne bukaji bwa Lesa bwaikala pe aye.