Yoano 2 - KNTP

Masongola a ku Kena

¹ Kabiji mu juba ja busatu kwajinga kijiilo kya masongola mu muzhi wa Kena wa mu Ngalilea. Ne inanji Yesu wajinga konka,

² ne Yesu naye bamwichile konka ku kijiilo, pamo ne baana banji babwanga.

³ Byo byapwile binyu, inanji Yesu wamwambijile amba, “Kechi baji na binyu ne.”

⁴ Kumvwa Yesu amba, “Tuube byepi ne anweba mama? Kimye kyami kikyangye kufika.”

⁵ Inanji wa ambijile bamwingilo amba, “Byonse byo asa kwimwambila mwibyube.”

⁶ Kwajinga ne milondo ya mabwe itanu na umo yo batujile konka, mwayila kisho kya Bayudea kya kwiovwa, yabaya ya kwitulwilamo mu umo bandundundu nangwa babiji, nangwa basatu.

⁷ Yesu wibambijile amba, “Yuzhai mema mu milondo.” Ne abo bayuzhizhe ne pa kanwa,

⁸ kabiji aye wibambijile amba, “Pano tapulaimo mema mutwale ku mukulumpe wa kijiilo.” Ponkapo batwajile,

⁹ kabiji mukulumpe wa kijiilo byo a tompele pa oa mema a aluka kala ke binyu, ne kuyuka ko byafuma ne, (bino bamwingilo batapwile aa mema bayukile), mukulumpe wa kijiilo waichile musongoshi,

¹⁰ ne kumwambila amba, “Bantu bonse batendekelapo kusolola binyu byawamisha, kabiji kana bantu baubatu tomee, bino kepo basolola byawamako kacheche. Pakuba anweba mwaji kutuula byawamisha, pano po po mwibileta!”

¹¹ Ino ntendekelo ya biyukilo byanji Yesu wiyubile mu Kena wa mu Ngalilea, ne kumwesha lukumo lwanji, kepo baana banji babwanga bamwitabijile.

¹² Pakupwa bino, Yesu ne bainanji ne balongo banji, ne baana banji babwanga bayile ku Kapenama, bino kechi baikajileko moba avula ne.

Kutokesha kwa nzubo ya Lesa

¹³ Kijiilo kya Bayudea kya Lupitailo kyajinga pepi, Yesu kepo ayile ku Yelusalema.

¹⁴ Kabiji mu kipango kya nzubo ya Lesa watainemo bapoteshenga bang'ombe ne mikooko ne ba nkunda, ne bapimpula mali kasa baikala monka.

¹⁵ Ne aye walengele kamama ka mizhinge, wibapangilemo bonse mu kipango kya nzubo ya Lesa, ne mikooko ne bang'ombe. Ponkapo waichijile ne mali a bapimpwilenga ne kwalumuna matebulu abo.

¹⁶ Kabiji wa ambijile bapoteshenga ba nkunda amba, “Bifumyaimo bino, kechi mwalule nzubo ya Bataata ke ya busulu ne!”

¹⁷ Ne baana banji babwanga bavulukile byo kyanembwa amba, “Lupata lwa ku nzubo yenu lukanja ku muchima.”

¹⁸ Kepo Bayudea ba mwambijile amba, “Lelo ng'anyi kiyukilo kyo mwitumwesha, byo mwibyuba bino?”

¹⁹ Kumvwa Yesu amba, “Onaunai ino nzubo yazhila, bino mu moba asatu nkeishimukulula.”

²⁰ Ponkapo Bayudea amba, “Mama! Myaka makumi ana ne myaka itanu na umo yapwile na kushimika ino nzubo yazhila, ne anweba mukeishimukulula mu moba asatu nyi?”

²¹ Nanchi aye watongwelenga nzubo yazhila ya mubiji wanji.

²² Kabiji byo a sangwilwe mu bafu, baana banji babwanga bavulukile kino kyo a ambile, ne kwitaba baitabijile kyokya kinembelo, ne kyokya kyambo kyo a ambile Yesu.

Yesu wibayuka bantu bonse

²³ Kabiji byo ajinga mu Yelusalema mu moba a kijiilo kya Lupitailo, bavula baitabijile mu jizhina janji byo bamwene biyukilo byo aubilenga.

²⁴ Bino Yesu kechi wibaketekejile ne, mambo wibayukile bonse.

²⁵ Kabiji kechi wasakile nangwa umo kumubuula bya muntu ne, mambo aye mwine wayukijile jimo biji mu michima yabo.