Yoano 20 - KNTP

Kilende kyo babujile kutanamo mubiji

¹ Kabiji pa juba jitanshi ja mulungu kasa pakifiita, Maliya wa ku Magadala wakelejile ku kilende, ne aye wamwene jibwe bejifumyako kala ku kilende.

² Ponkapo aye wanyemejile kwi Shimona Petelo, ne ku mwana wabwanga mukwabo ye atemenwe Yesu, ne kwibabuula amba, “Bamufumyamo Nkambo mu kilende, ne atweba kechi twayuka ko bamutula ne!”

³ Ponkapo Petelo walupukile, ne yewa mukwabo mwana wabwanga ne kuya ku kilende.

⁴ Ne abo bonse babiji banyemenenga lubilo, bino awa mwana wabwanga mukwabo wamukijile Petelo lubilo, ye wafikile patanshi ku kilende.

⁵ Wabandamine na kusumbilamo, wamwene abya bisapi bya linenyi kasa biji monka bino kechi watwelelemo ne.

⁶ Shimona Petelo naye waishile, wamulondejilenga, aye watwelele monka mu kilende. Wamwene bisapi bya linenyi kasa byalaala panshi,

⁷ ne kitambala kyo bamupombele ku mutwe wanji, kyajingatu kya kuvunga pa bunke bwakyo, kechi kyajinga pamo na bisapi bya linenyi ne.

⁸ Ponkapo ne yewa mwana wabwanga mukwabo wajinga mutanshi kufika ku kilende, naye watwelele monka, ne kumona wamwene, ne kwitabila.

⁹ Bajinga kasa bakyangye kuyuka kinembelo, amba kyafwainwa aye akasanguke mu bafu.

¹⁰ Ponkapo baana babwanga babwelele kwabo.

Yesu byo amwekele kwi Maliya wa ku Magadala

¹¹ Bino Maliya waimene pangye ya kilende kasa ajila. Kabiji byo ajijilenga, wabandamine na kusumbila mu kilende,

¹² wamwene bamalaika babiji mu bitoka kasa baikala, umo ku mitwe, ne mukwabo ku maulu, konka kwalaajile mubiji wa Yesu.

¹³ Kumvwa abo bamwipwizhe amba, “Inetu mubena kujila ka?” Ne aye wibakumbwile amba, “Mambo bamufumyamo Nkambo yami, ne amiwa kechi nayuka ko bamutula ne!”

¹⁴ Byo a ambile bino, ne kufutuluka wafutulukile, wamwene Yesu kasa aimana, pakuba bino kechi wamuyukile amba ye Yesu ne.

¹⁵ Ne Yesu wamwambijile amba, “Inetu, mujila ka? Mukeba ng'anyi?” Aye walangulukile amba ye ulama bujimi, wamwambijile amba, “Mwane, inge yenu mwamulupula muno, mbulai ko mwamutula, amiwa nkamusende.”

¹⁶ Kumvwa Yesu wamwambijile amba, “Maliya!” Ne aye wafutulukile, ne kwamba mu Kihebelu amba, “Laboni!” (Kyalumbulula amba, “Mufunjishi.”)

¹⁷ Kumvwa Yesu wamwambijile amba, “Kechi munkwate ne, mambo nkyangye kukanjila kwi Bataata. Pakuba yainga ku balongo bami, mukebabule amba, mbena kukanjila kwi bataata ne Shenu, kwi Lesa wami ne Lesa wenu.”

¹⁸ Maliya wa ku Magadala wayile na kwibabula baana babwanga, byo a mumwene Nkambo ne bino bintu byo a mwambijile.

Yesu byo amwekele ku baana banji babwanga

¹⁹ Kabiji mabanga, mu jonkaja juba jitanshi ja mulungu, ne bibelo kasa bashinka mobapwijile baana babwanga, na mambo a kuchiina Bayudea, Yesu waishile na kwimana mukachi, ne kwibambila amba, “Mutende ekale ne anweba.”

²⁰ Ne aye byo ebambijile byo byo, wibamwesheshe maboko anji ne mbavu yanji. Ponkapo baana babwanga basekejile pa kumumona Nkambo.

²¹ Yesu wibambijile jibiji amba, “Mutende ekale ne anweba. Byonka byo bantumine bataata amiwa, ne amiwa nemutuma anweba.”

²² Byo a ambile bino, wibapemejile ne kwibambila amba, “Tambulai Mupashi Wazhila.

²³ Bonse bo mukalekela mambo, mambo abo ake balekelwa, kabiji bonse bo mukabula kulekela mambo, kechi ake balekelwa ne.”

Yesu ne Tomase

²⁴ Bino Tomase, umo wa ba jikumi na babiji, ye batelele amba, “Didimasa,” kechi watainwepo byo aishile Yesu ne.

²⁵ Baana babwanga bakwabo bamubujile amba, “Twamumona Nkambo!” Kumvwa aye wibambijile amba, “Amiwa inge ne kumona mikovu ya misumali mu maboko anji ne, ne kukula munwe wami mu mikovu ya misomali ne, ne kubika kuboko kwami mu mbavu yanji ne, kechi ngitabe ne.”

²⁶ Kabiji pakupita moba atanu na asatu, baana banji babwanga bajinga mu nzubo jibiji, ne Tomase naye wajinga naabo. Ne Yesu waishile, bibelo kasa bebishinka, ne kwimana waimene mukachi, ne kwamba amba, “Mutende ekale ne anweba.”

²⁷ Ponkapo wamwambijile Tomase amba, “Letai munwe wenu kuno, monai mu maboko ami, mulete ne kuboko kwenu, mukule mu mbavu yami. Kechi mwikale wabula lwitabilo ne, ikalai wa lwitabilo!”

²⁸ Kumvwa Tomase wamwambijile amba, “Nkambo yami ne Lesa wami!”

²⁹ Ne Yesu wamwambijile amba, “Mwaitabila mambo mwammona amiwa nyi? Bo bene batokwa baitabila kwakubula kummona!”

Mambo anembejilwe uno buku

³⁰ Kabiji Yesu waubile biyukilo bikwabo byavula ku meso a baana babwanga, byabulwa kunembwa mu ye uno buku.

³¹ Pakuba bino byanembwa amba, mwitabile amba, Yesu ye Kilishitu, Mwana Lesa, kabiji amba, pa kwitabila, mwikale na bumi mu jizhina janji.